Индӧд 33 - Коми Библия 2023

Мӧисей бурсиӧ Израильлысь чужанкотыръяс

¹ Со тайӧ бурсиӧмнас Мӧисей, Енлӧн морт, бурсиис Израиль пиянӧс кулӧм водзвылас:

² – Синай керӧссянь Господь лэччис, Сеир керӧсвыв му весьтын шонді моз петіс, Паран керӧс вылын петкӧдчис. Сійӧ локтіс лыдтӧм-тшӧттӧм вежаяскӧд, Сылӧн веськыдвылас ыпъяліс-ӧзъяліс би.

³ Збыльысь Сійӧ радейтӧ Ассьыс войтырсӧ, став вежа войтырыс Сылӧн киын. Сылӧн кок дорын найӧ велӧдчӧны Сылӧн кывъясӧ.

⁴ Мӧисей сетіс миянлы Индӧд, козьналіс сійӧс Яков котырлы.

⁵ Кор юралысьяс да Израильлӧн чужанкотыръяс чукӧртчисны, Ешурунлы ыджыдӧ пуксис ӧксы.

⁶ Мед олас Рувим чужанкотыр, мед оз кувны Рувимсянь чужысьяс, [Симеон] чужанкотырыс мед уна лыда лоӧ.

⁷ Иуда чужанкотыр йылысь Мӧисей шуис: – Господьӧй, кыв Иудалысь гӧлӧс шысӧ, бӧр вайӧд сійӧс аслас войтырыс дінӧ. Аслас киӧн сійӧ дорйысьӧ, Тэ отсав сылы вӧрӧгыскӧд вермасигас.

⁸ Левий чужанкотыр йылысь Мӧисей шуис: – Туммимтӧ да уримтӧ Тэ сетін Аслад эскана кесъялысьлы, Тэ тӧдмалін сійӧс Массаын, вензин сыкӧд Мерива ва петанін дорын.

⁹ Сійӧ шуис, мый оз тӧд бать-мамсӧ, вокъяссӧ ӧтдортіс, пиянсӧ оз тӧд, ӧд кутчысьӧ Тэнад кывъясӧ, видзӧ Тэнсьыд йитӧдтӧ.

¹⁰ Яковӧс велӧдӧ Тэнад тшӧктӧмъясӧ, Израильӧс – Тэнад Индӧдӧ. Тэ водзын тшынӧдӧ чӧскыд ӧвтантор, висьпуктанін вылын сотӧ Тэныд висьяс.

¹¹ Господьӧй, бурси сійӧс, сет сылы вын, сылӧн уджъясыс мед шогмасны Тэныд. Сылы паныд кыпӧдчысьясӧс жугӧд, сійӧс мустӧмтысьясӧс пасьварт, медым некор оз сувтны.

¹² Венямин чужанкотыр йылысь Мӧисей шуис: – Господьлӧн мусаыс олӧ повтӧг, Господь видзӧ сійӧс быд лун, Аслас морӧс бердас сійӧс шойччӧдӧ.

¹³ Ӧсип рӧд йылысь Мӧисей шуис: – Господь мед бурсиас сылысь мусӧ енэжвывса медбур козинъясӧн, лысваӧн да мупытшса ваӧн,

¹⁴ медбурнас, мый шонді югӧр улын быдмӧ, мый быд тӧлысьӧ петӧ-быдмӧ,

¹⁵ медбурнас, мый кисьмӧ важ керӧсъяс вылын, сӧвмӧ нэмӧвӧйся ыбъяс вылын,

¹⁶ мулӧн медбур сетӧмторъяснас да ставнас, мый сэні эм. Сійӧ, коді петкӧдчис ӧзъялысь лежнӧгын, мед бурсиас Ӧсипӧс, вокъяс пӧвстысь бӧрйӧмаӧс.

¹⁷ Ӧсиплӧн выныс медводдза чужысь ӧшлӧн кодь, сылӧн сюръясыс вӧлявывса ӧшлӧн кодьӧсь, наӧн люкалӧ войтыръясӧс, вӧтлӧ найӧс му помӧдзыс. Татшӧмӧсь Ефрем чужанкотырлӧн лыдтӧм-тшӧттӧм йӧзыс, Манассей чужанкотырлӧн уна сюрс йӧзыс.

¹⁸ Завулон чужанкотыр йылысь Мӧисей шуис: – Нимкодясь, Завулон, аслад ветлан-мунан туйясыд вылын, нимкодясь, Иссакар, аслад чомъясын.

¹⁹ Найӧ чукӧстӧны войтыръясӧс керӧс вылӧ, сэні вайӧны колана висьяс. Найӧ олӧны саридзса озырлун помысь, чукӧртӧны лыаӧ дзебӧмасӧ.

²⁰ Гад чужанкотыр йылысь Мӧисей шуис: – Ошкӧм Сылы, коді Гадлысь мусӧ паськӧдӧ! Гад олӧ лев моз, чашйӧ вӧрӧглысь сойсӧ да юрсӧ.

²¹ Аслыс сійӧ бӧрйис медбур му, сылы сетӧма юралысьлысь пай. Войтырлӧн юралысьяскӧд сійӧ локтіс, Господьлӧн веськыд кӧсйӧм серти вӧчис, Господьлысь веськыда мыждӧмсӧ Израильын збыльмӧдіс.

²² Дан чужанкотыр йылысь Мӧисей шуис: – Дан – том лев, Васан ыб вывсянь чеччыштӧ.

²³ Неффалим чужанкотыр йылысь Мӧисей шуис: – Неффалимлы унасьыс-уна бурыс вичмӧ, Господь озыра бурсиӧ сійӧс, рытыввыв да лунвыв му сійӧ босьтӧ аслыс.

²⁴ Асир чужанкотыр йылысь Мӧисей шуис: – Бурсиӧма Асирӧс аслас вокъясысь ёнджыка. Вокъясыс мед радейтӧны сійӧс, сылӧн олив пуясыс мед уна выя лоасны.

²⁵ Кӧртысь да ыргӧнысь сылӧн иганыс, став олан лунъяс чӧжыс сійӧ лоӧ вына.

²⁶ Ешурунлӧн Ен кодь мӧдыс абу. Верзьӧма моз Сійӧ локтӧ енэжӧд, юралысь моз – кымӧръяс вывті, медым отсавны тэныд.

²⁷ Тэнад сайӧдчаніныд – пыр олысь Ен, Сылӧн киыс новлӧдлӧ тэнӧ. Сійӧ вӧтлас тэ водзысь вӧрӧгтӧ, тшӧктас бырӧдны сійӧс.

²⁸ Израиль повтӧг олӧ, Яковсянь чужысьяс лӧня олӧны сійӧ муас, кӧні быдмӧ уна нянь да визувтӧ вина, кытчӧ енэжсянь лысва лэччӧ.

²⁹ Израиль, тэ шуда, тэ кодь мӧд войтырыс абу, тэ – Господьӧн мездӧм войтыр. Сійӧ – сайӧдыс, мый видзӧ тэнӧ, шыпуртыс, мый тышын вермӧ. Вӧрӧгыд кутас леститчыны тэ водзын, а тэ кокнад сы вылӧ тувччан.