Иов 1 - Коми Библия 2023

Иов да сылӧн ныв-пи

¹ Уц муын оліс Иов нима морт. Сійӧ вӧлі сӧстӧм сьӧлӧма веськыд морт, поліс Енсьыс да ӧтдортчис лёксьыс.

² Сылӧн вӧлі сизим пи да куим ныв.

³ Овмӧсыс вӧлі зэв ыджыд: сизим сюрс ыж-кӧза, куим сюрс верблюд, сюрс доддялан ӧш, витсё энь осёл да зэв уна кесйӧг. Асыввыв муын Иов вӧлі медся нималана мортӧн.

⁴ Иовлӧн пияныс тшӧкыда чукӧртчывлісны ӧта-мӧд ордас. Быдӧн ас кадӧ аслас керкаын лӧсьӧдліс гаж, корліс сёйны-юны тшӧтш куимнан чойсӧ.

⁵ Кор став сизимнан пи ордас вӧлі пасйӧма гажсӧ, Иов корліс пиянсӧ ас ордас, медым вежӧдны-сӧстӧммӧдны найӧс. Сійӧ чеччыліс водз асывнас да быдӧн вӧсна торйӧн вайліс сотан вись. [Нӧшта ӧти ӧшкӧс вайліс ставныслӧн мыж вӧсна.] Иов мӧвпаліс, гашкӧ пӧ, пиянӧй гажӧдчиганыс мыжмисны да сьӧлӧманыс сералісны Енсӧ. Иов быд пӧрйӧ тадзи вӧчліс.

Господь сетӧ Иовӧс сӧтана киӧ

⁶ Ӧтчыд Енлӧн пиян локтісны да сувтісны Господь водзӧ. Накӧд локтіс тшӧтш сӧтана.

⁷ Господь юаліс сӧтаналысь: «Кытысь тэ локтін?» Сӧтана вочавидзис: «Ме ветлӧдлі му вывті да кытшовті сійӧс».

⁸ «Казялін-ӧ Менсьым Иов кесйӧгӧс? – юаліс Господь. – Му вылас ӧд сы кодь мӧдыс абу. Сійӧ сӧстӧм сьӧлӧма веськыд морт, полӧ Енсьыс да ӧтдортчӧ лёксьыс».

⁹ Сӧтана воча шуис Господьлы: «Оз весьшӧрӧ сійӧ пов Енсьыс.

¹⁰ Тэ ӧд быд боксянь кытшалӧмыд сійӧс, сылысь гортсасӧ да став овмӧссӧ. Тэ бурсиан сылысь быд удж, сылӧн ыж-мӧскыс рӧдмӧ-содӧ.

¹¹ Но Тэ кӧ нюжӧдан китӧ да босьтан ставсӧ, мый сылӧн эм, сійӧ омӧльтас Тэнӧ».

¹² Господь шуис сӧтаналы: «Ставыс, мый сылӧн ӧні эм, лоӧ тэнад киын, сӧмын сійӧс асьсӧ эн вӧрӧд». Та бӧрын сӧтана вешйис Господь водзысь.

Иов воштӧ ставсӧ

¹³ Сійӧ лунӧ, кор Иовлӧн ныв-пиыс вӧлі сёйӧны-юӧны ыджыд вокныс ордын,

¹⁴ локтіс Иов дінӧ юӧртысь да висьталіс:

¹⁵ «Сава войтыр уськӧдчис миян вылӧ. Найӧ босьтісны гӧрысь ӧшъястӧ да орччӧн йирсьысь энь осёлъястӧ, а кесйӧгъястӧ виалісны шыпуртӧн. Сӧмын ме ловйӧн коли, медым юӧртны тэныд».

¹⁶ Сылӧн сёрнитігӧн локтіс мӧд юӧртысь да шуис: «Енлӧн би лэччис енэжсянь, сотіс ыж-кӧзатӧ да кесйӧгъястӧ. Сӧмын ме ловйӧн коли, медым юӧртны тэныд».

¹⁷ Сылӧн сёрнитігӧн локтіс коймӧд юӧртысь да шуис: «Калдея муысь локтісны йӧз куим чукӧрӧн, найӧ уськӧдчисны да босьтісны тэнсьыд верблюдъястӧ, а кесйӧгъястӧ виалісны шыпуртӧн. Сӧмын ме ловйӧн коли, медым юӧртны тэныд».

¹⁸ Сылӧн сёрнитігӧн локтіс нӧшта ӧти юӧртысь да шуис: «Кор тэнад ныв-пиыд вӧлі сёйӧны-юӧны ыджыд вокныс ордын,

¹⁹ овтӧминысь петіс ыджыд тӧвныр да керкасӧ нёльнан пельӧсӧдыс лэптыштӧмӧн уськӧдіс челядь вылад. Найӧ ставныс кулісны. Сӧмын ме ловйӧн коли, медым юӧртны тэныд».

²⁰ Иов чеччис да косяліс вылыс паськӧмсӧ, юрсисӧ шырис да кымынь уськӧдчис муас.

²¹ Иов шуис: – Пасьтӧг ме петі мам кынӧмысь, пасьтӧг и бӧр муна. Господь сетіс, Господь и бӧр босьтіс. [Ӧд тадзи вӧлі шогмана Господьлы.] Мед лоӧ ошкӧма Господьлысь нимсӧ!

²² Став тайӧ лоӧмторйыс дырйи Иов эз мыжмы и эз мыжав Енсӧ.