Иоан 19 - Коми Библия 2023

¹ Сэки Пилат тшӧктіс чорыда нӧйтны Исусӧс.

² Шыпуртаяс пуктісны Исуслы юрас лежнӧгысь кыӧм юркытш, пасьтӧдісны Сійӧс пемыдгӧрд паськӧмӧ

³ да шуалісны: «Мед олас иудейяслӧн Ӧксы!» Сэсся кучкалісны чужӧмас.

⁴ Пилат бара петіс иудейяс дінӧ да шуис: «Ме петкӧда Сійӧс тіян дінӧ. Тӧдӧй, мый ме некутшӧм мыж Сылысь ог аддзы».

⁵ Исус петіс пемыдгӧрд паськӧма, юр вылас вӧлі лежнӧгысь юркытш. Пилат шуис йӧзыслы: «Со, тайӧ Мортыс».

⁶ Исусӧс аддзигӧн аркирейяс да крам видзысьяс горӧдісны: «Тувъяв! Тувъяв Сійӧс!» Пилат шуис налы: «Ті асьныд босьтӧй да тувъялӧй Сійӧс. Ме некутшӧм мыж Сылысь ог аддзы».

⁷ Найӧ вочавидзисны: «Миян эм Индӧд. Индӧдным серти Сылы колӧ кувны, ӧд Асьсӧ Сійӧ Ен Пиӧн шуӧ».

⁸ Тайӧс кылӧм мысти Пилат ёнджыка на повзис.

⁹ Сійӧ пырис керкаас да юаліс Исуслысь: «Тэ кытысь?» Исус сылы нинӧм эз вочавидз.

¹⁰ Пилат шуис: «Он кӧсйы сёрнитны мекӧд? Он ӧмӧй Тэ тӧд, мый ме верма тувъявны Тэнӧ, верма и мездыны?»

¹¹ Исус вочавидзис: «Тэ эськӧ нинӧм эн вермы вӧчны Мекӧд, эз кӧ вӧв сетӧма тэныд вылісянь. Та вӧсна Менӧ вузалысь ёнджыка на мыжа».

¹² Та бӧрти Пилат збыльысь кӧсйис лэдзны Исусӧс, но иудейяс горзісны: «Сійӧс кӧ лэдзан, кесарлы тэ абу ёрт. Ӧд коді пуктӧ асьсӧ ӧксыӧ, сійӧ паныд сувтӧ кесарлы».

¹³ Тайӧс кылӧм бӧрын Пилат петкӧдіс Исусӧс ывлаӧ, ачыс пуксис изэрдвывса мыждан пуклӧсӧ. Еврей ногӧн Изэрдыс шусис Габбата.

¹⁴ Тайӧ вӧлі Ыджыд лунлы паныд, луншӧрнас. Пилат шуис иудейяслы: «Со, тіян Ӧксыныд!»

¹⁵ Найӧ горӧдісны: «Босьт, тувъяв Сійӧс!» Пилат юаліс: «Тіянлысь Ӧксынытӧ-ӧ тувъяла?» Аркирейяс вочавидзисны: «Кесарысь кындзи миян мӧд ӧксыыс абу».

¹⁶ Сэки Пилат сетіс Исусӧс тувъявны крестӧ. Исусӧс нуӧдісны сэтысь.

Исусӧс тувъялӧм

¹⁷ Крестсӧ нуигтыр Исус кайис Юр лы нима керӧсӧ, еврей ногӧн Голгопа керӧсӧ.

¹⁸ Сэні Сійӧс тувъялісны крестӧ. Сыкӧд орччӧн ӧтар-мӧдарсяньыс тувъялісны кык мортӧс, а шӧракостаныс – Исусӧс.

¹⁹ Пӧвтор вылӧ Пилат тшӧктіс гижны: «Назаретса Исус, иудейяслӧн Ӧксы». Гижӧдсӧ ӧшӧдісны крест вылас.

²⁰ Тайӧ гижӧдсӧ иудейясысь унаӧн лыддисны, ӧд Исусӧс тувъяланіныс вӧлі карсяньыс матын. Гижӧдсӧ вӧлі гижӧма еврей, грек да латин кывйӧн.

²¹ Аркирейяс шуисны Пилатлы: «Эн гиж: ”Иудейяслӧн Ӧксы”. Гиж, мый Сійӧ шуліс: ”Ме – иудейяслӧн Ӧксы”».

²² Пилат вочавидзис: «Мый гижи, сійӧс гижӧма нин».

²³ Исусӧс тувъялӧм бӧрын шыпуртаяс босьтісны Сылысь паськӧмсӧ да юкисны нёль пельӧ, быдӧнлы мыйкӧ вичмис. Босьтісны тшӧтш дӧрӧмсӧ. Дӧрӧмыс вӧлі вурыстӧм, дзоньнас кыӧма.

²⁴ Найӧ шуисны ӧта-мӧдныслы: «Огӧ косявлӧй дӧрӧмсӧ, вай пудъясям, кодлы сійӧ вичмас». Тадзи иніс Гижӧдыс: – Ас костаныс юклӧны Менсьым паськӧмӧс, пудъясьӧны Менам дӧрӧм вӧсна. Тадзи вӧчисны шыпуртаяс.

²⁵ Крест дорын сулалісны Исуслӧн мамыс, мамыслӧн чойыс, Клопаслӧн Марья нима гӧтырыс да Магдала Марья.

²⁶ Мамсӧ да сыкӧд сулалысь муса велӧдчысьсӧ аддзигӧн Исус шуис мамыслы: «Аньӧй, тайӧ тэнад пиыд».

²⁷ Сэсся велӧдчысьыслы шуис: «Тайӧ тэнад мамыд». Сэксянь тайӧ велӧдчысьыс босьтіс Марияӧс ас дінас.

Исуслӧн кулӧм

²⁸ Исус тӧдіс, мый ставсӧ нин вӧчӧма. Сійӧ шуис: «Горшӧй косьмӧ». Тадзи иніс Гижӧдыс.

²⁹ Сэні сулаліс вина уксус тыра доз. Шыпуртаяс кӧтӧдісны вина уксусӧн губка, сэсся иссоп бедь помӧ сатшкӧмӧн матыстісны сійӧс Исуслы вомдорас.

³⁰ Винасӧ видлӧм бӧрын Исус шуис: «Ставсӧ вӧчӧма!» Сэсся нёровтіс юрсӧ да лэдзис ловсӧ.

³¹ Ставыс тайӧ вӧлі Ыджыд лунлы паныд лунӧ. Иудейяслӧн веськӧдлысьяс эз кӧсйыны, медым шойясыс колисны крест вылын ӧшавны шойччан лун кежлӧ, ӧд матыстчис Ыджыд лун. Та вӧсна корисны Пилатӧс, медым тшӧктіс чегъявны тувъялӧмаяслысь кокчӧр лыяссӧ да лэдзны найӧс крест вылысь.

³² Шыпуртаяс локтісны да чегъялісны Исускӧд орччӧн тувъялӧмаяслысь кокчӧр лыяссӧ.

³³ Исус дінӧ матыстчӧм бӧрын найӧ аддзисны, мый Сійӧ кулӧма нин. Та вӧсна кокчӧр лыяссӧ Сылысь эз чегъявны.

³⁴ Шыпуртаяс пиысь ӧти бытшкис Исуслы шынас ордлы костас, сэтысь чепӧсйис вир да ва.

³⁵ Тайӧс аддзылысь висьталӧ та йылысь, медым ті эскинныд. Сылӧн висьталӧмыс веськыд. Сійӧ тӧдӧ, мый висьталӧ збыльсӧ.

³⁶ Ставыс лои Гижӧдыс серти: «Сылысь лысӧ оз ло чегъялӧма».

³⁷ Мӧдлаын тшӧтш гижӧма: «Найӧ видзӧдласны Сы вылӧ, кодӧс бытшкисны».

Исусӧс дзебӧм

³⁸ Аримафеяысь Ӧсип вӧлі Исуслӧн гуся велӧдчысь, ӧд сійӧ поліс иудейяслӧн веськӧдлысьясысь. Сійӧ муніс Пилат дінӧ да корис Исуслысь шойсӧ, и Пилат лэдзис босьтны. Ӧсип муніс да босьтіс Исуслысь шойсӧ.

³⁹ Сэтчӧ локтіс тшӧтш Никодим, коді коркӧ войнас воліс Исус дінӧ. Сійӧ вайис комын кило кымын смирнаысь да алоэысь вӧчӧм мавтас.

⁴⁰ Найӧ босьтісны Исуслысь шойсӧ да гартыштісны сійӧс дзебан дӧраӧ. Дӧрасӧ вӧлі кӧтӧдӧма чӧскыд дука мавтасӧн. Тадзи дзеблісны иудейяс кулӧмаясӧс.

⁴¹ Исусӧс тувъяланінсянь матын вӧлі сад йӧр. Сэні вӧлі выль дзебанін, кытчӧ некодӧс на эз дзеблыны.

⁴² Матыстчис иудейяслӧн шойччан лун, та вӧсна Исуслысь шойсӧ пуктісны тайӧ дзебанінас, ӧд дзебаніныс вӧлі матын.