Иоан 4 - Коми Библия 2023

Исус да самарияса ань

^1-2 Фарисейяс кывлӧмаӧсь, Исуслӧн пӧ Иоан дорысь унджык нин велӧдчысьыс, Сійӧ пӧ унджык йӧзӧс пыртӧ. Дерт, Исус эз Ачыс пырт, а пыртісны Сылӧн велӧдчысьясыс. Кор Исус тӧдмаліс, мый фарисейяс кывлӧмаӧсь та йылысь,

³ Сійӧ эновтіс Иудея му да бӧр муніс Галилеяӧ.

⁴ Сылы ковмис мунны Самария пыр.

⁵ Исус воис Самария муӧ, Сикар нима карӧ. Тайӧ карсяньыс матын вӧлі му, кодӧс Яков сетлӧма Ӧсип пиыслы.

⁶ Сэні вӧлі Яковлӧн юкмӧс. Дыр мунӧмысла Исус мудзис да пуксис шойччыштны юкмӧс дорас. Вӧлі луншӧр гӧгӧр.

⁷ Самарияса ань локтіс сэтчӧ вала. Исус шыасис сы дінӧ: «Юктӧдышт Менӧ ванад».

⁸ Исуслӧн велӧдчысьясыс вӧлі мунӧмаӧсь карӧ сёян ньӧбны.

⁹ Ань шуис Исуслы: «Ачыд Тэ иудей, а коран менсьым, самарияса аньлысь, ва юны?» Иудейяс ӧд самарияса войтыркӧд оз волысьны.

¹⁰ Исус вочавидзис аньлы: «Тэ кӧ тӧдін Енлысь сетӧмторсӧ да Сійӧс, коді шуӧ тэныд тайӧ кывъяссӧ: ”Юктӧдышт Менӧ ванад”, тэ эськӧ ачыд корин Сылысь васӧ, и Сійӧ сетіс тэныд ловъя ва».

¹¹ Ань шуис Сылы: «Господьӧй, юкмӧсыс ӧд джуджыд, мыйӧн нӧ Тэ сэтысь гумовтан? Кытысь Тэ ловъя васӧ босьтан?

¹² Тэ ӧмӧй Яков батьным дорысь ыджыдджык? Тайӧ юкмӧссӧ сійӧ сетӧма миянлы. Татысь сійӧ ачыс юлӧма, тшӧтш сылӧн пияныс да пемӧсъясыс».

¹³ Исус вочавидзис: «Тайӧ васӧ юысьлӧн горшыс бара на косьмас.

¹⁴ Но Ме сета ва, и коді кутас юны тайӧ васӧ, сылӧн горшыс некор оз кут косьмыны. Ваыс, кодӧс Ме сета сылы, лоӧ сы пытшкын помтӧм олӧмӧ визувтысь дзулькйӧн».

¹⁵ Ань шуис Сылы: «Господьӧй, вай меным тайӧ васӧ, медым менам горшӧй эз нин косьмы. Сэки татчӧ ваысла волыны оз ковмы».

¹⁶ Исус шуис аньлы: «Ветлы, кор верӧстӧ да лок татчӧ».

¹⁷ Ань вочавидзис: «Верӧсӧй менам абу». Исус шуис: «Тэ веськыда висьталін, мый тэнад верӧсыд абу.

¹⁸ Тэ витысь верӧс сайын вӧлін, но сійӧ мортыс, кодкӧд тэ ӧні олан, абу верӧс тэныд. Тэ збыльсӧ висьталан».

¹⁹ Ань шуис Сылы: «Господьӧй, ме аддза, мый Тэ – пророк.

²⁰ Миян батьяс копрасисны-кевмысисны Енмыслы тайӧ керӧсас. А ті, иудейяс, шуанныд, колӧ пӧ копрасьны Енмыслы сӧмын Ерусалимын».

²¹ Исус шуис сылы: «Аньӧй, эскы Меным, воас кад, кор ті онӧ кутӧй копрасьны Батьлы тайӧ керӧсас да Ерусалимын.

²² Ті, самарияса войтыр, копрасянныд Сылы, кодӧс онӧ тӧдӧй. А ми копрасям Сылы, кодӧс тӧдам, ӧд мездмӧмыс воӧ иудейяссянь.

²³ Воас кад да воис нин, кор Батьлы збыльысь копрасьысьяс кутасны кевмысьны Сылы Ловсянь да збыльыс серти. Татшӧм кевмысьысьясӧс корсьӧ Аслыс Бать.

²⁴ Енмыс эм Лов. Сідзкӧ, Енлы кевмысьысьяслы колӧ кевмысьны Ловсянь да збыльыс серти».

²⁵ Ань шуис Исуслы: «Тӧда, мый локтас Мессия-Кристос. Сійӧ локтас да, ставсӧ висьталас миянлы».

²⁶ Исус шуис аньлы: «Тайӧ Ме, тэкӧд Сёрнитысьыс».

²⁷ Сійӧ кадас воисны велӧдчысьясыс. Найӧ шензисны, мый Исус сёрнитӧ анькӧд. Сӧмын некод на пиысь эз юав, мыйла да мый йылысь Сійӧ сёрнитӧ анькӧд.

²⁸ Сэки ань колис ва дозсӧ, муніс карас да шуис йӧзыслы:

²⁹ «Локтӧй, видзӧдлӧй тайӧ Мортыс вылӧ. Сійӧ висьталіс меным ставсӧ, мый ме вӧчлі. Абу-ӧ Сійӧ Кристос?»

³⁰ Йӧзыс петісны карсьыс да локтісны Исус дінӧ.

³¹ Сэккості велӧдчысьясыс корисны Исусӧс: «Велӧдысь, лок сёйны!»

³² Исус шуис налы: «Менам эм сёян, мый йылысь ті онӧ тӧдӧй».

³³ Велӧдчысьясыс ас костаныс шензисны: «Эз-ӧ кодкӧ вай Сылы сёянсӧ?»

³⁴ Исус шуис налы: «Менам сёянӧй – ставсӧ вӧчны Менӧ Мӧдӧдысьлӧн кӧсйӧм серти да эштӧдны Сылысь уджсӧ.

³⁵ Ті шуанныд, нёль тӧлысь мысти пӧ воас вундан кад. Висьтала тіянлы: видзӧдлӧй кӧдзӧм муяс вылӧ. Найӧ кельдӧдӧмаӧсь нин вундігкежлӧ.

³⁶ Вундысь босьтӧ удждонсӧ ӧні нин, сійӧ чукӧртӧ няньсӧ помтӧм олӧмӧ. Та вӧсна кӧдзысь да вундысь ӧтвыв нимкодясьӧны.

³⁷ Кывйӧз веськыда висьталӧ: ”Ӧти кӧдзӧ, а мӧд вундӧ”.

³⁸ Ме мӧдӧді тіянӧс вундыны му вылӧ, кытчӧ ті энӧ кӧдзлӧй. Сэні мырсисны мукӧдыс, но ті накӧд тшӧтш идраланныд быдтӧмторсӧ».

³⁹ Ань шуис сійӧ карас олысьяслы: «Исус висьталіс меным ставсӧ, мый ме вӧчлі». Та вӧсна Самарияысь унаӧн пондісны эскыны Исуслы.

⁴⁰ Найӧ локтісны Исус дінӧ да корисны олыштны Сійӧс на ордын. Сійӧ кольччыліс сэтчӧ кык лун кежлӧ.

⁴¹ Исус Ачыс сёрнитіс накӧд, та вӧсна нӧшта на унджыкӧн эскисны Сылы.

⁴² Найӧ шуисны аньлы: «Ӧні ми эскам огӧ сӧмын тэнад висьталӧм вӧсна. Ми эскам сы понда, мый асьным кывлім Сійӧс да тӧдам: Сійӧ збыльысь муюгыдсӧ Мездысь, Кристос».

Исус бурдӧдӧ ӧксылӧн отсасьысьлысь писӧ

⁴³ Кык лун мысти Исус муніс сэтысь Галилея муӧ.

⁴⁴ Исус шуліс, пророкӧс пӧ ас муас оз пыдди пуктыны.

⁴⁵ Кор Исус локтіс Галилеяӧ, сэтчӧс йӧзыс сибӧдісны Сійӧс, ӧд найӧ тшӧтш ветлісны Ерусалимӧ Ыджыд лун кежлӧ да аддзылісны, мый Исус вӧчліс сэні.

⁴⁶ Исус бара локтіс Канаӧ, галилеяса карӧ, кӧні Сійӧ васӧ пӧртліс винаӧ. Капернаум карын оліс ӧксылӧн отсасьысь, кодлӧн пиыс вӧлі висьӧ.

⁴⁷ Отсасьысь кывліс, мый Исус локтӧма Иудея муысь Галилеяӧ. Сійӧ локтіс Исус дінӧ да корис Сійӧс бурдӧдны писӧ, коді вӧлі куланвыйын.

⁴⁸ Исус шуис сылы: «Ті онӧ эскӧй, онӧ кӧ аддзылӧй индысьпасъяс да шензьӧданаторъяс!»

⁴⁹ Ӧксылӧн отсасьысь шуис Исуслы: «Господьӧй, волы, кытчӧдз пиӧй ловъя на!»

⁵⁰ Исус шуис сылы: «Мун, тэнад пиыд бурдіс». Ӧксылӧн отсасьысь эскис Исуслӧн кывъясӧ да муніс гортас.

⁵¹ Туяс сылы паныдасисны кесйӧгъясыс. Найӧ шуисны: «Тэнад пиыд бурдіс!»

⁵² Сійӧ юаліс налысь, корджык пиыслы кокньӧдіс. Найӧ вочавидзисны: «Тӧрыт, час лунӧ, биа висьӧмыс эновтіс сійӧс».

⁵³ Сэки батьыс гӧгӧрвоис, мый буретш сійӧ кадас воис бурдӧмыс, кор Исус шуис сылы, тэнад пиыд пӧ бурдіс. Тадзи батьыс да став сылӧн гортсаыс эскисны Исуслы.

⁵⁴ Тайӧ мӧд шензьӧданаторсӧ Исус вӧчис Иудея муысь Галилеяӧ воӧм бӧрын.