Индӧд 9 - Коми Библия 2023

Кӧсйысьӧм му

¹ «Кывзы, Израиль! Ӧні ті вуджанныд Йӧрдан ю сайӧ, медым босьтны мусӧ войтыръяслысь, кодъяс тіян дорысь вынаӧсь да уна лыдаӧсь, кодъяслӧн ыджыд каръясыс сулалӧны зумыда да зурасьӧны енэжӧдз.

² Сэні олӧ енак войтыр, найӧ ыджыд тушааӧсь, уна лыдаӧсь да ёнӧсь. Ті ӧд кывлінныд, мый йӧзыс шуалӧны на йылысь, енак войтырлы паныд пӧ некод оз вермы сувтны.

³ Талун ті тӧдмаланныд, мый Господь, тіян Енныд, мунӧ тіян водзвылын, кыдзи ставсӧ сотысь би. Сійӧ пасьвартас енак войтырӧс да сетас тіян киӧ. Ті босьтанныд налысь мусӧ да регыдъя кадӧн бырӧданныд найӧс. Тадзи висьталіс тіянлы Господь.

⁴ Кор Господь, тіян Енныд, вӧтлас найӧс тіян водзысь, энӧ мӧвпалӧй, мый тіян веськыдлунныд вӧсна Господь вайӧдіс тіянӧс татчӧ, медым ті босьтінныд тайӧ [бур] мусӧ. Ӧд тайӧ войтыръяслӧн пеж олӧм вӧсна Господь вӧтлӧ найӧс тіян водзысь.

⁵ Ті мунанныд босьтны налысь мусӧ онӧ асланыд веськыдлун вӧсна да сӧстӧм сьӧлӧмныд вӧсна, но Господь, тіян Енныд, вӧтлӧ найӧс тіян водзысь налӧн пеж олӧм вӧсна. Тадзи Господь збыльмӧдӧ Ӧвраамлы, Исааклы да Яковлы, тіян батьяслы, сетӧм кывсӧ.

⁶ [Ӧні] тӧдӧй, мый Господь, тіян Енныд, оз тіян веськыдлун вӧсна сет тайӧ бур мусӧ, ӧд ті асныра войтыр».

Кывзысьтӧм войтыр

⁷ «Энӧ вунӧдӧй, кыдзи овтӧминын ті скӧрмӧдлінныд Господьӧс, ассьыныд Ентӧ. Египет муысь петан лунсянь да татчӧ вотӧдз ті пыр пыксинныд Господьлы.

⁸ Хорив керӧс дорын ті скӧрмӧдінныд Господьӧс. Господь сэтшӧма скӧрмис тіян вылӧ, мый кӧсйис дзикӧдз бырӧдны тіянӧс.

⁹ Ме кайи керӧс вылӧ, медым босьтны Господь да тіян костын кӧрталӧм йитӧдлысь изпӧвъяс. Керӧс вылын ме вӧлі нелямын лун да нелямын вой, нянь эг сёйлы ни ва эг юлы.

¹⁰ Господь сетіс меным кык изпӧв, кытчӧ Аслас киӧн Сійӧ вӧлі гижӧма ставсӧ, мый висьтавліс нин тіянлы керӧсвывса би пытшсянь тіян ӧтлаын чукӧртчигӧн.

¹¹ Нелямын лун да нелямын вой кольӧм бӧрын Господь сетіс меным йитӧдлысь изпӧвъяс.

¹² Господь шуис меным: ”Лэччы татысь ӧдйӧджык, ӧд тэнад войтырыд, кодӧс тэ петкӧдін Египетысь, сетчис пежас. Найӧ ӧдйӧ кежисны Менам туйысь, вунӧдісны Менсьым тшӧктӧмъясӧс. Найӧ вӧчисны аслыныс бӧлбанӧс”.

¹³ Господь нӧшта шуис: ”[Ме унаысь шулі тэныд:] Ме аддза, кутшӧм асныра тайӧ войтырыс.

¹⁴ Эн кут Менӧ найӧс бырӧдӧмысь. Ме вушта енэж улысь налысь нимсӧ. А тэсянь сета чужны на дорысь ыджыд да вына войтырлы”.

¹⁵ Ме бергӧдчи да лэччи керӧс вылысь. Керӧсыс ыпъяліс-ӧзъяліс биӧн, кор ме лэччи йитӧдлысь кык изпӧвсӧ киын кутӧмӧн.

¹⁶ Ме аддзи тіянлысь сывдӧм бӧлбан-ӧшкӧс. Сійӧс вӧчӧмнаныд ті асланыд Господь Енлы паныд мыж вӧчинныд. Ті ӧдйӧ кежинныд Господьлӧн туйысь, вунӧдінныд Сылысь тшӧктӧмъяссӧ.

¹⁷ Сэки ме шыбиті кисьым кыкнан изпӧвсӧ, и найӧ пасьмунісны-жугалісны тіян син водзын.

¹⁸ Сэсся ме [мӧдысь] кымынь уськӧдчи Господь водзӧ. Нелямын лун да нелямын вой, кыдзи и водзынсӧ, нянь эг сёйлы ни ва эг юлы тіян мыжныд вӧсна. Ті вӧчинныд Господь [асланыд Ен] водзын шогмытӧмсӧ, тадзи скӧрмӧдінныд Господьӧс.

¹⁹ Ме полі Господьлӧн скӧрмӧмысь, ӧд Сійӧ вӧлі сэтшӧм скӧр, мый дась вӧлі бырӧдны тіянӧс. Но и та пӧрйӧ Сійӧ кывзіс менӧ.

²⁰ Господь ёна скӧрмис Аарон вылӧ, кӧсйис бырӧдны сійӧс, но ме кевмыси тшӧтш Аарон вӧсна.

²¹ Ті мыжминныд, мый вӧчинныд ӧшкӧс. Ме босьті тайӧ ӧшсӧ да соті биын, сэсся пызьӧдз ныри да койышті керӧс вывсянь визувтысь шорӧ.

²² Тшӧтш Тавераын, Массаын да Киврот-Хаттааваын ті скӧрмӧдінныд Господьӧс [ассьыныд Ентӧ].

²³ А кор Господь, тіян Енныд, мӧдӧдіс тіянӧс Кадеш-Варниысь да тшӧктіс мунны да босьтны мусӧ, мый Сійӧ сетас тіянлы, ті пыксинныд Сылӧн тшӧктӧмлы, энӧ эскӧй Сылы да энӧ кывзысьӧй Сылысь.

²⁴ Мыйта тӧда тіянӧс, ті пыр кыпӧдчинныд Господьлы паныд.

²⁵ Ме кымынь уськӧдчи Господь водзӧ да кевмыси нелямын лун да нелямын вой, ӧд Сійӧ шуис, мый бырӧдас тіянӧс.

²⁶ Ме кевмыси Господьлы: ”Господьӧй Ыджыдӧй, [енъяслӧн Ӧксы,] эн бырӧд Ассьыд войтыртӧ. Ӧд Тэ мездін найӧс Аслад ыджыд вынӧн, петкӧдін Египетысь вына кинад [да ён сойнад].

²⁷ Эн вунӧд Ассьыд Ӧвраам, Исаак да Яков кесйӧгъястӧ [кодъяслы Тэ Ачыд кыв сетін]. Эн видзӧд тайӧ войтырыслӧн асныралӧм, лёк вӧчӧм да мыж вылӧ,

²⁸ медым сійӧ муас, кытысь Тэ петкӧдін миянӧс, йӧзыс эз шуны, мый Господь эз вермы вайӧдны найӧс кӧсйысьӧм муӧ, Сійӧ мустӧмтіс найӧс, та вӧсна нуӧдіс овтӧминӧ, медым бырӧдны.

²⁹ Но ӧд тайӧ войтырыс – Тэнад войтырыд, кодӧс Тэ петкӧдін Египет муысь Аслад ыджыд выннад да Ассьыд вына китӧ лэптӧмӧн”».