Иоан 2 - Коми Библия 2023

Кана карын кӧлысь

¹ Кык лун мысти Канаын, галилеяса карын, вӧлі кӧлысь. Сэні вӧлі Исуслӧн мамыс.

² Исусӧс да велӧдчысьяссӧ тшӧтш вӧлі корӧмаӧсь тайӧ кӧлысь вылас.

³ Кор винаыс помасис, Исуслӧн мамыс шуис Сылы: «Налӧн винаыс бырӧма».

⁴ Исус вочавидзис: «Аньӧй, мый Меным таӧдз, ӧд Менам кадыс эз на во».

⁵ Сэки мамыс шуис кесйӧгъяслы: «Ставсӧ вӧчӧй Сылӧн шуӧм серти».

⁶ Сэні вӧлі изйысь вӧчӧм квайт ва доз, быд дозйӧ ваыс вӧлі тӧрӧ сё литра гӧгӧр. Тайӧ дозъяснас иудейяс вӧдитчисны сӧстӧммӧдчӧм могысь.

⁷ Исус шуис кесйӧгъяслы: «Тыртӧй дозъяссӧ ваӧн». Найӧ тырысӧдзыс кисьталісны васӧ дозъясас.

⁸ Сэсся шуис налы: «Ӧні гумовтӧй васӧ да мыччӧй сійӧс кӧлысь нуӧдысьлы». Найӧ мыччисны.

⁹ Кӧлысь нуӧдысь видліс ваысь артмӧм винасӧ, но сійӧ эз тӧд, кытысь тайӧ винаыс. Та йылысь тӧдісны сӧмын ва дозъяссӧ тыртысьяс. Сэки кӧлысь нуӧдысь корис верӧспусӧ

¹⁰ да шуис сылы: «Ставныс медводз бур винанас юктасьӧны, сэсся йӧз коддзӧм бӧрас лёкджыкнас. А тэ ӧнӧдз бур винасӧ видзӧмыд».

¹¹ Тайӧ медводдза шензьӧданаторсӧ Исус вӧчис Канаын, галилеяса карын. Тадзи петкӧдліс Сійӧ Ассьыс дзирдлунсӧ, и велӧдчысьясыс кутісны эскыны Сылы.

¹² Та бӧрти Исус мамыскӧд, вокъясыскӧд да велӧдчысьясыскӧд мунісны Капернаум карӧ. Сэтчӧ найӧ кольччисны лун-мӧд кежлӧ.

Крамысь вузасьысьясӧс вӧтлалӧм

¹³ Матыстчис иудейяслӧн Ыджыд лун. Исус локтіс Ерусалимӧ.

¹⁴ Сійӧ аддзис, мый крамын вузалӧны ӧшъясӧс, ыжъясӧс, гулюясӧс да вежлалӧны сьӧм.

¹⁵ Исус кӧвъясысь кыыштіс орс да кутіс вӧтлавны сыӧн крамысь вузасьысьясӧс, налысь ыжъяссӧ да ӧшъяссӧ. Сійӧ пӧрлӧдліс сьӧм вежысьяслысь пызанъяссӧ да шыблаліс налысь сьӧмнысӧ.

¹⁶ Гулюӧн вузасьысьяслы Сійӧ шуис: «Петкӧдӧй гулюястӧ татысь! Энӧ пӧртӧй Менам Батьлысь керкасӧ вузасянінӧ!»

¹⁷ Сэки Исуслӧн велӧдчысьяслы тӧд выланыс уси Гижӧдас висьталӧмыс: «Тэнад керка вӧсна вежӧгтӧмыс топӧдӧ менсьым сьӧлӧмӧс».

¹⁸ Иудейяслӧн веськӧдлысьяс шуисны Исуслы: «Кутшӧм ногӧн Тэ эскӧдан миянӧс, мый Тэныд позьӧ тадзи вӧчнысӧ?»

¹⁹ Исус вочавидзис: «Жугӧдӧй тайӧ крамсӧ, и Ме куим лунӧн выльысь лэпта сійӧс».

²⁰ Найӧ воча шуисны Исуслы: «Тайӧ крамсӧ лэптісны нелямын квайт во чӧж, а Тэ куим лунӧн кӧсъян лэптыны сійӧс?»

²¹ Крам йылысь сёрнитігӧн збыльвылас Исус висьталіс Аслас вир-яй йылысь.

²² Исуслӧн ловзьӧм бӧрын велӧдчысьясыслы тӧд выланыс усины Сылӧн кывъясыс. Сэки найӧ эскисны Гижӧдӧ да Исуслӧн кывъясӧ.

²³ Ерусалимын Ыджыд лун дырйи унаӧн аддзылісны Исуслысь шензьӧданаторъяс вӧчӧмсӧ да эскисны Сылы.

²⁴ Но Исус эз эскы налы, ӧд Сійӧ тӧдіс найӧс ставнысӧ.

²⁵ Сылы эз ковны йӧз йылысь висьталысьяс, ӧд Сійӧ тӧдіс быд мортлысь сьӧлӧмсӧ.