Иоан 6 - Коми Библия 2023

Вит сюрсӧс вердӧм

¹ Сэсся Исус вуджис Галилея ты, мӧд ногӧн кӧ, Тиверия ты, мӧдлапӧлӧ.

² Сы бӧрся муніс уна йӧз, ӧд найӧ аддзылісны, кыдзи Исус вӧчис шензьӧданаторъяс висьысьясӧс бурдӧдігӧн.

³ Исус кайис керӧсӧ да пуксис сэтчӧ велӧдчысьясыскӧд.

⁴ Матыстчис Ыджыд лун, иудейяслӧн гажӧдчан кад.

⁵ Исус видзӧдліс да аддзис, мый Сы дінӧ локтӧ уна йӧз. Сійӧ шуис Филиплы: «Кытысь миянлы ньӧбны найӧс вердмӧн няньсӧ?»

⁶ Исус шуис тайӧс, медым тӧдмавны Филиплысь эскӧмсӧ. Но Ачыс Сійӧ тӧдіс нин, мый вӧчны.

⁷ Филип вочавидзис: «Кыксё динар вылӧ ньӧбӧм няньыс этша лоӧ, весиг ичӧтиктор оз вичмы быдӧнлы».

⁸ Ӧндрей нима велӧдчысь, Симон-Петырлӧн вокыс, шуис Исуслы:

⁹ «Тані ӧти зонкалӧн эм вит ид нянь да кык чери. Но тайӧ ӧмӧй тырмас та мындаыслы?»

¹⁰ Исус шуис: «Тшӧктӧй йӧзыслы пуксявны». Сійӧ местаыс вӧлі туруна. Йӧзыс пуксялісны, вӧлі вит сюрс гӧгӧр морт.

¹¹ Исус босьтіс няньсӧ, аттьӧаліс Енмӧс да сетіс велӧдчысьясыслы. Велӧдчысьяс разӧдісны няньсӧ пукалысьяслы. Черисӧ тшӧтш разӧдісны быдӧнлы, коді мыйта кӧсйис.

¹² Кор йӧзыс пӧтісны, Исус шуис велӧдчысьясыслы: «Чукӧртӧй коляссӧ, нинӧм энӧ воштӧй».

¹³ Вит ид няньысь коляссӧ велӧдчысьясыс чукӧртісны дас кык куд тыр.

¹⁴ Сэки найӧ, кодъяс аддзылісны Исуслысь шензьӧданатор вӧчӧмсӧ, шуисны: «Тайӧ збыльысь сійӧ Пророкыс, кодлы колӧ вӧлі локны муюгыдас».

¹⁵ Исус тӧдіс, мый йӧзыс мырдӧн кӧсйӧны пуктыны Сійӧс ӧксыӧ, та вӧсна ӧтнас бӧр кайис керӧсӧ.

Исус мунӧ ва вывті

¹⁶ Рытнас Исуслӧн велӧдчысьясыс лэччисны ты дорӧ,

¹⁷ пуксисны пыжӧ да мӧдӧдчисны ты мӧдлапӧлӧ, Капернаум карӧ. Пемдіс нин, но Исус пыр на эз лок на дінӧ.

¹⁸ Пӧльтіс ыджыд тӧвныр, тыыс ёна гызис.

¹⁹ Нёль-ӧ-вит верст сынӧм бӧрын велӧдчысьясыс аддзисны Исусӧс. Сійӧ ва вывті матыстчис налӧн пыж дінӧ. Найӧ ёна повзисны.

²⁰ Исус шуис: «Энӧ полӧй, тайӧ Ме».

²¹ Найӧ кӧсйисны босьтны Исусӧс пыжас, но пыжыс пырысь-пыр матыстчис мӧдлапӧлас, кытчӧ найӧ кывтісны.

Исус – олӧмыслӧн нянь

²² Мӧд луннас ты дорын сулалігӧн йӧзыслы тӧд выланыс уси, мый тӧрыт тані вӧлі сӧмын ӧти пыж, и тайӧ пыжнас велӧдчысьясыс вуджисны ӧтнаныс, Исус эз вӧв накӧд.

²³ Тиверия карсянь локтісны пыжаяс да сувтісны сэтчӧ, кӧні Енмӧс аттьӧалӧмӧн Господь водзынджык вердіс йӧзсӧ.

²⁴ Кор йӧзыс аддзисны, мый Исус да велӧдчысьясыс абуӧсь сэні, найӧ пуксисны пыжъясӧ да вуджисны Капернаумӧ корсьны Исусӧс.

²⁵ Йӧзыс аддзисны Исусӧс ты мӧдлапӧвсьыс да юалісны Сылысь: «Велӧдысь, Тэ нӧ кор татчӧ вуджин?»

²⁶ Исус вочавидзис: «Веськыда, веськыда висьтала тіянлы: ті корсянныд Менӧ онӧ шензьӧданаторъяс аддзылӧм вӧсна, а сы понда, мый пӧттӧдзныд няньсӧ сёйинныд.

²⁷ Энӧ тӧждысьӧй бырана сёян вӧсна, а тӧждысьӧй помтӧм олӧмсӧ сетысь сёян вӧсна. Тайӧ сёянсӧ сетас тіянлы Морт Пи, кодӧс пасйӧма Ачыс Ен Бать».

²⁸ Йӧзыс юалісны Исуслысь: «Мый миянлы вӧчны, медым уджъясным вӧліны шогманаӧсь Енмыслы?»

²⁹ Исус вочавидзис: «Эскӧй Енсянь Мӧдӧдӧмалы. Тайӧ шогмана Енмыслы».

³⁰ Найӧ шуисны Исуслы: «Кутшӧм шензьӧданатор Тэ вӧчан, медым сійӧс аддзылӧм бӧрын ми эским Тэныд? Мый Тэ вӧчан?

³¹ Миян батьяс овтӧминын сёйисны манна. Та йылысь висьталӧ Гижӧдыс: ”Енэжсянь Сійӧ сетіс налы сёйны нянь”».

³² Исус шуис налы: «Веськыда, веськыда висьтала тіянлы: эз Мӧисей сет тіянлы няньсӧ енэжсянь, но Менам Батьӧй сетӧ тіянлы збыль няньсӧ енэжсянь.

³³ Енлӧн няньыс лэччӧ енэжсянь да сетӧ йӧзыслы олӧм».

³⁴ Найӧ шуисны Исуслы: «Господьӧй, татшӧм няньсӧ пыр сет миянлы».

³⁵ Исус шуис: «Ме эм олӧмыслӧн нянь. Ме дінӧ локтысь некор оз кут тшыгъявны, Меным эскысьлӧн горшыс некор оз кут косьмыны.

³⁶ Тіянлы Ме висьтавлі нин: ті аддзылінныд Менӧ, сӧмын онӧ эскӧй.

³⁷ Быдӧн, кодӧс сетӧ Меным Бать, локтас Ме дінӧ. Ме дінӧ локтысьӧс ог вӧтлы.

³⁸ Ме ӧд лэччи енэжсянь эг Ас кӧсйӧм серти вӧчны, но лэччи, медым вӧчны Менӧ мӧдӧдысь Батьлӧн кӧсйӧм серти.

³⁹ Менӧ мӧдӧдысь Батьӧй кӧсйӧ, медым Меным сетӧмаясысь весиг ӧтикӧс эг вошты да ставнысӧ найӧс ловзьӧді медбӧръя лунӧ.

⁴⁰ Менӧ Мӧдӧдысьӧй кӧсйӧ, медым быдӧнлы, коді аддзӧ Писӧ да эскӧ Сылы, вичмис помтӧм олӧм. Медбӧръя лунӧ Ме ловзьӧда найӧс».

⁴¹ Иудейяс дӧзмисны, кор Исус шуис, мый Сійӧ енэжсянь лэччӧм нянь.

⁴² Найӧ сёрнитісны: «Абу-ӧ тайӧ Исус, Ӧсиплӧн пи? Ми ӧд тӧдам Сылысь бать-мамсӧ. Мыйла нӧ Сійӧ шуӧ, Ме пӧ лэччи енэжсянь?»

⁴³ Исус шуис налы: «Энӧ шуасьӧй ас костаныд.

⁴⁴ Некод оз вермы локны Ме дінӧ, оз кӧ вайӧд сійӧс Менӧ мӧдӧдысь Батьӧй. Ме дінӧ локтысьӧс Ме ловзьӧда медбӧръя лунӧ.

⁴⁵ Пророкъяслӧн гижӧма: ”Енмыс быдӧнӧс велӧдас”. Быдӧн, коді кывзӧ Батьӧс да Сысянь велӧдчӧ, локтӧ Ме дінӧ.

⁴⁶ Йӧзыс эз аддзывлыны Батьӧс, сӧмын Енсянь Локтысь аддзыліс Батьсӧ.

⁴⁷ Веськыда, веськыда висьтала тіянлы: Меным эскысьлӧн эм помтӧм олӧм.

⁴⁸ Ме эм олӧмыслӧн нянь.

⁴⁹ Тіян батьясныд овтӧминын сёйлісны манна, но найӧ кулісны.

⁵⁰ А енэжсянь лэччӧм няньсӧ сёйысь оз кув.

⁵¹ Ме эм енэжсянь лэччӧм ловъя нянь. Тайӧ няньсӧ сёйысь помтӧг олӧ. Няньыс, кодӧс Ме сета, – тайӧ Менам яй. Ме сета сійӧс йӧзыслӧн олӧм вӧсна».

⁵² Сэки иудейяс пондісны вензьыны ас костаныс: «Кыдзи Сійӧ вермас сетны Ассьыс яйсӧ сёйны миянлы?»

⁵³ Исус шуис налы: «Веськыда, веськыда висьтала тіянлы: онӧ кӧ сёйӧй Морт Пилысь яйсӧ да юӧй Сылысь вирсӧ, тіян пытшкын олӧмыс оз ло.

⁵⁴ Менсьым яйӧс сёйысь да Менсьым вирӧс юысь помтӧг олӧ, и сійӧс Ме ловзьӧда медбӧръя лунӧ.

⁵⁵ Менам яйӧй эм збыльысь сёян, Менам вирӧй эм збыльысь юан.

⁵⁶ Менсьым яйӧс сёйысь да Менсьым вирӧс юысь олӧ Ме пытшкын, а Ме – сы пытшкын.

⁵⁷ Менӧ мӧдӧдіс ловъя Бать, Меным олӧмыс вичмис Батьсянь. Тадзи Месянь олӧмыс вичмас Менӧ сёйысьлы.

⁵⁸ Тайӧ – енэжсянь лэччӧм нянь, мӧдсикас сёян. Тіян батьясныд сёйисны манна да кулісны, а тайӧ няньсӧ сёйысь помтӧг олӧ».

⁵⁹ Исус висьталіс тайӧс Капернаумын, синагогаын велӧдігӧн.

⁶⁰ Исуслысь висьталӧмсӧ кывзігӧн велӧдчысьяс пӧвстысь унаӧн шуасисны: «Кутшӧм гӧгӧрвотӧмторъяс Сійӧ висьталӧ! Коді вермас кывзыны тайӧс?»

⁶¹ Исус тӧдіс, мый велӧдчысьясыс шуасьӧны, да шуис налы: «Тіянӧс ӧмӧй дӧзмӧдӧ Менам висьталӧмӧй?

⁶² Мый эськӧ шуанныд, аддзанныд кӧ Морт Пилысь кыпӧдчӧмсӧ сэтчӧ, кӧні Сійӧ вӧлі водзынджык?

⁶³ Сӧмын Лов вермӧ ловзьӧдны, а вир-яй тайӧс вӧчны оз вермы. Менам кывъясӧй сетӧны тіянлы Лов да олӧм.

⁶⁴ Но кодсюрӧ тіян пиысь оз эскыны». Исус водзвыв тӧдіс, коді оз эскы Сылы да коді вузалас Сійӧс.

⁶⁵ Исус водзӧ сёрнитіс: «Та понда Ме висьтавлі тіянлы, мый некод оз вермы Ме дінӧ локнысӧ, оз кӧ ло тайӧ Батьсянь».

⁶⁶ Та бӧрти велӧдчысьясысь унаӧн эновтісны Сійӧс, эз нин ветлӧдлыны Сыкӧд.

⁶⁷ Сэки Исус юаліс дас кык велӧдчысьыслысь: «Гашкӧ, ті тшӧтш кӧсъянныд эновтны Менӧ?»

⁶⁸ Симон-Петыр вочавидзис: «Господьӧй, код дінӧ миянлы муннысӧ? Ӧд Тэнад кывъясыд сетӧны помтӧм олӧмсӧ.

⁶⁹ Ми эскам да тӧдам: Тэ – Кристос, ловъя Енлӧн Пи».

⁷⁰ Исус шуис налы: «Эг ӧмӧй Ме бӧрйы тіянӧс дас кыкнаннытӧ? Но тіян пиысь ӧтиыс – сӧтана».

⁷¹ Тайӧс шуигӧн Исус кутіс тӧд вылас Иудаӧс, Симон-Искариотлысь писӧ. Сійӧ вӧлі дас кыксьыс ӧтиыс, коді сэсся вузалас Исусӧс.