Иоан 12 - Коми Библия 2023

Исусӧс мавтыштӧм

¹ Ыджыд лунӧдз квайт лунӧн водзджык Исус воис Вифания сиктӧ. Сэні оліс Лазар, кодӧс Исус ловзьӧдіс.

² Сэні Исуслы лӧсьӧдісны рытъя сёян. Марпа кесъяліс. Исускӧд сёйысьяс пӧвстын вӧлі и Лазар.

³ Марья босьтіс литра джын зэв дона нард вый да мавтіс Исуслысь коксӧ, сэсся чышкаліс найӧс юрсинас. Керкаас ӧвтіс чӧскыд дукӧн.

⁴ Велӧдчысьяс пӧвстын вӧлі Иуда, Симон-Искариотлӧн пиыс, коді сэсся вузалас Исусӧс. Сійӧ шуис:

⁵ «Мыйла тайӧ выйсӧ эз вузавны куимсё динарысь? Сьӧмсӧ эськӧ позис гӧльяслы сетны».

⁶ Дерт, Иуда эз тӧждысь гӧльяс вӧсна. Сійӧ шуис тадзи, ачыс вӧлі гусясьысь да. Сы ордын вӧлі ӧтувъя сьӧм кудйыс, кытысь сійӧ босьтлывліс аслыс.

⁷ Исус шуис: «Ӧвсьы сыысь! Тайӧ аньыс видзис выйсӧ Менӧ дзебигкежлӧ.

⁸ Гӧльяс пыр лоасны тіянкӧд, а Ме ог пыр ло».

⁹ Иудейясысь унаӧн тӧдмалісны Исуслӧн Вифания сиктӧ воӧм йылысь. Найӧ локтісны сэтчӧ эз сӧмын Исус понда, но медым аддзывны тшӧтш Лазарӧс, кодӧс Исус ловзьӧдіс кулӧмысь.

¹⁰ Аркирейяс шуисны вины тшӧтш Лазарӧс,

¹¹ ӧд Лазар вӧсна уна иудей ӧтдортчисны наысь да кутісны эскыны Исуслы.

Исус пырӧ Ерусалимӧ

¹² Мӧд луннас гажӧдчыны чукӧртчӧм йӧз кылісны, мый Исус локтӧ Ерусалимӧ.

¹³ Пальма росъяс босьтӧмӧн найӧ петісны Исуслы воча да горзісны: – Осанна! Бурсиӧма Господь нимӧн Локтысьӧс, Израильлысь Ӧксысӧ!

¹⁴ Исус аддзис том осёлӧс да пуксис сы вылӧ. Ӧд тадзи гижӧма:

¹⁵ – Эн пов, Сион ныв! Видзӧд, Ӧксыыд локтӧ, пукалӧ осёл чань вылын.

¹⁶ Сэки велӧдчысьясыс эз на гӧгӧрвоны тайӧс. Но Исуслӧн дзирдлуныс воссьӧм бӧрын налы тӧд выланыс уси, мый тадзи вӧлі гижӧма Сы йылысь, и татшӧм ногӧн найӧ паныдалісны Сійӧс.

¹⁷ Найӧ, кодъяс вӧліны Исускӧд, кор Сійӧ чукӧстіс Лазарӧс дзебанінысь да ловзьӧдіс сійӧс, висьталісны йӧзыслы

¹⁸ тайӧ шензьӧданатор йывсьыс. Та вӧсна йӧзыс чукӧрӧн петісны Исуслы воча.

¹⁹ Фарисейяс сёрнитісны ас костаныс: «Аддзанныд, ми нинӧм огӧ вермӧй вӧчны. Став йӧзыс мунӧны Сы бӧрся».

Исус висьталӧ Аслас кулӧм йылысь

²⁰ Гажӧдчан кад дырйи Енлы юрбитны локтӧмаӧсь вӧлі тшӧтш кымынкӧ грек.

²¹ Найӧ матыстчисны Филип дінӧ, коді вӧлі Випсаидаысь, галилеяса карысь, да шыасисны: «Ыджыдӧй, ми кӧсъям аддзывны Исусӧс».

²² Филип муніс да висьталіс та йылысь Ӧндрейлы. Сэсся Ӧндрей Филипкӧд висьталісны та йылысь Исуслы.

²³ Исус шуис налы: «Воис кад – воссьыны Морт Пилӧн дзирдлуныслы.

²⁴ Веськыда, веськыда висьтала тіянлы: шобді тусь кӧ муӧ усьӧм бӧрас оз кув, сэки ӧтка тусьӧн кольӧ. Кулас кӧ, уна тусь ваяс.

²⁵ Тэныд кӧ муса олӧмыд, воштан сійӧс. Мустӧмтан кӧ ассьыд олӧмтӧ тайӧ муюгыдас, видзан сійӧс помтӧм олӧмӧ.

²⁶ Меным кесъялысь мед локтӧ Ме бӧрся. Кӧні Ме лоа, сэні тшӧтш лоӧ Менам кесъялысьӧй. И Меным кесъялысьӧс Батьӧй бурӧ пуктас.

²⁷ Ӧні Менам сьӧлӧмӧй ёна майшасьӧ. Мый Меным шуны? Батьӧй, мезды Менӧ тайӧ кадсьыс! Но дзик тайӧ кад кежлас Ме локті.

²⁸ Батьӧй, восьт Аслад нимлысь дзирдлунсӧ!» Сэки енэжсянь кыліс гӧлӧс шы: «Ме восьті нин да нӧшта на восьта».

²⁹ Сэні сулалысь йӧзыс тайӧс кылӧм бӧрын шуалісны, тайӧ пӧ гым. Мӧдъяс шуалісны, андел пӧ Сыкӧд сёрнитіс.

³⁰ Исус шуис: «Тайӧ висьталӧмыс эз вӧв Меным, а тіянлы.

³¹ Ӧні тайӧ муюгыдсӧ лоӧ мыждӧма, муюгыдас ыджыдалысьсӧ лоӧ вӧтлӧма.

³² Му вылысь Менӧ кыпӧдӧм бӧрын Ме ставнысӧ Ас дінӧ сибӧда».

³³ Тайӧ висьталӧмнас Сійӧ гӧгӧрвоӧдіс, кутшӧм ногӧн Сійӧ кулас.

³⁴ Йӧзыс шуисны Сылы: «Ми тӧдам Индӧдысь, мый Кристос помтӧг олӧ. Сідзкӧ, мыйла Тэ шуан, Морт Пиӧс пӧ кыпӧдасны? Коді сійӧ Морт Пиыс?»

³⁵ Сэки Исус шуис налы: «Этшаник кад югыдыс лоас на тіянкӧд. Сідзкӧ, ветлӧй югыдыс дырйи, медым пемыдыс эз пӧдты тіянӧс. Пемыдас ветлысь оз тӧд, кытчӧ мунӧ.

³⁶ Кытчӧдз югыдыс тіянкӧд, эскӧй югыдыслы. Сэки лоанныд югыдыслӧн ныв-пиӧн». Тайӧс висьталӧм бӧрын Исус ылыстчис на дінысь да саяліс.

Йӧзыс оз эскыны Исуслы

³⁷ Сы мында шензьӧданатор Исус вӧчис йӧзыс водзын, но найӧ эз эскыны Сылы.

³⁸ Тадзи инісны Исай пророклӧн кывъясыс: – Господьӧй, коді эскис миян висьталӧмӧ? Кодлы петкӧдчис Господьлӧн вына киыс?

³⁹ Найӧ эз вермыны эскыны, кыдзи висьтавліс на йылысь Исай:

⁴⁰ – Енмыс тупкис налысь синнысӧ, чорзьӧдіс налысь сьӧлӧмнысӧ, медым эз аддзыны синнаныс, эз гӧгӧрвоны сьӧлӧмнаныс да эз бергӧдчыны Мелань, медым Ме бурдӧді найӧс.

⁴¹ Исай шуис тайӧ кывъяссӧ, ӧд сійӧ аддзыліс Исуслысь дзирдлунсӧ да висьталіс Сы йылысь.

⁴² Юралысьяс пӧвстысь унаӧн эскисны Исуслы. Но фарисейясысь полӧмнысла найӧ эз лысьтны висьтавны та йылысь веськыда, медым эз вӧтлыны найӧс синагогаысь.

⁴³ Ӧд Енлӧн ошкӧм дорысь налы мусаджык вӧлі йӧзлӧн ошкӧмыс.

⁴⁴ Исус гораа шыасис: «Меным эскысь оз Меным эскы, а Менӧ Мӧдӧдысьлы.

⁴⁵ Менӧ аддзысь Менӧ Мӧдӧдысьӧс аддзӧ.

⁴⁶ Ме эм югыдыс. Ме локті му вылӧ, медым Меным эскысь эз коль пемыдас.

⁴⁷ Менсьым кывъясӧс кылысь кӧ оз эскы, Ме сійӧс ог мыжды. Ме ӧд локті муюгыдсӧ мездыны, а эг мыждыны.

⁴⁸ Коді оз сибӧд Менӧ да оз босьт Менсьым кывъясӧс, сылӧн эм аслас мыждысь: Менам висьталӧм кывйӧй медбӧръя лунӧ мыждас сійӧс.

⁴⁹ Ме висьталі эг Ассянь. Менӧ мӧдӧдысь Батьӧй Ачыс велӧдіс Менӧ, мый шуны-юӧртны.

⁵⁰ Ме тӧда, мый Сылӧн тшӧктӧмыс вайӧ помтӧм олӧм. Сідзкӧ, Менам висьталӧмӧй – Батьлӧн шуӧм серти висьталӧм».