Иона 3 - Коми Библия 2023

Ниневияын олысьяс бергӧдчӧны мыжъясысь

¹ Сэсся Ионалы бара вӧлі Господьсянь кыв:

² «Мун Ниневияӧ, тайӧ ыджыд карас, да юӧрт сэні, мый Ме тшӧкта».

³ Иона кывзысис Господьлысь да муніс Ниневияӧ. Ниневия вӧлі зэв ыджыд кар. Куим лун колӧ вӧлі, мед мунны помсянь помӧдзыс.

⁴ Иона лунтыр ветлӧдліс карӧд да юӧртіс йӧзыслы, мый нелямын лун мысти Ниневия карнысӧ лоӧ бырӧдӧма.

⁵ Ниневияын олысьяс та бӧрын кутісны эскыны Енлы. Найӧ шуисны видзавны, и ставныс ичӧтсянь ыджыдӧдз пасьталісны шогалан паськӧм.

⁶ Кор ниневияса ӧксы кыліс та йылысь, сійӧ чеччис юралан пуклӧсысь, пӧрччис ӧксы паськӧмсӧ, пасьталіс шогалан паськӧм да пуксис пӧим пытшкӧ.

⁷ Ӧксы да сылӧн киподувса юралысьяс тшӧктісны юӧртны Ниневияын олысьяслы: «Энӧ сёйӧй-юӧй да энӧ йирсьӧдӧй-юкталӧй ыж-мӧснытӧ да мукӧд пемӧснытӧ.

⁸ Пасьталӧй шогалан паськӧм да вевттьӧй наӧн тшӧтш пемӧсъяснытӧ. Горзӧмӧн шыасьӧй Ен дінӧ, бергӧдчӧй мыжъяссьыныд да эновтчӧй виалӧм-дзескӧдӧмсьыныд.

⁹ Гашкӧ, Енмыс бурсьӧлӧмтчас да вештас Ассьыс ыпъялан скӧрлунсӧ миян вылысь, и ми ловйӧн колям».

¹⁰ Ен аддзис, мый ниневияса олысьяс эновтчисны лёксьыс. Сэки Сійӧ вештіс мыждӧмсӧ на вылысь да эз бырӧд Ниневия карӧс.