Индӧд 7 - Коми Библия 2023

Израиль – Енлӧн бӧрйӧм войтыр

¹ «Кор Господь, тіян Енныд, вайӧдас тіянӧс сійӧ муас, кытчӧ ті мунанныд сійӧс босьтӧм могысь, сэки Сійӧ вӧтлас тіян водзысь сизим войтырӧс – хеттейясӧс, гергесейясӧс, аморейясӧс, ханаансаясӧс, перезейясӧс, хивейясӧс да евуссаясӧс. Тайӧ войтыръясыс уна лыдаӧсь, тіян дорысь ёнджыкӧсь.

² Но Господь, тіян Енныд, сетас найӧс тіян киӧ, и ті пасьвартанныд найӧс. Дзикӧдз бырӧдӧй найӧс. Энӧ кӧрталӧй накӧд йитӧд, энӧ лоӧй бур сьӧлӧмаӧсь на дінӧ.

³ Энӧ рӧдвужасьӧй накӧд: ассьыныд нывъястӧ налӧн пиян сайӧ энӧ сетӧй и налысь нывъяссӧ пияныдлы гӧтырӧ энӧ босьтӧй.

⁴ Найӧ кежӧдасны пияннытӧ Господь дінысь, и пиянныд кутасны юрбитны мукӧд енъяслы. Таысь Господьлӧн скӧрлуныс ыпнитас тіян вылӧ, и Сійӧ регыдъя кадӧн бырӧдас тіянӧс.

⁵ Со мый колӧ вӧчны: жуглӧй налысь висьпуктанінъяссӧ, пасьвартӧй юрбитан изъяссӧ, кералӧй юрбитан пуяссӧ да биын сотӧй бӧлбанъяссӧ.

⁶ Ӧд ті – Господь Енлӧн вежа войтырыс. Господь, тіян Енныд, бӧрйис тіянӧс мувывса войтыръяс пӧвстысь, медым ті вӧлінныд Сылӧн войтырӧн.

⁷ Господь бӧрйис да сибӧдіс тіянӧс эз лыдныд серти, ӧд ті войтыръяс пӧвстын этшаӧнӧсь.

⁸ Господь бӧрйис тіянӧс сы вӧсна, мый радейтӧ тіянӧс да вӧчӧ тіян батьяслы кыв сетӧмыс серти. Та вӧсна Господь вына кинас [да ён сойнас] мездіс тіянӧс фараонлӧн, египетса ӧксылӧн, нартитӧм улысь.

⁹ Тӧдӧй, мый Господь, тіян Енныд, эм Ен. Сійӧ эскана Ен. Сійӧ видзӧ [Ассьыс] йитӧдсӧ сюрс чужанвужйӧдз. Сійӧ оз босьт Ассьыс буралӧмсӧ на дінысь, кодъяс радейтӧны Сійӧс да олӧны Сылӧн тшӧктӧмъяс серти.

¹⁰ Но Сійӧ мынтысьӧ налы, кодъяс Сійӧс мустӧмтӧны, да тэрмасьӧ бырӧдны найӧс.

¹¹ Олӧй Сылӧн индӧд-тшӧктӧмъяс серти, мый талун висьтала тіянлы.

¹² Ті кӧ кутанныд кывзысьны да овны тайӧ тшӧктӧмъясыс серти, сэки Господь, тіян Енныд, тіянкӧд кӧрталӧм йитӧдсӧ оз торк да оз босьт Ассьыс буралӧмсӧ, мый йылысь кыв сетіс тіян батьяслы.

¹³ Сійӧ пондас радейтны тіянӧс да бурсины тіянӧс, сетас тіянлы уна ныв-пи. Сійӧ бурсиас тіянсянь чужысьясӧс, тіянлысь мувыв быдтастӧ, няньтӧ, винатӧ, олив выйтӧ да ыж-мӧстӧ сійӧ муас, мый тіян батьяслы кыв сетӧмӧн кӧсйысис сетны тіянлы.

¹⁴ Господь бурсиас тіянӧс мукӧд войтыръяс дорысь ёнджыка. Тіян пӧвстын оз ло ныв-питӧм айловыс да сьӧктыны вермытӧм аньыс, ыж-мӧсныд пӧвстын оз ло тырсявтӧмыс.

¹⁵ Господь [тіян Енныд] ылыстас тіян дінысь висьӧмъяс, мый ті [аддзылінныд да] тӧдмалінныд Египетын. Сійӧ ыстас висьӧмъяссӧ на вылӧ, кодъяс мустӧмтӧны тіянӧс.

¹⁶ Ті бырӧданныд войтыръясӧс, кодъясӧс Господь, тіян Енныд, сетас тіян киӧ. Сьӧлӧмнаныд на дінӧ энӧ нормӧй да налӧн енъяслы энӧ юрбитӧй, медым энӧ шедӧй налькйӧ.

¹⁷ Гашкӧ, ті чайтанныд, мый тайӧ войтыръясыс сэтшӧм уна лыдаӧсь, мый ті онӧ вермӧй босьтны налысь мусӧ?

¹⁸ Энӧ полӧй наысь! Энӧ вунӧдӧй, мый вӧчис Господь, тіян Енныд, фараонлы да став Египетлы.

¹⁹ Тайӧ чорыда мыждӧмсӧ, [ыджыд] индысьпасъяссӧ да шензьӧданаторъяссӧ ті асланыд синмӧн аддзылінныд. Энӧ вунӧдӧй, кыдзи Господь, тіян Енныд, петкӧдіс тіянӧс Египетысь Ассьыс вына кисӧ да ён сойсӧ лэптӧмӧн. Войтыръяслы, кодъясысь ті поланныд, Господь, тіян Енныд, вӧчас сійӧ жӧ, мый вӧчис египетсаяслы.

²⁰ Господь, тіян Енныд, мӧдӧдас на вылӧ гырысь зіясӧс, кытчӧдз оз кувны медбӧръя йӧзыс, кодъяс дзебсьӧны тіянысь.

²¹ Энӧ полӧй наысь, ӧд тіянкӧд Господь, тіян Енныд. Сійӧ ыджыд да повзьӧдана Ен.

²² Господь, тіян Енныд, кутас вочасӧн вӧтлыны тіян водзысь войтыръясӧс. Ті онӧ вермӧй бырӧдны найӧс регыдъя кадӧн, медым [муыс эз овтӧммы, и] звер лыдыс эз сод.

²³ Господь, тіян Енныд, сетас войтыръясӧс тіян киӧ, вайӧдас найӧс ыджыд шызьӧмӧдз, мый вӧсна найӧ бырасны.

²⁴ Налысь ӧксыяссӧ Господь сетас тіян киӧ, и ті вуштыштанныд налысь нимъяссӧ енэж улысь. Некод оз вермы паныд сувтны, ті ставнысӧ бырӧданныд.

²⁵ Сотӧй налысь бӧлбанъяссӧ да энӧ ыштӧй тайӧ бӧлбанъяссӧ эжӧм зарни-эзысь вылӧ. Нинӧм энӧ босьтӧй аслыныд, медым энӧ шедӧй налькйӧ, ӧд тайӧ Господьлы, тіян Енлы, зывӧк.

²⁶ Зывӧкторсӧ энӧ пыртӧй асланыд керкаясӧ, медым зывӧкторсӧ моз тіянӧс эз бырӧдны. Мустӧмтӧй-зывӧктӧй идолъясӧс, найӧс колӧ дзикӧдз бырӧдны».