Иоан 8 - Коми Библия 2023

Гозъякост олӧм пежалӧмысь кутӧм ань

¹ Исус кайис Олив керӧсӧ.

² Асывводзнас Сійӧ бара локтіс крамӧ. Сы гӧгӧр чукӧртчис уна йӧз. Исус пуксис да кутіс велӧдны найӧс.

³ Индӧдӧ велӧдысьяс да фарисейяс вайӧдісны Исус дінӧ аньӧс, кодӧс вӧлі кутӧмаӧсь гозъякост олӧм пежалӧмысь. Йӧз водзӧ сійӧс сувтӧдӧмӧн

⁴ найӧ шуисны Исуслы: «Велӧдысь, тайӧ аньсӧ кутӧма гозъякост олӧм пежалӧмысь.

⁵ Мӧисей Индӧдас тшӧктӧма кувмӧныс изъявны татшӧмъяссӧ. Мый Тэ шуан?»

⁶ Найӧ шуалісны тадзи Исусӧс кыйӧм могысь, медым сэсся мыжавны Сійӧс. Но Исус эз кывзы найӧс, а копыртчӧмӧн чуньнас кутіс гижны муас.

⁷ Найӧ водзӧ дӧзмӧдісны Исусӧс юасьӧмъяснас. Сэки Сійӧ веськӧдчис да шуис налы: «Коді тіян пӧвстын мыжтӧм, мед сійӧ медводдзаӧн лыяс аньсӧ изнас».

⁸ Сэсся копыртчис да бара кутіс гижны муас.

⁹ Исуслысь кывъяссӧ кылӧм бӧрын йӧзыс кутісны разӧдчыны сьӧрсьӧн-бӧрсьӧн, ӧд налӧн сьӧлӧмыс мыждіс найӧс асьнысӧ. Медводз мунісны пӧрысьджыкъяс, сэсся мукӧдыс. Колины сӧмын Исус да Сы водзын сулалысь ань.

¹⁰ Исус веськӧдчис да аддзис сӧмын аньӧс. Сійӧ юаліс: «Аньӧй, кӧнӧсь тэнӧ мыждысьясыд? Мыждіс-ӧ кодкӧ тэнӧ?»

¹¹ Ань вочавидзис: «Эз, Господьӧй!» Исус шуис сылы: «Ме тшӧтш ог мыжды. Мун да водзӧ мыжтӧ эн вӧч».

Исус – йӧзыслы югыдыс

¹² Исус бара сёрнитіс йӧзыскӧд. Сійӧ шуис: «Ме эм йӧзыслы югыдыс. Ме бӧрся мунысь оз кут ветлыны пемыдас, сылӧн лоӧ олӧмыслӧн югыдыс».

¹³ Фарисейяс шуисны: «Тэ Ачыд Ас йывсьыд висьталан, та вӧсна Тэнад висьталӧмыд абу эскана».

¹⁴ Исус вочавидзис: «Ме кӧ висьтала Ас йылысь, Менам висьталӧмӧй веськыд, ӧд Ме тӧда, кытысь локті да кытчӧ муна. А ті онӧ тӧдӧй, кытысь Ме локті да кытчӧ муна.

¹⁵ Ті мыжданныд мортсӧ йӧзыс моз. Ме некодӧс ог мыжды.

¹⁶ А мыжда кӧ, мыжда веськыда, ӧд Ме абу ӧтнам. Мекӧд Менӧ мӧдӧдысь Батьӧй.

¹⁷ Тіян Индӧдын гижӧма, мый кык мортлӧн висьталӧмыс эскӧдана.

¹⁸ Ме Ачым висьтала Ас йылысь. Ме йылысь висьталӧ тшӧтш Менӧ мӧдӧдысь Батьӧй».

¹⁹ Сэки юалісны Исуслысь: «Кӧні Тэнад Батьыд?» Исус вочавидзис: «Ті онӧ тӧдӧй Менӧ и онӧ тӧдӧй Менсьым Батьӧс. Ті кӧ тӧдінныд Менӧ, тӧдінныд эськӧ тшӧтш Менсьым Батьӧс».

²⁰ Тайӧ кывъяссӧ Исус висьталіс крамын велӧдігӧн, сьӧм чукӧртан куд дорын. Сэки Сійӧс некод эз босьт, ӧд Сылӧн кадыс эз на во.

²¹ Исус бара висьталіс йӧзыслы: «Ме регыд муна. Ті кутанныд корсьны Менӧ, но мыж пытшканыд куланныд. Кытчӧ Ме муна, сэтчӧ ті онӧ вермӧй локнысӧ».

²² Иудейяслӧн веськӧдлысьяс шензисны: «Гашкӧ, Сійӧ кӧсйӧ вины Асьсӧ, ӧд шуалӧ, кытчӧ пӧ Ме муна, сэтчӧ ті онӧ вермӧй локнысӧ».

²³ Исус шуис налы: «Ті улісянь, а Ме вылісянь. Ті тайӧ муюгыдсьыс, а Ме абу тайӧ муюгыдсьыс.

²⁴ Ме шуи тіянлы: ті куланныд мыж пытшканыд. Онӧ кӧ эскӧй, мый Ме збыльысь Сійӧ, кодӧн шуа Ачымӧс, куланныд мыж пытшканыд».

²⁵ Найӧ юалісны: «Коді нӧ Тэ?» Исус вочавидзис: «Ме – Сійӧ, кодӧн шулі Ачымӧс водзысяньыс.

²⁶ Ме унатор на верма висьтавны тіян йылысь, унаторйысь мыждыны тіянӧс. Но Ме юӧрта муюгыдыслы сӧмын сійӧ, мый кывлі Менӧ Мӧдӧдысьсянь, ӧд Сійӧ збыльсӧ висьталӧ».

²⁷ Найӧ эз гӧгӧрвоны, мый Исус висьталӧ Батьыс йылысь.

²⁸ Исус шуис налы: «Морт Пиӧс кыпӧдӧм бӧрын ті тӧдмаланныд, мый Ме збыльысь Сійӧ, кодӧн шуа Ачымӧс. Ме нинӧм ог вӧч Ассянь, Ме висьтала сӧмын сійӧ, мыйӧ велӧдіс Менӧ Батьӧй.

²⁹ Менӧ Мӧдӧдысьӧй Мекӧд. Батьӧй эз коль Менӧ ӧтнамӧс, ӧд Ме ставсӧ вӧча Сылӧн кӧсйӧм серти».

³⁰ Тайӧ висьталӧмсӧ кывзігӧн унаӧн эскисны Исуслы.

Збыльыс мездас тіянӧс

³¹ Сэки Исус шуис Сылы эскысь иудейяслы: «Менам кывъяс серти кӧ оланныд, ті збыльысь Менам велӧдчысьяс.

³² Ті тӧдмаланныд збыльсӧ, и збыльыс мездас тіянӧс».

³³ Найӧ вочавидзисны: «Ми – Ӧвраамсянь чужысьяс, ми некор эгӧ вӧлӧй кесйӧг туйынӧсь. Сідзкӧ, мыйла Тэ шуан, мый ми мездмам?»

³⁴ Исус вочавидзис: «Веськыда, веськыда висьтала тіянлы: мыжсӧ вӧчысь – мыжыслӧн кесйӧг.

³⁵ Кесйӧг оз вермы кольччыны керкаас пыр кежлӧ, а пиыс олӧ сэні помтӧг.

³⁶ Пиыс кӧ мездас тіянӧс, ті збыльысь мездманныд.

³⁷ Ме тӧда, мый ті Ӧвраамсянь чужысьяс. Но ті кӧсъянныд вины Менӧ, ӧд тіян сьӧлӧмӧ оз тӧрны Менам кывъясӧй.

³⁸ Ме висьтала сы йылысь, мый аддзылі Аслам Бать ордысь. А ті вӧчанныд сы серти, мый аддзылінныд асланыд бать ордысь».

³⁹ Найӧ вочавидзисны: «Миян батьным Ӧвраам». Исус шуис налы: «Ті кӧ Ӧвраамлӧн ныв-пи, вӧчинныд эськӧ Ӧвраам ног.

⁴⁰ Ме висьталі тіянлы Енсянь кывлӧм збыльсӧ, а ті кӧсъянныд вины Менӧ. Ӧвраам тадзи эз вӧчлы.

⁴¹ Ті вӧчанныд батьныд ног». Иудейяс шуисны Исуслы: «Ми абу чуркаяс. Миян эм ӧти Бать, тайӧ Ен».

⁴² Исус шуис: «Енмыс кӧ тіянлы Бать, Ме эськӧ муса вӧлі тіянлы, ӧд Ме Енсянь локті. Ме эг Ассянь лок, Енмыс мӧдӧдіс Менӧ.

⁴³ Мыйла ті онӧ гӧгӧрвоӧй Менсьым висьталӧмӧс? Ті онӧ гӧгӧрвоӧй, ӧд онӧ сибӧдӧй Менсьым кывъясӧс.

⁴⁴ Омӧльыс – тіян батьныд. Ті ставсӧ кӧсъянныд вӧчны сы моз. Сійӧ водзысяньыс вӧлі морт виысь. Збыльсьыс сійӧ ылын, збыльыс сы пытшкын абу. Кор сійӧ ылӧдлӧ, висьталӧ ассяньыс, ӧд сійӧ ылӧдчысь, ылӧгыслӧн бать.

⁴⁵ Ті онӧ эскӧй Меным, ӧд Ме збыльсӧ висьтала.

⁴⁶ Коді тіян пиысь вермас мыждыны Менӧ лёк вӧчӧмысь? Ме кӧ збыльсӧ висьтала, мыйла онӧ эскӧй Меным?

⁴⁷ Коді Енсянь, сійӧ кывзӧ Енлысь кывъяссӧ. А ті онӧ кывзӧй, ӧд ті абу Енсянь».

Исусӧс омӧльтӧм

⁴⁸ Иудейяс шуисны Исуслы: «Ми веськыда висьталам, мый Тэ Самарияысь да Тэ пытшкын пеж лов».

⁴⁹ Исус вочавидзис: «Ме пытшкын пеж лолыс абу. Ме бурӧ пукта Ассьым Батьӧс, а ті Менӧ омӧльтанныд.

⁵⁰ Ме ог корсь Аслым ошкӧмсӧ. Эм Сійӧ, коді сетас Меным ошкӧмсӧ. Сійӧ – веськыда Мыждысьыс.

⁵¹ Веськыда, веськыда висьтала тіянлы: Менам кывъяс серти олысь некор оз кув».

⁵² Иудейяс шуисны Исуслы: «Ӧні ми тӧдам, мый Тэ пытшкын пеж лов. Ӧвраам куліс, пророкъяс кулісны, а Тэ шуан, Менам кывъяс серти олысь пӧ некор оз кув.

⁵³ Тэ ӧмӧй Ӧвраам батьным дорысь ыджыдджык? Сійӧ куліс, пророкъяс тшӧтш кулісны. А Тэ нӧ Асьтӧ код туйӧ пуктан?»

⁵⁴ Исус вочавидзис: «Ме кӧ ошка Ачымӧс, Менам ошкӧмӧй нинӧм дон оз сулав. Менӧ ошкӧ Менам Батьӧй, код йылысь ті шуанныд, мый Сійӧ – тіян Енныд.

⁵⁵ Ті онӧ тӧдӧй Сійӧс, а Ме тӧда. Ме кӧ шуа, мый ог тӧд Сійӧс, сэки лоа тіян кодь пӧръясьысьӧн. Но Ме тӧда Сійӧс да ола Сылӧн кывъясыс серти.

⁵⁶ Тіян Ӧвраам батьныд нимкодьпырысь виччысис Менсьым локтан лунӧс. Сійӧ аддзис тайӧ лунсӧ да ёна нимкодясис».

⁵⁷ Иудейяс шуисны Исуслы: «Тэ аддзылін Ӧвраамӧс? Тэныд ӧд ветымын арӧсыс на абу».

⁵⁸ Исус шуис налы: «Веськыда, веськыда висьтала тіянлы: Ӧвраам чужтӧдз на Ме вӧлі».

⁵⁹ Сэки найӧ босьтісны изъяс да кӧсйисны лыйлыны Исусӧс, но Исус саймовтчӧмӧн петіс крамсьыс да муніс сэтысь.