Иона 1 - Коми Библия 2023

Иона пышйӧ Енмысь

¹ Амиттайлӧн Иона пилы вӧлі Господьсянь кыв:

² «Мун Ниневияӧ, тайӧ ыджыд карас, да юӧрт сэні йӧзыслы, мый Ме мыжда найӧс. Налӧн лёк вӧчӧмъяс йылысь юӧрыс воис Менам пельӧдз».

³ Иона шуис пышйыны Господьысь Фарсисӧ. Локтіс Иоппия карӧ. Сэні корсис Фарсисӧ мунысь корабль, мынтысис туйысь да пуксис сы вылӧ, мед кывтны Господьысь ылӧджык.

⁴ Но Господь ыстіс саридз вылӧ ыджыд тӧвныр. Кыптіс бушков, саридз гызис, и корабль вӧлі жугласянвыйын.

⁵ Кывтысьяс ёна повзисны. Быдӧн кутіс кевмысьны аслас енлы. Корабльсӧ кокньӧдӧм могысь шыблалісны саридзӧ ставсӧ, мый позис шыбитны. А Иона сійӧ кадас чорыда узис корабль пытшкын.

⁶ Корабльӧн веськӧдлысь локтіс сы дінӧ да шуис: «Мый тэ узян? Чеччы да кевмысь аслад Енлы. Гашкӧ, тӧд вылас усям Сылы да ловйӧн колям».

⁷ Кывтысьяс шуисны ӧта-мӧдныслы: «Пудъясям, мед тӧдны, код вӧсна миянӧс суис тайӧ шогыс». Пудъясисны да, петкӧдліс Иона вылӧ.

⁸ Сэки юалісны сылысь: «Висьтав, тэ вӧсна-ӧ суис миянӧс тайӧ шогыс? Кытысь тэ локтін? Кутшӧм могӧн? Кутшӧм муысь да кутшӧм войтырысь тэ?»

⁹ Иона вочавидзис: «Ме – еврей. Юрбита Господьлы, енэжвывса Енлы, саридзсӧ да мусӧ Вӧчысьлы».

¹⁰ Кывтысьясӧс ыджыд полӧм босьтіс. Найӧ тӧдісны, мый Иона пышйӧ Господьысь, ӧд сійӧ висьтавліс налы та йылысь. Та вӧсна пондісны шуасьны Иона вылӧ: «Мый тэ вӧчин!»

¹¹ Саридз вылын гыяс ыдждісны. Та вӧсна юалісны: «Мый миянлы вӧчны тэкӧд, мед саридзыс лӧнис?»

¹² Иона шуис: «Шыбитӧй менӧ саридзӧ, сэки сійӧ лӧняс. Ме тӧда, мый тайӧ ыджыд бушколыс кыптіс ме понда».

¹³ Йӧзыс мыйвынсьыс пондісны сынны вадорлань, но эз вермыны, ӧд саридзыс ӧтарӧ гызис.

¹⁴ Сэки найӧ шыасисны Господь дінӧ: «Господьӧй, корам Тэнӧ, эн бырӧд миянӧс тайӧ мортыс вӧсна, эн перйы миянлысь водзӧс мыжтӧмӧс виӧмысь. Господьӧй, Тэ вӧчин, мый кӧсйин».

¹⁵ Сэсся босьтісны Ионаӧс да шыбитісны саридзӧ. Саридз пырысьтӧм-пыр лӧнис.

¹⁶ Корабль вылын ставнысӧ босьтіс Господьысь полӧм. Найӧ вайисны Господьлы вись да нӧшта кӧсйисны вайны кыв сетан висьяс.