Иов 11 - Коми Библия 2023

Софар шыасьӧ Иов дінӧ

¹ Наамаса Софар воча шуис:

² – Уна кыв шуалысьлы оз ӧмӧй ков вочавидзны, уна сёрнитысь ӧмӧй збыльсӧ висьталӧ?

³ Тэнад больгӧмыд ӧмӧй ланьтӧдас мукӧдӧс, тешитчӧмсьыд ӧмӧй тэнӧ некодлы янӧдны?

⁴ Тэ шуин Енлы, мый сёрнитан веськыда, мый Сы водзын тэ сӧстӧм.

⁵ Но Енмыс кӧ збыльысь вочавидзас тэныд, сёрни панас тэкӧд,

⁶ восьтас тэныд мывкыдлуныслысь гусяторъяссӧ, сэки эськӧ тэныд кык пӧв унджык ковмас нуны сьӧкыдсӧ. Тӧд, мый тэнсьыд уна мыж Енмыс вунӧдіс.

⁷ Верман-ӧ тӧдӧмлуннад аддзыны Енсӧ, верман-ӧ тырвыйӧ шымыртны Ставсӧвермысьӧс?

⁸ Сійӧ енэжъясысь на вылын – тэ он вермы судзӧдчыны Сыӧдз, Сійӧ пыдӧстӧминысь на джуджыд – тэ он вермы тӧдмавны Сійӧс.

⁹ Сійӧ муюгыдысь на ыджыд, саридзысь на паськыд.

¹⁰ Сійӧ кӧ локтас, йӧртас дзескыдінӧ да вайӧдас ёрд водзӧ, сэки коді Сійӧс падмӧдас?

¹¹ Сійӧ тӧдӧ ылӧдчысьӧс, аддзӧ лёк вӧчӧм, казявтӧг оз коль.

¹² Вежӧртӧм морт вежӧрсялас, кор вӧлявывса осёл пӧрас мортӧ.

¹³ Тэ кӧ сьӧлӧмтӧ веськӧдан Енлань, нюжӧдан китӧ Сылань,

¹⁴ шыбитан кӧ лёк вӧчӧмсӧ аслад киысь, он лэдз овны лёкыслы аслад керкаын,

¹⁵ сэки яндысьтӧг лэптан синтӧ, пондан зумыда сулавны да он кут повны.

¹⁶ Тэ вунӧдан шогъястӧ, найӧ лоӧны тэныд визувтӧм ва кодьӧн.

¹⁷ Тэнад олӧмыд лоӧ луншӧра югыд кодь, тэнӧ кытшалысь пемыдыс лоӧ асъя югыд кодь.

¹⁸ Тэ он кут майшасьны, ӧд тэнад лоӧ лача, тэ верман лӧня узьны, ӧд тэнӧ лоӧ видзӧма,

¹⁹ тэ водан шойччыны, и некод тэнӧ оз повзьӧд, унаӧн кутасны тэнсьыд отсӧг корны.

²⁰ А лёк вӧчысьлӧн синмыс бердас, сійӧ оз вермы пышйыны, сылӧн лачаыс – бӧръя лолыштӧмыс.