Иоан 5 - Коми Библия 2023

Вайӧртӧд дорын бурдӧдӧм

¹ Исус мӧдӧдчис Ерусалимӧ, сэки вӧлі иудейяслӧн гажӧдчан кад.

² Ерусалимын, Ыж дзиръя дорын, вӧлі вайӧртӧд. Еврей ногӧн сійӧ шусис Бетзата. Вайӧртӧд дінас вӧлі вит пыранін, найӧ вӧліны вевт улынӧсь.

³ Пыранінъясас куйліс зэв уна висьысь: синтӧмъяс, коктӧмъяс, косьмӧм ки-кокаяс. Найӧ виччысисны ва гызьӧм.

⁴ Господьлӧн анделыс корсюрӧ лэччывліс вайӧртӧдӧ гызьӧдны васӧ. Гызьӧм ваӧ медводдза пырысьыс быдпӧлӧс висьӧмысь бурдліс.

⁵ Сэні пыранінас куйліс висьысь морт, коді комын кӧкъямыс во чӧж нин вӧлӧм висьӧ.

⁶ Исус тӧдіс, мый тайӧ мортыс дыр нин висьӧ. Сійӧс аддзигӧн Исус юаліс: «Кӧсъян-ӧ тэ бурдны?»

⁷ Висьысь вочавидзис: «Господьӧй, гызьӧм ваас пырнысӧ отсалысьыс меным абу. Менам пыртӧдз кодкӧ мӧд нин удитӧ пырны».

⁸ Исус шуис сылы: «Чеччы, босьт вольпасьтӧ да ветлы».

⁹ Висьысь дзик пыр бурдіс, босьтіс вольпасьсӧ да пондіс ветлӧдлыны. Тайӧ вӧлі шойччан лунӧ.

¹⁰ Та вӧсна иудейяслӧн веськӧдлысьяс шуисны бурдӧм мортлы: «Талун шойччан лун, тэныд оз позь вольпасьтӧ нуны».

¹¹ Сійӧ вочавидзис: «Бурдӧдысьӧй шуис меным: ”Босьт вольпасьтӧ да ветлы”».

¹² Сылысь юалісны: «Коді тэныд тшӧктіс босьтны вольпасьтӧ да ветлыны?»

¹³ Но бурдӧм мортыс эз тӧд, коді Сійӧ, ӧд Исус саяліс йӧз пӧвстас.

¹⁴ Та бӧрти Исус аддзис бурдӧм мортӧс крамысь да шуис сылы: «Ӧні тэ бурдін. Водзӧ эн вӧч мыжсӧ, медым тэныд лёкджык эз ло».

¹⁵ Мортыс муніс да висьталіс иудейяслӧн веськӧдлысьяслы, мый сійӧс бурдӧдіс Исус.

¹⁶ Шойччан лунӧ татшӧмторсӧ вӧчӧмысь иудейяслӧн веськӧдлысьяс пондісны дзескӧдны Исусӧс да кӧсйисны вины Сійӧс.

¹⁷ Исус шуис налы: «Менам Батьӧй дугдывтӧг уджалӧ, и Ме уджала».

¹⁸ Сэки иудейяслӧн веськӧдлысьяс ёнджыка на кӧсйисны вины Исусӧс, ӧд Сійӧ торкис шойччан лунсӧ да шуис Енсӧ Аслас Батьӧн. Тадзи ӧткодяліс Асьсӧ Енкӧд.

Пиыс Батьыс моз вӧчӧ

¹⁹ Исус шуис налы: «Веськыда, веськыда висьтала тіянлы: Пиыс нинӧм оз вермы вӧчны Ассяньыс, оз кӧ аддзыв Батьыслысь вӧчӧмсӧ. Ӧд мый Батьыс вӧчӧ, сійӧс тшӧтш Пиыс вӧчӧ.

²⁰ Батьыс радейтӧ Писӧ да петкӧдлӧ Сылы ставсӧ, мый вӧчӧ. Батьыс нӧшта на ыджыдджык уджъяс Пиыслы петкӧдлас, ті весиг чуйманныд.

²¹ Батьыс ловзьӧдӧ кулӧмаясӧс да сетӧ налы олӧм. Пиыс тшӧтш сетӧ олӧм, кодлы кӧсйӧ.

²² Батьыс некодӧс оз мыжды. Мыждан вынсӧ Сійӧ сетіс Пиыслы,

²³ медым став йӧзыс бурӧ пуктісны Писӧ Батьсӧ моз. Коді оз бурӧ пукты Писӧ, сійӧ оз бурӧ пукты и Батьсӧ, коді мӧдӧдіс Писӧ.

²⁴ Веськыда, веськыда висьтала тіянлы: коді кывзӧ Менсьым кывъясӧс да эскӧ Менӧ Мӧдӧдысьлы, сылӧн эм помтӧм олӧм. Сійӧс оз кутны мыждыны, кулӧмсьыс сійӧ вуджис нин олӧмас.

²⁵ Веськыда, веськыда висьтала тіянлы: воас кад да воис нин, кор кулӧмаяс кыласны Ен Пилысь гӧлӧс шысӧ. Сэки Сійӧс кылысьяс ловзясны.

²⁶ Батьыс сетӧ олӧм быдӧнлы, Пиыслы Сійӧ тшӧтш сетіс вын – сетны олӧм быдӧнлы.

²⁷ Батьыс сетіс Пиыслы вын мыждыны, ӧд сійӧ Морт Пи.

²⁸ Энӧ шензьӧй, мый воас кад, кор гуын куйлысьяс кыласны Морт Пилысь гӧлӧс шысӧ

²⁹ да найӧ ловзясны. Бур вӧчысьяс кутасны овны, а лёк вӧчысьясӧс лоӧ мыждӧма.

³⁰ Ме нинӧм ог вӧч Ассянь. Ме мыжда сы серти, мый кыла Батьсянь, та вӧсна Менам мыждӧмӧй веськыд. Ӧд Ме ог Ас кӧсйӧм серти вӧч, а Менӧ мӧдӧдысь Батьлӧн кӧсйӧм серти вӧча».

Исус висьталӧ Ас йывсьыс

³¹ «Ме кӧ Ачым Ас йылысь висьтала, сэки Менам висьталӧмӧй абу эскана.

³² Но Ме йылысь мӧд висьталӧ. Ме тӧда, мый сылӧн висьталӧмыс веськыд.

³³ Ті мӧдӧдлінныд йӧзӧс Иоан дінӧ, медым тӧдмавны Ме йылысь. Сійӧ збыльсӧ висьталіс.

³⁴ Дерт, меным оз ков йӧзлӧн висьталӧмыс. Ме шуа тайӧс сы могысь, медым ті мездминныд.

³⁵ Иоан вӧлі яръюгыда ӧзъялысь би, сӧмын этша кад ті кӧсйинныд нимкодясьны сылӧн югӧр улын.

³⁶ Но Ме йылысь висьталӧ мӧдтор, Иоан висьталӧмысь на мӧрччанаджык. Батьлӧн тшӧктӧм серти вӧчӧм уджъясӧй петкӧдлӧны, мый Менӧ Батьӧй мӧдӧдіс.

³⁷ Менӧ мӧдӧдысь Батьӧй Ачыс висьталӧ Ме йылысь. Ті Сылысь гӧлӧс шысӧ некор энӧ кывлӧй, Сылысь чужӧмсӧ энӧ аддзылӧй,

³⁸ Сылысь кывъяссӧ сьӧлӧманыд онӧ видзӧй, ӧд ті онӧ эскӧй Сысянь Мӧдӧдӧмалы.

³⁹ Ті тӧдмаланныд-туяланныд Гижӧдъяссӧ, медым тіянлы вичмис помтӧм олӧм, а Гижӧдъясыс висьталӧны Ме йылысь.

⁴⁰ Но ті онӧ кӧсйӧй локны Ме дінӧ, медым тіянлы вичмис олӧм.

⁴¹ Йӧзлӧн ошкӧмыс Меным оз ков.

⁴² Ме тӧда тіянӧс: Енмыс тіянлы абу муса.

⁴³ Ме локті тіян дінӧ Бать нимсянь, но ті онӧ сибӧдӧй Менӧ. Локтас кӧ кодкӧ ас нимсяньыс, сійӧс ті сибӧданныд.

⁴⁴ Ті сибӧданныд ошкӧмсӧ ӧта-мӧдсяньныд, но ӧти Енсянь петысь ошкӧмсӧ онӧ корсьӧй. Сідзкӧ, кыдзи ті верманныд эскыны!

⁴⁵ Энӧ мӧвпалӧй, мый Бать водзын кута мыждыны тіянӧс. Тіянӧс мыждысьыс – Мӧисей, код вылӧ ті лача кутанныд.

⁴⁶ Ті кӧ эсканныд Мӧисейлы, эскинныд эськӧ тшӧтш Меным, ӧд сійӧ гижис Ме йылысь.

⁴⁷ Но сылӧн гижӧдъясӧ кӧ онӧ эскӧй, верманныд-ӧ эскыны Менам кывъясӧ?»