Иов 13 - Коми Библия 2023

¹ Ставсӧ тайӧс ме аслам синмӧн аддзылі, аслам пельӧн кывлі да гӧгӧрвои.

² Мый тӧданныд ті, сійӧс тӧда и ме, ме дзик жӧ тіян кодь.

³ Ставсӧвермысьлы ме эськӧ кӧсйи ставсӧ висьтавны, Сыкӧд эськӧ кӧсйи веськыда сёрнитны.

⁴ А ті мичмӧданныд ылӧгсӧ, ті – шогмытӧм бурдӧдысьяс.

⁵ Бурджык тіянлы чӧв овны, бурджык мывкыдаӧн лоны.

⁶ Кывзӧй менсьым висьталӧмӧс, кылӧй менсьым паныд вочавидзӧмӧс.

⁷ Енсӧ дорйӧм могысь ті висьталанныд ылӧгсӧ, Сылы отсалӧм могысь ті пӧръясянныд.

⁸ Чайтанныд, мый тіянлы колӧ Енмыс дор сулавны, колӧ Сы пыдди вензьыны?

⁹ Бур ӧмӧй лоӧ, кор Сійӧ пондас туявны-тӧдмавны тіянӧс? Пӧръяланныд ӧмӧй Сійӧс мортӧс моз?

¹⁰ Сійӧ чорыда мыждас, кор ті гусьӧн кодкӧ дор сувтанныд.

¹¹ Сылӧн ыджыдалан выныс оз ӧмӧй повзьӧдлы тіянӧс, оз ӧмӧй босьт тіянӧс полӧм-тіралӧм?

¹² Тіян сёрниныд пӧим кодь, дорйысьӧмныд жугалӧм сёй гырнич кодь.

¹³ Ӧні ті чӧв олӧй, а ме кута сёрнитны, сэсся кӧть мый лоӧ.

¹⁴ Ме ачымӧс ог видз, ме дась аслам олӧмӧн пудъясьны.

¹⁵ Мед Енмыс виӧ менӧ, но ме лача кута, кӧсъя Сы водзын дорйысьны на.

¹⁶ Тайӧ меным мездмӧмыс, ӧд Ентӧг олысь оз вермы сувтны Сы водзӧ.

¹⁷ Сюся кывзӧй менсьым висьталӧмӧс, пель саяныд сюркнялӧй менсьым кывъясӧс.

¹⁸ Ёрд водзӧ ме вая ассьым могӧс, ме тӧда, мый ме абу мыжа.

¹⁹ Коді вермас вензьыны мекӧд? Вермас кӧ кодкӧ, ме дзик пыр ланьта да кула.

²⁰ Ме ог дзебсьы Тэысь, Енмӧй, вӧчан кӧ меным тайӧ кыкторсӧ:

²¹ вештан ме вылысь Ассьыд китӧ да дугдан повзьӧдлыны менӧ.

²² Сэки чукӧстан менӧ, и ме воча шыася, лэдзан меным сёрнитны, и Ачыд вочавидзан.

²³ Уна-ӧ ме сайын лёк вӧчӧмыс да мыжыс? Петкӧдлы меным кывзысьтӧмлунӧс да мыжӧс.

²⁴ Мыйла Тэ дзебан Ассьыд чужӧмтӧ меысь, лыддян менӧ Аслад вӧрӧгӧн,

²⁵ повзьӧдлан менӧ усьӧм корйӧс моз, вӧтлысян кос идзас бӧрся моз?

²⁶ Тэ индін меным курыд лунъяс, пуктін ме вылӧ томдырся мыжъясӧс.

²⁷ Тэ сюйин кокӧс тшемилӧ костӧ, кыйӧдан менсьым быд воськов, вӧтлысян менам кок туй бӧрся.

²⁸ Но мортыс сӧмын сісьмантор, сійӧ возйӧн сёйӧм паськӧм кодь.