Иов 14 - Коми Библия 2023

¹ Аньсянь чужысь дженьыд нэма, мортлӧн олӧмыс тырӧма шогӧн.

² Дзоридз моз сійӧ мыччысьлӧ да нярмунӧ, вуджӧр моз вешйӧ, оз сувтлы.

³ И татшӧм морт бӧрся Тэ кыйӧдан, нуӧдан ёрд водзӧ.

⁴ Коді вермас пежсянь чужны сӧстӧмӧн? Некод оз.

⁵ Тэнад кӧ индӧма нин мортлысь олан лунъяссӧ, арталӧма сылысь тӧлысь лыдсӧ, пасйӧма олан нэмыслысь помсӧ, мый сійӧ оз вермы вежны,

⁶ сідзкӧ, вешты синтӧ сы вылысь, мед сійӧ шойччыштас. Сійӧ мед нимкодясьыштас, кыдзи нимкодясьӧ меда морт уджалан лун помасигас.

⁷ Весиг пулӧн эм лача: сійӧс кӧ керыштасны, сійӧ бара кутас быдмыны, сылӧн выль вожъясыс петасны.

⁸ Мед кӧ вужйыс пӧрысьмӧма нин, а мырйыс муас пырӧма,

⁹ но сюрӧ кӧ сылы ватор, сійӧ вежӧдас, том пу моз лэдзас выль вожъяс.

¹⁰ А мортыс вынтӧммӧ да кулӧ. Кор сылӧн лолыс петас, кӧні сійӧ лоӧ?

¹¹ Тыясысь ваыс бырӧ, юяс ямӧны да косьмӧны,

¹² тадзи тшӧтш мортыд – водӧ да оз нин чеччы. Кытчӧдз лоӧ енэжыс му весьтас, сійӧ оз садьмы, аслас унмысь оз паляв.

¹³ Тэ кӧ эськӧ кулӧмаяслӧн оланінын сайӧдін менӧ, дзебин менӧ, кытчӧдз скӧралӧмсьыд он лӧнь, индін меным кад, а сэсся ме йылысь бара казьтыштін!

¹⁴ Кутас-ӧ мортыс кулӧм бӧрас бара овны? Сьӧкыда мырсигӧн ме виччыся, кор нин локтас менӧ вежысь.

¹⁵ Сэки Тэ чукӧстан, и ме вочавидза Тэныд, Тэ кӧсъян аддзысьны Аслад вӧчӧмторкӧд.

¹⁶ Сэки Тэ кутан видзӧдны менам воськовъяс бӧрся, он кут кыйӧдны менсьым мыжъясӧс,

¹⁷ Тэ вевттян менсьым став лёк вӧчӧмӧс, дзебан менсьым мыжӧс.

¹⁸ Но кыдзи керӧсъяс потласьӧны да киссьӧны, изкырта вешйӧ места вывсьыс,

¹⁹ кыдзи ва поткӧдӧ изъяс, визувтысь ва вожӧдӧ му, тадзи Тэ бырӧдан мортлысь лачасӧ.

²⁰ Тэ дзескӧдан мортӧс помӧдзыс, а сэсся сійӧ мунӧ, вежан сылысь чужӧмбансӧ да мӧдӧдан сійӧс.

²¹ Нималӧны-ӧ сылӧн челядьыс, сійӧ оз тӧд, увтыртӧны-ӧ найӧс, сійӧ оз аддзы.

²² Сӧмын вир-яйыс кылӧ ассьыс дойсӧ, лолыс бӧрдӧ ас вӧснаыс.