Иона 2 - Коми Библия 2023

Иона кевмысьӧ Енлы чери рушкуын

¹ Господь тшӧктіс ыджыд черилы ньылыштны Ионаӧс. Куим лун да куим вой Иона вӧлі чери рушкуын.

² Сэні сійӧ кевмысис Господьлы, аслас Енлы:

³ – Сьӧкыд дырйи ме шыаси Тэ дінӧ, Господьӧй, и Тэ вочавидзин меным. Горзі пыдӧстӧминсянь, и Тэ кылін менӧ.

⁴ Пыдӧстӧминӧ, саридзлӧн джуджыд ваӧ, Тэ шыбитін менӧ. Визулыс новлӧдліс менӧ, Тэнад гыясыд мунісны ме вывті.

⁵ Ме шуи: «Ӧні менӧ шыбитӧма Тэнад син водзысь. Но ме бара на аддза Тэнсьыд вежа крамтӧ».

⁶ Ваыс горшӧдз пырис, пыдӧстӧм йирыс кыскис менӧ, саридз туруныс гартчис юр гӧгӧр.

⁷ Му пыдӧсӧдзыс уси, керӧсъяслӧн подулӧдзыс. Мулӧн дзиръяыс пӧдласис ме бӧрся пыр кежлӧ. Но Тэ, Господьӧй, менам Енмӧй, ловйӧн лэптін менӧ пемыд гуысь.

⁸ Кор нюкыртчис менам лолӧй, сэки тӧд вылӧ усин меным, Господьӧй. Менам кевмӧмӧй воис Тэӧдз, Тэнад вежа крамӧдз.

⁹ Ковтӧм ылӧг енъяслы юрбитысьяс эновтісны Тэнӧ, буралысь Енмӧс.

¹⁰ А ме ошкана кывъясӧн Тэныд вись вая да вӧча, мый кӧсйыси. Господь – Мездысьыс!

¹¹ Сэсся Господь тшӧктіс черилы быликтыны Ионаӧс му вылӧ.