Индӧд 5 - Коми Библия 2023

Дас тшӧктӧм

¹ Мӧисей чукӧртіс став Израиль войтырсӧ да шуис: «Кывзы, Израиль! Талун ме висьтала тіянлы индӧд-тшӧктӧмъяс. Велӧдӧй найӧс да олӧй на серти.

² Господь, миян Енным, кӧрталіс миянкӧд йитӧд Хорив керӧсын.

³ Эз миян батьяскӧд кӧртав тайӧ йитӧдсӧ Господь, а миянкӧд, кодъяс ӧні танӧсь.

⁴ Господь сёрнитіс тіянкӧд воча чужӧмӧн керӧсвывса би пытшсянь.

⁵ Сэки ме сулалі Господь да тіян костын, медым Сылысь кывъяссӧ висьтавны тіянлы. Ті полінныд биысь да керӧс вылӧ энӧ кыпӧдчӧй. Господь шуис:

⁶ ”Ме – Господь, тэнад Енмыд. Ме петкӧді тэнӧ Египет муысь нартитӧм улысь.

⁷ Эн юрбит мукӧд енъяслы Меысь ӧтдор.

⁸ Эн вӧч аслыд бӧлбанӧс да идолӧ пуктӧм могысь эн серпасав сійӧс, мый эм енэжас, му вылас да муысь улынджык ваас.

⁹ Эн копрась да эн юрбит налы, ӧд Ме, Господь, тэнад Ен – вежӧгтысь Ен. Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз.

¹⁰ А налы, кодъяс радейтӧны Менӧ да олӧны Менам тшӧктӧмъяс серти, Ме петкӧдла Ассьым буралӧмӧс сюрс чужанвужйӧдз.

¹¹ Аслад Господь Енлысь нимсӧ весьшӧрӧ эн шуав, ӧд Господь оз коль мыждытӧг сійӧс, коді весьшӧрӧ шуалӧ Сылысь нимсӧ.

¹² Видз шойччан лунтӧ. Сійӧ мед лоас тэныд вежа, кыдзи Господь, тэнад Енмыд, тшӧктіс тэныд.

¹³ Квайт лун уджав, вӧч ассьыд уджъястӧ,

¹⁴ а сизимӧд луныс шойччан лун, торйӧд сійӧс Господьлы, аслад Енлы. Тайӧ лунӧ тэ, тэнад ныв-пиыд, кесйӧгыд, кесйӧг аньыд, тэнад ӧшкыд, осёлыд, став ыж-мӧскыд да йӧз муысь локтысьыд, коді олӧ тэ ордын, некутшӧм удж энӧ вӧчӧй. Тэнад кесйӧгыд, кесйӧг аньыд [да осёлыд] мед тэ моз шойччасны.

¹⁵ Эн вунӧд, мый Египетын тэ ачыд вӧлін кесйӧг туйын, но Господь, тэнад Енмыд, петкӧдіс тэнӧ сэтысь Ассьыс вына кисӧ да ён сойсӧ лэптӧмӧн. Та вӧсна Господь, тэнад Енмыд, тшӧктіс видзны шойччан лунсӧ [мед сійӧ лоас тэныд вежа].

¹⁶ Пыдди пукты ассьыд бать-мамтӧ, кыдзи тшӧктіс тэныд Господь, тэнад Енмыд, медым олӧмыд вӧлі кузь нэма да тэныд вӧлі бур сійӧ муас, мый Господь, тэнад Енмыд, сетас тэныд.

¹⁷ Эн ви.

¹⁸ Гозъякост олӧм эн пежав.

¹⁹ Эн гусясь.

²⁰ Матыссаыд йылысь ылӧгсӧ эн висьтав.

²¹ Эн ышты матыссаыдлӧн гӧтырыс вылӧ, керкаыс да муыс вылӧ, кесйӧгыс да кесйӧг аньыс вылӧ, ӧшкыс да осёлыс вылӧ [сылӧн ыж-мӧскыс вылӧ]. Эн ышты нинӧм вылӧ, мый сылӧн эм”.

²² Тайӧ кывъяссӧ Господь гораа висьталіс тіянлы ставныдлы керӧс вывсянь, би да сьӧд кымӧр [да бушков] пытшсянь. Сэсся та дінӧ нинӧм эз содты. Тайӧ кывъяссӧ Сійӧ гижис кык изпӧв вылӧ да сетіс меным.

²³ Кор керӧсыс ыпъяліс биӧн, и ті кылінныд пемыд пытшкысь гӧлӧс шы, сэки тіян юрнуӧдысьясныд да чужанкотыръяслӧн юралысьясныд матыстчисны ме дінӧ

²⁴ да шуисны: ”Господь, миян Енным, петкӧдліс миянлы Ассьыс дзирдлунсӧ да ыджыд вынсӧ. Ми кылім Сылысь гӧлӧс шысӧ би пытшсянь. Талун ми тӧдмалім, мый Енмыс сёрнитӧ морткӧд, и мортыс ловйӧн кольӧ.

²⁵ А ӧні мыйла миянлы кувнысӧ? Ӧд тайӧ ыджыд биыс сотас-ньылыштас миянӧс. Ми кулам, нӧшта кӧ ӧтчыдысь кылам миян Господь Енлысь гӧлӧс шысӧ.

²⁶ Кывліс-ӧ кодкӧ миян моз би пытшсянь сёрнитысь ловъя Енлысь гӧлӧс шысӧ, и ловйӧн колис?

²⁷ Тэ мун да кывзы, мый шуас тэныд Господь, миян Енным, сэсся висьтав миянлы, мый йылысь Сійӧ висьталас тэныд. Ми кутам кывзыны да Сылӧн тшӧктӧм-шуӧм серти овны”.

²⁸ Господь кыліс тіянлысь кывъястӧ, кор ті сёрнитінныд мекӧд. Сійӧ шуис меным: ”Ме кылі тайӧ войтырыслысь кывъяссӧ. Ставсӧ, мый найӧ тэныд шуисны, бур.

²⁹ Найӧ кӧ став олан лунъяс чӧжыс сьӧлӧмсяньныс кывзысисны Менсьым да олісны став Менам тшӧктӧм серти, сэки эськӧ налы да насянь чужысьяслы нэмъяс чӧж вӧлі бур.

³⁰ Мун висьтав налы, мед бӧр бергӧдчасны асланыс чомъясӧ.

³¹ А тэ кольччы татчӧ Мекӧд. Ме висьтала тэныд став индӧд-тшӧктӧмсӧ, мыйӧ тэ сэсся велӧдан найӧс. Мед на серти оласны сійӧ муас, мый Ме сета налы”.

³² Видзчысьӧй, ставсӧ вӧчӧй сідзи, кыдзи тшӧктӧ Господь, тіян Енныд. Энӧ кежӧй веськыдвылӧ ни шуйгавылӧ.

³³ Олӧй сідзи, кыдзи тшӧктӧ Господь, тіян Енныд, медым тіянлы вӧлі бур и ті дыр олінныд сійӧ муас, мый босьтанныд аслыныд».