Индӧд 31 - Коми Библия 2023

Мӧисейлӧн бӧръя кывъяс

¹ Мӧисей муніс да висьталіс тайӧ кывъяссӧ Израиль войтырлы:

² «Меным сё кызь арӧс. Ме ог нин вермы водзӧ нуӧдны тіянӧс. Господь шуис, мый ме Йӧрдан ю сайӧ ог вудж.

³ Господь, тіян Енныд, Ачыс мунас тіян водзвылын. Сійӧ бырӧдас войтыръясӧс тіян водзысь, и ті босьтанныд налысь мусӧ. Тіянӧс нуӧдас Исус, кыдзи висьтавліс Господь.

⁴ И тайӧ войтыръясыслы Господь вӧчас сійӧ жӧ, мый вӧчис Сигонлы да Оглы, [Йӧрдан ю таладорын олысь] аморейяслӧн ӧксыяслы, кор бырӧдіс найӧс да налысь мусӧ.

⁵ Господь сетас найӧс тіян киӧ. Вӧчӧй налы, кыдзи ме тшӧкті тіянлы.

⁶ Лоӧй зумыдӧсь да повтӧмӧсь! Энӧ полӧй наысь, ӧд Господь, тіян Енныд, Ачыс мунас тіянкӧд. Сійӧ оз коль да оз эновт тіянӧс».

⁷ Мӧисей корис Исусӧс да став Израиль войтыр водзын шуис сылы: «Ло зумыд да повтӧм! Тэ нуӧдан тайӧ войтырсӧ сійӧ муас, мый Господь кыв сетӧмӧн кӧсйысис сетны налӧн батьяслы, да юклан сійӧс налы.

⁸ Господь Ачыс мунас тэ водзвылын. Сійӧ лоас тэкӧд, оз эновт тэнӧ да оз коль тэнӧ. Эн пов да эн тірав!»

⁹ Мӧисей гижис да сетіс тайӧ Индӧдсӧ Израиль войтырлӧн юрнуӧдысьяслы да попъяслы, Левий пиянлы, кодъяс новлӧдлісны Господьлысь Йитӧд кудсӧ.

¹⁰ Мӧисей тшӧктіс налы: «Быд сизимӧд воӧ, уджйӧз киритан воӧ, Чом вӧчан лунъяс пасйигӧн,

¹¹ кор став Израиль войтырыс локтас Господь Енныд водзӧ сійӧ местаас, мый бӧръяс Господь, сэки гораа лыддьӧй тайӧ Индӧдсӧ налы.

¹² Чукӧртӧй войтырнытӧ: айуловӧс да аньясӧс, ныв-пинытӧ да тіян каръясын олысь йӧз муысь локтысьясӧс, мед найӧ кывзасны да велӧдчасны повны Господьысь, тіян Енмысь, да овны тайӧ Индӧдыслӧн кывъясыс серти.

¹³ Тадзи водзӧ чужысьяс, кодъяс оз тӧдны Индӧдсӧ, кывзасны да велӧдчасны повны Господьысь, тіян Енмысь, став олан лунъяс чӧжныс сійӧ муас, кытчӧ ті ӧні вуджанныд Йӧрдан ю сайӧ, медым босьтны сійӧс аслыныд».

¹⁴ Господь шуис Мӧисейлы: «Регыд тэ кулан. Чукӧст Исусӧс, сэсся сувтӧй сыкӧд вежа чом [пыранін] дорӧ. Сэні Ме сета сылы тшӧктӧмъяс». Мӧисей Исускӧд локтісны да сувтісны вежа чом [пыранін] дорӧ.

¹⁵ Господь локтіс вежа чом пыранін дорӧ кымӧр сюръя пытшкын.

¹⁶ Господь шуис Мӧисейлы: «Регыд тэ вуджан батьясыд дінӧ. А тайӧ войтырыс эновтас Менӧ сійӧ муас, кытчӧ пырас. Кырсалысь ань моз найӧ сетчасны мукӧд енъяслы да торкасны йитӧдӧс, мый Ме кӧрталі накӧд.

¹⁷ Сійӧ лунӧ Ме скӧрма на вылӧ да эновта найӧс. Ме тупка Ассьым чужӧмбанӧс наысь, и уна шог да сьӧкыдлун суас найӧс. Сійӧ лунӧ найӧ шуасны, мый шогъясыс суисны найӧс сы вӧсна, мый [Господь] налӧн Енныс абу накӧд.

¹⁸ Ме тупка наысь Ассьым чужӧмбанӧс налӧн мыж вӧчӧм вӧсна, ӧд найӧ бергӧдчисны мукӧд енъяслань.

¹⁹ Сідзкӧ, гижӧй аслыныд тайӧ сьыланкывсӧ да велӧдӧй сьывны Израиль пиянӧс. Тайӧ сьыланкывйыс серти Ме мыжда найӧс, найӧ кӧ оз кывзысьны Менсьым.

²⁰ Ме вайӧда найӧс [бур] муӧ, мый йылысь кыв сеті налӧн батьяслы, муӧ, кӧні визувтӧ йӧв да ма. Сэні найӧ кутасны пӧттӧдзныс сёйны да тшӧгасны. Та бӧрын найӧ бергӧдчасны мукӧд енъяслань да кутасны юрбитны налы. А Менӧ найӧ эновтасны да торкасны йитӧдӧс, мый Ме кӧрталі накӧд.

²¹ Кор Израиль войтырӧс суасны шогъяс да сьӧкыдлунъяс, сэки тайӧ сьыланкывйыс петкӧдлас, мый найӧ мыжаӧсь. [Найӧ да] насянь чужысьяс мед оз вунӧдны тайӧ сьыланкывсӧ. Ме тӧда Израиль войтырлысь мӧвпъяссӧ, кӧть Ме эг на вайӧд найӧс сійӧ [бур] муас, мый йылысь кыв сеті [налӧн батьяслы]».

²² Сійӧ лунӧ Мӧисей гижис сьыланкывсӧ да велӧдіс сьывны Израиль пиянӧс.

²³ Господь тшӧктіс Навлӧн Исус пилы: «Ло зумыд да повтӧм, ӧд тэныд ковмас нуӧдны Израиль пиянӧс сійӧ муас, мый йылысь Ме кыв сеті налы. Ме лоа тэкӧд».

²⁴ Мӧисей гижис тайӧ Индӧдсӧ ставнас небӧгӧ,

²⁵ сэсся Господьлысь Йитӧд куд новлӧдлысь левитъяслы тшӧктіс:

²⁶ «Босьтӧй тайӧ Индӧд небӧгсӧ да пуктӧй сійӧс асланыд Господь Енлӧн Йитӧд кудкӧд орччӧн, медым Индӧдыс серти тіянӧс лыддьыны мыжаӧн.

²⁷ Ме тӧда тіянлысь асныралӧмнытӧ да паныд кыпӧдчӧмнытӧ. Весиг ӧні, кор ме ловъя на, ті онӧ кывзысьӧй Господьлысь. А мый лоӧ менам кулӧм бӧрын?

²⁸ Чукӧртӧй ме дінӧ чужанкотыръяслысь юрнуӧдысьясӧс [ёрдысьясӧс] да веськӧдлысьясӧс. Енэжыс да муыс водзын ме висьтала налы тайӧ кывъяссӧ.

²⁹ Ме тӧда, мый менам кулӧм бӧрын ті сетчанныд лёкас, кежанныд туйсьыс, кытчӧ ме веськӧді тіянӧс. Локтана кадӧ тіянӧс суасны шогъяс, ӧд ті кутанныд вӧчны Господь [Ен] водзын шогмытӧмсӧ. Асланыд уджъясӧн ті дӧзмӧданныд Господьӧс».

Мӧисейлӧн сьыланкыв

³⁰ Став Израиль войтыр чукӧртчис кывзыны Мӧисейӧс. И Мӧисей сьыліс налы водзысяньыс помӧдзыс тайӧ сьыланкывсӧ.