Индӧд 3 - Коми Библия 2023

Ог ӧксыӧс вермӧм

¹ «Ми кежим Васан муӧ нуӧдысь туй вылӧ. Эдрей кар дорын васанса Ог ӧксы аслас тышкайӧзкӧд петіс тышӧ миянлы паныд.

² Господь шуис меным: ”Эн пов сыысь. Тэнад киӧ Ме сета сійӧс, сылысь войтырсӧ да мусӧ. Пасьварт сійӧс, кыдзи тэ пасьвартін аморей войтырлысь Сигон ӧксысӧ, коді юраліс Хешбонын”.

³ Господь, миян Енным, сетіс миян киӧ тшӧтш васанса Ог ӧксыӧс да сылысь тышкайӧзсӧ. Ми пасьвартім найӧс, некод ловйӧн эз коль.

⁴ Сійӧ кадас ми босьтім сылысь став карсӧ. Ог ӧксылӧн Аргов муысь став квайтымыннан васанса карыс лоины миян.

⁵ Тайӧ изкаръяссӧ кытшалісны джуджыд стенъяс, сэні вӧліны таса-игана дзиръяяс. Ми босьтім тшӧтш уна сикт.

⁶ Ми дзикӧдз бырӧдім налысь каръяссӧ, айуловӧс, аньясӧс да челядьӧс, кыдзи вӧчим хешбонса Сигон ӧксылы.

⁷ А став ыж-мӧссӧ да каръясысь эмбур-кӧлуйсӧ ми босьтім аслыным.

⁸ Сійӧ кадас ми босьтім аморейяслӧн кык ӧксылысь мусӧ Йӧрдан ю таладорысь, Арнон юсянь Ермон керӧсӧдз.

⁹ Сидонсаяс Ермонсӧ шуӧны Сирионӧн, а аморейяс – Сенирӧн.

¹⁰ Галаад да Васан муясысь ми босьтім вывтасінса став карсӧ Салка да Эдрей каръясӧдз, кодъяс вӧліны Ог ӧксылӧн каръяс Васанын.

¹¹ Васанса Ог ӧксы вӧлі рефа войтырысь медбӧръя морт. Сылӧн кӧртысь вӧчӧм гортйыс куйлӧ аммон войтырлӧн Равва карын. Сылӧн гортйыс ӧкмыс гырддза кузьта, нёль гырддза пасьта».

Йӧрдан ю асыввылысь му юклӧм

¹² «Сэки ми босьтім Арнон ю бокын сулалысь Ароэр карсянь войвылӧ паськӧдчӧм му. Тайӧ мусӧ да Галаад керӧсвыв му джынсӧ сэтчӧс каръяснас ме сеті Рувим да Гад чужанкотыръяслы.

¹³ Галаад мулысь мӧд джынсӧ да Васан му – Ог ӧксылысь Аргов мусӧ – ме сеті Манассейлӧн джын чужанкотырлы. Васан мусӧ шулісны тшӧтш рефа войтырлӧн муӧн.

¹⁴ Манассей чужанкотырысь Яир босьтіс Аргов му Гешур да Маака муяс дорӧдз да сетіс Васан мулы ассьыс нимсӧ. Ӧнӧдз сэтчӧс сиктъяссӧ шуӧны Яирлӧн сиктъясӧн.

¹⁵ Макирлы ме сеті Галаад му,

¹⁶ а Рувим да Гад чужанкотыръяслы сеті мусӧ Галаад му бокті визувтысь Явок юсянь Арнон юӧдз. Асыввылын налӧн муыс паськӧдчӧ аммон войтырлӧн муӧдз.

¹⁷ Нӧшта налы сеті Йӧрдан ковтыс асывладорсӧ Киннерет тысянь Сола саридзӧдз, асыввылын Фасга керӧсӧдз.

¹⁸ Тайӧ чужанкотыръяслы ме шуи: ”Господь, тіян Енныд, сетіс тіянлы тайӧ мусӧ. Быдӧн, коді вермӧ петны тышӧ, мед босьтас шыпуртсӧ да мунас аслас вокъяс, Израиль пиян, водзвылын.

¹⁹ Тіян гӧтыръясныд, ныв-пиныд да ыж-мӧсныд мед кольччасны тіянлы сетӧм каръясӧ. Ме тӧда, мый тіян уна ыж-мӧс.

²⁰ Кор Господь [Ен] тіянлы моз сетас вокъясныдлы лӧня овны, и найӧ босьтасны Йӧрдан сайысь мусӧ, мый Господь, тіян Енныд, сетас налы, сэки ті бӧр локтӧй сійӧ муас, мый ме сеті тіянлы”.

²¹ Сійӧ кадас ме шуи Исуслы: ”Аслад синмӧн тэ аддзылін, мый вӧчис тайӧ кык ӧксыыслы Господь, тіян Енныд. Тадзи Господь вӧчас ӧксылы быд муын, кытчӧ тэ кокнад сувтан.

²² Энӧ полӧй наысь. Господь, тіян Енныд, Ачыс тышкасьӧ тіян пыдди”».

Господь оз лэдз Мӧисейӧс кӧсйысьӧм муӧ

²³ «Сійӧ кадас ме кевмыси Господьлы:

²⁴ ”Господьӧй Ыджыдӧй! Тэ петкӧдлін меным, Аслад кесйӧглы, Ассьыд ыджыд вынтӧ, вына китӧ [да ён сойтӧ]. Эм-ӧ енэжас либӧ му вылас мӧд енмыс, коді эськӧ Тэ моз вермис вӧчны ыджыд да вына уджъяс?

²⁵ Ыджыдӧй, лэдз меным вуджны Йӧрдан ю да видзӧдлыны сэтчӧс бур мусӧ – мича керӧсвыв му да Ливан”.

²⁶ Но Господь тіян вӧсна скӧраліс ме вылӧ да эз кывзы менӧ. Сійӧ шуис: ”Тырмас! Водзӧ эн сёрнит Мекӧд та йылысь.

²⁷ Кыпӧдчы Фасга керӧс вылӧ да видзӧдлы рытыввылӧ, войвылӧ, лунвылӧ да асыввылӧ, но Йӧрдан ю сайӧ тэ он вудж.

²⁸ Туйдӧд-велӧд Исусӧс, ышӧд-ёнмӧд сійӧс, ӧд сылы ковмас нуӧдны тайӧ войтырсӧ Йӧрдан ю сайӧ да юклыны налы [став] мусӧ, мый тэ Фасга керӧс вывсянь аддзылан”.

²⁹ Та бӧрын ми сувтім ковтысӧ Бет-Пеорлы воча».