Индӧд 8 - Коми Библия 2023

Энӧ вунӧдӧй Еннытӧ

¹ «Олӧй став тшӧктӧмыс серти, мый талун висьтала тіянлы. Сэки ті кутанныд овны да чужтысьны-рӧдмыны, верманныд мунны да босьтны аслыныд сійӧ [бур] мусӧ, мый йылысь Господь [Ен] кыв сетіс тіян батьяслы.

² Энӧ вунӧдӧй, кыдзи нелямын во чӧж Господь, тіян Енныд, нуӧдіс тіянӧс овтӧминӧд, медым раммӧдны тіянлысь сьӧлӧмнытӧ да тӧдмавны тіянӧс, тіянлысь сьӧлӧмпытшса мӧвпнытӧ, кутанныд-ӧ овны Сылӧн тшӧктӧмъяс серти.

³ Сійӧ раммӧдіс тіянӧс – сетіс тіянлы тшыгъявны, сэсся вердіс маннаӧн. Татшӧм сёянсӧ ті и тіян батьясныд энӧ тӧдлӧй. Тадзи Сійӧ кӧсйис петкӧдлыны тіянлы, мый оз куш няньӧн мортыд ов, а Господьсянь быд шуӧм кывйӧн.

⁴ Став тайӧ нелямын во чӧжыс тіян паськӧмныд эз важмывлы, и кокныд эз пыктавлы.

⁵ Тӧдӧй, мый Господь, тіян Енныд, велӧдӧ тіянӧс, кыдзи бать велӧдӧ писӧ.

⁶ Энӧ торкалӧй Асланыд Господь Енлысь тшӧктӧмъяссӧ, олӧй Сылысь кывзысьӧмӧн да Сыысь полӧмӧн.

⁷ Господь, тіян Енныд, вайӧдас тіянӧс бур муӧ, кӧні визувтӧны юяс, кӧні ковтыс-керӧсысь петӧны ваяс,

⁸ кӧні визувтӧ ма, кӧні быдмӧны шобді да ид, виноград да инжир, гранат да олив пуяс.

⁹ Сэні ті онӧ кутӧй овны тшыг нисьӧ пӧт, тіян ставыс лоӧ тырмана. Сэтчӧс изкыртаысь перъянныд кӧрт, керӧсъясысь – ыргӧн.

¹⁰ Кор ті пӧттӧдзныд сёянныд, ошкӧй Господьӧс, ассьыныд Ентӧ, тайӧ бур мусьыс, мый Сійӧ сетіс тіянлы.

¹¹ Видзчысьӧй, медым энӧ вунӧдӧй Господьӧс, ассьыныд Ентӧ. Олӧй Сылӧн индӧд-тшӧктӧмъяс серти, мый талун висьтала тіянлы.

¹² Кор ті пӧттӧдзныд сёянныд, кор кыпӧданныд бур керкаяс да кутанныд сэні овны,

¹³ кор тіян лоӧ уна ыж-мӧс, уна эзысь-зарни да уна овмӧс-эмбур,

¹⁴ видзчысьӧй, медым асьнытӧ вылӧ энӧ пуктӧй да энӧ вунӧдӧй Господьӧс, ассьыныд Ентӧ, ӧд Сійӧ петкӧдіс тіянӧс Египет муысь нартитӧм улысь.

¹⁵ Нуӧдіс тіянӧс ыджыд да повзьӧдана овтӧминӧд, яда змейяс да скорпионъяс пӧвстӧд, косінті да ватӧминті, петкӧдіс тіянлы изкыртаысь ва.

¹⁶ Овтӧминын Сійӧ вердіс тіянӧс маннаӧн, мый [ті энӧ тӧдлӧй и] батьясныд эз тӧдлыны. Тадзи Сійӧ раммӧдіс да тӧдмаліс тіянӧс, но бӧрынджык бурсӧ вӧчис тіянлы.

¹⁷ Энӧ мӧвпалӧй, мый ті асланыд вынӧн да ас киӧн озырлуннытӧ лӧсьӧдінныд.

¹⁸ Энӧ вунӧдӧй Господьӧс, ассьыныд Ентӧ. Сійӧ сетӧ тіянлы вын озырмыны, медым талун збыльмӧдны Ассьыс йитӧдсӧ, мый Сійӧ кыв сетӧмӧн кӧрталіс тіян батьяскӧд.

¹⁹ Ті кӧ вунӧданныд Господьӧс, ассьыныд Ентӧ да понданныд кесъявны-юрбитны мукӧд енъяслы, сэки ті быранныд. Талун [енэжыс и муыс водзын] кыв сета, мый ті быранныд.

²⁰ Онӧ кӧ кутӧй кывзысьны Господьлысь, асланыд Енлысь, ті быранныд сійӧ войтыръясыс моз, кодъясӧс Господь [Ен] бырӧдӧ тіян водзысь».