Иов 10 - Коми Библия 2023

¹ Меным зывӧк аслам олӧмӧй, норасьӧмӧс ас пытшкам ог кут, ме кута сёрнитны, ӧд дзескыд менам ловлы.

² Енмыслы ме шуа: эн мыжды менӧ, висьтав, мыйысь Тэ менӧ мыжалан.

³ Тэныд ӧмӧй нимкодь дзескӧдны менӧ, ӧтдортны Ассьыд вӧчӧмтортӧ, а лёк йӧзлысь туйсӧ югдӧдны?

⁴ Тэнад ӧмӧй мортлӧн кодь синмыд, Тэ ӧмӧй морт моз видзӧдан?

⁵ Тэнад олан лунъясыд ӧмӧй мортлӧн кодьӧсь, олан воясыд ӧмӧй мувыв олысьлӧн кодьӧсь?

⁶ Мыйла Тэ корсян менсьым мыжӧс, туялан менсьым лёк вӧчӧмӧс?

⁷ Тэ ӧд тӧдан, мый ме абу мыжа, тӧдан, мый некод оз вермы мездыны менӧ Тэнад киысь.

⁸ Тэнад киыд вӧчис-лӧсьӧдіс менӧ, а ӧні Тэ бырӧдан менӧ?

⁹ Эн вунӧд, мый Тэ сёйысь вӧчин менӧ, а ӧні бӧр вӧчан менӧ муӧн?

¹⁰ Тэ сысъялін менӧ йӧлӧс моз, суктін рыськӧс моз,

¹¹ кучикӧн да яйӧн вевттин менӧ, лыясӧс тэчин да сӧнъясӧн йитін.

¹² Тэ козьналін меным олӧм да буралӧм, тӧждысьӧмӧн видзин менсьым лолӧс.

¹³ Но Тэнад сьӧлӧмын вӧлі дзебӧма, мый мекӧд лоас, тӧда, мый Тэ тадзи лӧсьӧдін.

¹⁴ Тэ видзӧдан ме бӧрся, вӧча-ӧ ме мыжсӧ, Тэ он коль менсьым мыжӧс мыждытӧг.

¹⁵ Ме кӧ мыжа – курыд шог меным! А мыжтӧм кӧ, весиг сэки ог лысьт юрӧс лэптыны, ме пӧтӧма яналӧмнас, кок йылысь усьмӧн менӧ юкталӧма шогнас.

¹⁶ Муртса лэптышта юрӧс, Тэ лев моз нин вӧтчан ме бӧрся, бара повзьӧдлан менӧ Аслад шензьӧдана выннад.

¹⁷ Тэ выльысь вайӧдан мыжалысьясӧс, ёнджыка на скӧралан ме вылӧ, шог бӧрся шог ыстан меным.

¹⁸ Мыйла Тэ петкӧдін менӧ мам кынӧмысь? Бурджык, ме кӧ кулі, и некод эз аддзыв менӧ.

¹⁹ Бурджык, ме кӧ эг вӧв, мам кынӧмсянь кӧ менӧ водтӧдісны гортйӧ.

^20-21 Менам олан лунъясӧй регыд помасясны. Вешйы ме дінысь, коль менӧ! Пемыдас, сап пемыдас менам мунтӧдз сет меным здук-мӧд нимкодясьыштны, ӧд сійӧ мусьыс ме бӧрсӧ ог нин лок.

²² Сійӧ муас пемыд да гудыр-гадыр, сэні сап пемыд, весиг югыдыс – пемыд.