Иоан 16 - Коми Библия 2023

¹ «Тайӧс висьталі тіянлы, медым ті энӧ эновтчӧй эскӧмысь.

² Тіянӧс вӧтласны синагогаысь. Весиг воас сэтшӧм кад, кор тіянӧс виысьяс кутасны чайтны, мый татшӧм ногӧн найӧ кесъялӧны Енмыслы.

³ Найӧ вӧчасны тадзи, ӧд Батьӧс да Менӧ найӧ оз тӧдны.

⁴ Тайӧс Ме висьталі тіянлы, медым сійӧ кадыс воигӧн ті тӧд выланыд уськӧдінныд Менсьым кывъясӧс. Водзынсӧ тайӧс эг висьтавлы тіянлы, ӧд Ме вӧлі тіянкӧд».

Збыльыслӧн Лов

⁵ «Ӧні муна Менӧ Мӧдӧдысь дінӧ. Но некод тіян пиысь оз юав Менсьым, кытчӧ Ме муна.

⁶ Ӧд Менам висьталӧмысь тіян сьӧлӧмныд тырис шогӧн.

⁷ Ме висьтала тіянлы збыльсӧ: бурджык лоӧ, Ме кӧ муна. Ог кӧ мун, сэки Дорйысь оз лок тіян дінӧ, а муна кӧ, мӧдӧда Сійӧс тіян дінӧ.

⁸ Дорйысьыс локтас да эрдӧдас муюгыдыслысь ылалӧмсӧ – Сійӧ висьталас налы мыж йылысь, веськыдлун йылысь да мыждӧм йылысь.

⁹ Мыжыс сыын, мый оз эскыны Меным.

¹⁰ Веськыдлуныс сыын, мый Ме муна Батьӧй дінӧ да ті онӧ нин аддзӧй Менӧ.

¹¹ Мыждӧмыс сыын, мый тайӧ муюгыдас ыджыдалысьсӧ мыждӧма нин.

¹² Унатор на верма висьтавны тіянлы, но ӧні ті онӧ вермӧй ставсӧ тӧрӧдны.

¹³ Збыльыслӧн Лолыс локтас да велӧдас тіянӧс збыляс. Сійӧ оз Ассяньыс кут висьтавны, а висьталас кывлӧмсӧ да юӧртас тіянлы водзӧ лоанасӧ.

¹⁴ Сійӧ нимӧдас Менӧ, ӧд Месянь кывлӧмсӧ тіянлы юӧртас.

¹⁵ Ставыс, мый Батьлӧн, тшӧтш Менам. Сійӧн Ме шуи, мый Месянь кывлӧмсӧ тіянлы юӧртас».

Шог бергӧдчас нимкодьлунӧ

¹⁶ «Регыд ті онӧ аддзӧй Менӧ, сэсся регыд бара аддзанныд Менӧ, ӧд Ме муна Бать дінӧ».

¹⁷ Велӧдчысьяс пиысь кодсюрӧ сёрнитісны ӧта-мӧдныскӧд: «Мыйла Сійӧ шуӧ, регыд пӧ ті онӧ аддзӧй Менӧ, сэсся регыд бара аддзанныд Менӧ? Мыйла Сійӧ висьталӧ, Ме пӧ муна Бать дінӧ?»

¹⁸ Найӧ шензисны: «Кыдзи гӧгӧрвоны Сылысь кывъяссӧ, кор шуӧ, регыд пӧ? Ми огӧ гӧгӧрвоӧй Сылысь висьталӧмсӧ».

¹⁹ Исус тӧдіс, мый йылысь велӧдчысьясыс кӧсйӧны юавны Сылысь, да шуис налы: «Сы йылысь-ӧ ті сёрнитанныд ӧта-мӧдныдкӧд, мый Ме шуи: ”Регыд ті онӧ аддзӧй Менӧ, сэсся регыд бара аддзанныд Менӧ”?

²⁰ Веськыда, веськыда висьтала тіянлы: ті кутанныд сыркъялӧмӧн бӧрдны, а муюгыдыс кутас нимкодясьны. Ті шогӧ усянныд, но тіян шогныд бергӧдчас нимкодьлунӧ.

²¹ Кага вайысь ань сьӧкыдалӧ, кор воӧ кад чужтыны. Но чужтӧм бӧрас сылӧн сьӧкыдалӧмыс вунӧ нимкодьысла, ӧд муюгыдас морт чужис.

²² Ӧні ті тшӧтш шогсянныд, но Ме бара аддзыся тіянкӧд. Сэки тіян сьӧлӧмныд тырас нимкодьлунӧн, и тіянлысь нимкодьлунтӧ некод оз мырддьы.

²³ Сійӧ лунӧ ті нинӧм нин онӧ юалӧй Менсьым. Веськыда, веськыда висьтала тіянлы: Бать сетас тіянлы ставсӧ, мый коранныд Сылысь Менам нимӧн.

²⁴ Ӧнӧдз ті нинӧм энӧ корлӧй Менам нимӧн. Корӧй, и лоӧ сетӧма тіянлы. Сэки тіян нимкодьлунныд лоӧ помтӧм-дортӧм.

²⁵ Ме висьтавлі тіянлы велӧданвисьтъясӧн. Но воас кад, кор ог нин кут тадзи сёрнитны. Сэки велӧданвисьтъястӧг веськыда висьтала тіянлы Бать йылысь.

²⁶ Сійӧ лунӧ ті асьныд кутанныд корны Батьлысь Менам нимӧн. Меным оз нин ло колана кевмысьны Батьлы тіян вӧсна.

²⁷ Ті асьныд мусаӧсь Батьлы, ӧд ті радейтанныд Менӧ да эсканныд, мый Ме локті Енсянь.

²⁸ Ме локті муюгыдас Бать дінсянь. Ӧні Ме коля муюгыдсӧ да бӧр муна Бать дінӧ».

²⁹ Велӧдчысьясыс шуисны Исуслы: «Ӧні Тэ веськыда висьталан, он нин сёрнит велӧданвисьтъясӧн.

³⁰ Ӧні ми аддзам, мый Тэ тӧдан ставсӧ. Миян юавтӧдз на Тэ тӧдан нин, мый вочавидзны. Та вӧсна эскам: Тэ локтін Енсянь».

³¹ Исус шуис: «Ӧні ті эсканныд?

³² Воас кад да воис нин, кор ті ставныд разаланныд, Менӧ ӧтнамӧс колянныд. Но Ме абу ӧтнам, Мекӧд Батьӧй.

³³ Тайӧс висьталі тіянлы, медым тіян вӧлі лӧньлун Ме пытшкын. Муюгыдас сьӧкыд лоӧ тіянлы, но энӧ полӧй, ӧд Ме верми муюгыдсӧ».