Иов 15 - Коми Библия 2023

Элифаз мӧдысь шыасьӧ Иов дінӧ

¹ Теманса Элифаз воча шуис:

² – Мывкыд морт оз вочавидз абутӧм тӧдӧмлунӧн, сійӧ оз пӧткӧдчы сынӧднас,

³ оз дорйысь ковтӧм кывъясӧн, сёрниӧн, мый некодлы оз вай бурсӧ.

⁴ Тэ ӧтдортан Енмысь полӧмсӧ, падмӧдан Ен дінӧ шыасьысьясӧс.

⁵ Тэнад мыжыд ышӧдіс тэнӧ тадзи сёрнитны, тэ бӧрйин аслыд наян сёрни.

⁶ Аслад вомыд тэнӧ мыждӧ, а ог ме, аслад кывйыд тэныд паныд висьталӧ.

⁷ Гашкӧ, тэ медводдза мортӧн чужин, керӧсъясысь водзджык тэнӧ вӧлі вӧчӧма?

⁸ Гашкӧ, тэ вӧлін Ен дінын, кор Сійӧ чукӧртчис енэжвывса олысьяскӧд, гашкӧ, тэныд вичмис сэні мывкыдлуныс?

⁹ Мый тэ сэтшӧмсӧ тӧдан, мый ми огӧ тӧдӧй, мый тэ сэтшӧмсӧ гӧгӧрвоан, мый ми огӧ гӧгӧрвоӧй?

¹⁰ Миян пӧвстын эм кык морт, ӧтиыс дзор юрсиа, а мӧдыс ёна пӧрысь нин, найӧ тэнад бать дорысь ыджыдӧсь.

¹¹ Тэныд ӧмӧй абу тырмана Енлӧн бурӧдӧмыс, Сылӧн шуӧм бур кывъясыс?

¹² Мыйла шызьӧдӧ тэнӧ сьӧлӧмыд, мыйла скӧрпырысь видзӧдан?

¹³ Мыйла тэнад лолыд пыксьӧ Енмыслы, мыйла тэнад вомысь петӧны татшӧм кывъясыс?

¹⁴ Вермас-ӧ морт лоны сӧстӧмӧн, аньсянь чужысь – веськыда олысьӧн?

¹⁵ Енмыс весиг Аслас анделъяслы оз эскы, весиг енэжыс абу сӧстӧм Сылӧн син водзын.

¹⁶ Кыдзи вермас лоны сӧстӧмӧн пеж да шогмытӧм морт, кодлы лёк вӧчӧмыс ва юӧм кодь?

¹⁷ Ме тэныд гӧгӧрвоӧда, а тэ кывзы, висьтала тэныд, мый аддзылі,

¹⁸ висьтала, мый юӧртісны мывкыд йӧзыс, кодъяс эз дзебны асланыс батьяссянь кывлӧмасӧ.

¹⁹ Сӧмын батьяслы вӧлі сетӧма мусӧ, эз вӧвны на пӧвстын йӧз муысь локтысьяс.

²⁰ Лёк вӧчысь сьӧкыдалӧ став олӧм чӧжыс, дзескӧдысьлӧн олан воясыс лыдаӧсь.

²¹ Повзьӧдлан шы жвиньгӧ сылӧн пеляс, лӧньлун дырйи локтӧ сійӧс бырӧдысь.

²² Сійӧ оз эскы, мый мездмас пемыдсьыс, тӧдӧ, мый сійӧс виччысьӧ шыпурт.

²³ Сійӧ шӧйтӧ-ветлӧ, нянь шӧрӧм корсьӧ, тӧдӧ, мый пемыдыслӧн луныс матын.

²⁴ Шогыс да сьӧкыдалӧмыс повзьӧдлӧны сійӧс, тышӧ петысь ӧксы моз найӧ вермӧны сійӧс.

²⁵ Тайӧ лои сыысь, мый сійӧ кисӧ лэптіс Енлы паныд, пыксис Ставсӧвермысьлы,

²⁶ ышнясьӧмӧн сувтіс Сылы паныд кыз сайӧдӧн тупкысьӧмӧн.

²⁷ Тшӧгӧмысла сылӧн чужӧмыс паськаліс, лядьвейыс госсяліс.

²⁸ Сійӧ овмӧдчас куштӧм каръясӧ, киссянвыйӧ эновтӧм керкаясӧ.

²⁹ Сійӧ оз нин озырмы, овмӧс-эмбурсӧ воштас, ас бӧрсяыс му вылас нинӧм оз коль.

³⁰ Пемыдсьыс сійӧ оз вермы пышйыны, сылысь выль вожъяссӧ би чишкалас, Енлӧн пӧльыштӧмыс сійӧс нӧбӧдас.

³¹ Мед оз ылӧдлы асьсӧ абутӧм вылас лача кутӧмнас, нинӧм абуыс сылы аслыс бергӧдчас.

³² Сійӧ кулас аслас кадысь водз, сылӧн вожъясыс оз кутны вежӧдны.

³³ Виноград пу вылысь моз сылӧн кисьмытӧм вотӧсыс усьласяс, олив пу вылысь моз дзоридзыс гылалас.

³⁴ Тадзи кушмас Ентӧг олысьлӧн оланіныс, би ньылыштас козин босьтны радейтысьлысь керкасӧ.

³⁵ Ӧд сійӧ нӧбасис лёкнас да чужтіс шог, сійӧ новлӧдліс ас пытшкас ылӧг.