Индӧд 28 - Коми Библия 2023

Кывзысьӧм вайӧ бурсиӧм

¹ «[Йӧрдан ю сайӧ, Господьӧн, тіян Енмӧн, сетӧм муӧ вуджӧм бӧрын] ті кӧ кутанныд кывзысьны Господьлысь, асланыд Енлысь, да овны Сылӧн став тшӧктӧмыс серти, мый талун висьтала тіянлы, сэки Господь, тіян Енныд, кыпӧдас тіянӧс мувывса став мукӧд войтырысь медвылӧ.

² Став тайӧ бурсиӧмыс локтас тіян вылӧ, кутанныд кӧ кывзысьны Господьлысь, асланыд Енлысь.

³ Бурсиӧма тэнӧ карын да видз-му вылын.

⁴ Бурсиӧма тэнсьыд ныв-питӧ, мувыв быдтас-вотӧстӧ, мӧсъясыдлысь куканьяссӧ да ыжъясыдлысь баляяссӧ.

⁵ Бурсиӧма тэнсьыд нянь йӧртӧдтӧ да нянь шомӧстӧ.

⁶ Бурсиӧма тэнӧ гортад локтігӧн и гортсьыд мунігӧн.

⁷ Господь сетас тіянлы вермыны вӧрӧгнытӧ, кодъяс сувтасны тіянлы паныд. Найӧ локтасны ӧти туйӧд, а пышъясны тіянысь сизимлаӧд.

⁸ Господь бурсиас тіянӧс да тіянлысь нянь йӧртӧднытӧ. Господь, тіян Енныд, бурсиас тіянӧс быд уджын сійӧ муас, мый сетас тіянлы.

⁹ Господь [тіян Енныд] вӧчас тіянӧс Аслас вежа войтырӧн, ті кӧ кутанныд овны асланыд Господь Енлӧн тшӧктӧмъяс серти да ветлыны Сылӧн туйясӧд. Ӧд та йылысь Сійӧ кыв сетіс тіянлы [да батьясныдлы].

¹⁰ Мувывса войтыръяс аддзасны, мый ті Господьлӧн [тіян Енлӧн] войтыр, да кутасны повны тіянысь.

¹¹ Господь [тіян Енныд] быдторйын озырмӧдас тіянӧс. Тіян лоӧ уна ныв-пи, ыж-мӧс да мувыв быдтас-вотӧс сійӧ муас, мый Господь батьясныдлы кыв сетӧмӧн кӧсйысис сетны тіянлы.

¹² Господь восьтас тіянлы Ассьыс енэжвывса озырлун видзанінсӧ, медым ас кадӧ мӧдӧдны тіян му вылӧ зэр да бурсины тіянлысь став уджнытӧ. Ті верманныд уна войтырлы уджйӧзӧн сетны, но водзӧсӧн онӧ кутӧй босьтны. [Ті кутанныд ыджыдавны войтыръяс вылын, но тіян вылын найӧ оз кутны ыджыдавны.]

¹³ Господь [тіян Енныд] вӧчас тіянӧс юрӧн, а оз бӧжӧн. Тіянӧс вылӧ кыпӧдасны, а оз увтыртны, кутанныд кӧ кывзысьны Господьлысь, асланыд Енлысь, да овны Сылӧн тшӧктӧмъяс серти, мый талун висьтала тіянлы,

¹⁴ да онӧ кӧ кежӧй веськыдвылӧ ни шуйгавылӧ тайӧ тшӧктӧмъяссьыс, мый талун висьтала тіянлы. Энӧ юрбитӧй-кесъялӧй мукӧд енъяслы».

Кывзысьтӧмлун вайӧ ёрӧм

¹⁵ «Став тайӧ ёрӧмыс локтас тіян вылӧ, онӧ кӧ кутӧй кывзысьны Господьлысь, асланыд Енлысь, да овны Сылӧн став индӧд-тшӧктӧмыс серти, мый талун висьтала тіянлы.

¹⁶ Ёрӧма тэнӧ карын да видз-му вылын.

¹⁷ Ёрӧма тэнсьыд нянь йӧртӧдтӧ да нянь шомӧстӧ.

¹⁸ Ёрӧма тэнсьыд ныв-питӧ, мувыв быдтас-вотӧстӧ, мӧсъясыдлысь куканьяссӧ да ыжъясыдлысь баляяссӧ.

¹⁹ Ёрӧма тэнӧ гортад локтігӧн и гортсьыд мунігӧн.

²⁰ Господь мӧдӧдас тіян вылӧ ёрӧм, шызьӧм да шӧйӧвошӧм быдторйын, кытчӧдз тіянӧс оз ло бырӧдӧма. Ті куланныд лёк вӧчӧмныд вӧсна, ӧд эновтінныд Господьӧс.

²¹ Господь мӧдӧдас тіян вылӧ пӧрӧс висьӧм, и ті быранныд сійӧ му вывсьыс, кытчӧ ті мунанныд сійӧс босьтӧм могысь.

²² Господь мӧдӧдас тіян вылӧ вир-яй косьмӧм, биа висьӧм да кынтан висьӧм. Сійӧ мӧдӧдас кос жар, сотысь тӧвруӧн да висьӧмӧн бырӧдас тіян видз-му вылысь няньнытӧ. Став тайӧ шогыс суас тіянӧс, кытчӧдз онӧ кулӧй-бырӧй.

²³ Енэжыс юр весьтаныд лоӧ ыргӧн вевт кодь, муыс кок уланыд – кӧрт кодь.

²⁴ Зэр пыдди Господь ыстас тіян му вылӧ бус. Енэжсянь тіян вылӧ киссяс бус, [кытчӧдз Господь оз бырӧд тіянӧс, и] кытчӧдз ті онӧ кулӧй.

²⁵ Господь сетас вӧрӧгныдлы вермыны тіянӧс. Налы паныд ті мунанныд ӧти туйӧд, а пышъянныд наысь сизимлаӧд. Став войтыръяс повзясны сыысь, мый лоӧ тіянкӧд.

²⁶ Шойяснытӧ кутасны сёйны кутшъяс да зверъяс, и некод найӧс оз вӧтлав.

²⁷ Египетсаяс вылӧ моз Господь мӧдӧдас тіян вылӧ орзьӧм мыльяс, пыкӧс, лӧмӧссьӧм да лудӧм, и наысь ті онӧ бурдӧй.

²⁸ Господь синтӧммӧдас да йӧймӧдас-дурмӧдас тіянӧс.

²⁹ Луншӧрнас ті кутанныд ветлӧдлыны кималасӧн, кыдзи синтӧм ветлӧдлӧ пемыдас. Тіян нинӧм оз кут артмыны. Лунысь-лун тіянӧс кутасны увтыртны да дзескӧдны, и тіянӧс некод оз дорйы.

³⁰ Тэ кикутан, но гӧтырпуыдкӧд мӧд узяс. Лэптан керка, но сэтчӧ он овмӧдчы. Виноград пуктан, но вотӧссӧ сэтысь он босьт.

³¹ Тэнсьыд ӧштӧ син водзад начкасны, но яйсӧ он сёй. Осёлтӧ мырддясны да бӧрсӧ оз сетны. Ыжъястӧ вӧрӧгыд босьтас, но тэнӧ некод оз дорйы.

³² Ныв-пиыд шедас мукӧд войтырлӧн киӧ, и тэ нинӧм он вермы вӧчны. Найӧс лунысь-лун виччысьӧмысь синмыд чусмас.

³³ Тӧдтӧм войтыр кутас сёйны тэнсьыд мувыв быдтас-вотӧстӧ, сёяс ставсӧ, мый чукӧртін. Став олӧм чӧжныд ті лоанныд дзескӧдӧм да нартитӧм улынӧсь.

³⁴ Ставсӧ тайӧс аддзӧмысь воштанныд вежӧрнытӧ.

³⁵ Орзьӧм мыльяс петаласны пидзӧс да кокчӧр выланыд, юр пыдӧссяньныд кок чунь йылӧдзныд ті мылльӧссянныд. Татшӧм висьӧмӧн Господь дойдас тіянӧс, и ті онӧ бурдӧй.

³⁶ Тіянӧс да ӧксынытӧ, кодӧс пуктанныд юравны, Господь нуӧдас войтыр дінӧ, кодӧс ті ни тіян батьясныд онӧ тӧдӧй. Сэні ті понданныд кесъявны мукӧд енъяслы, пуысь да изйысь вӧчӧмторъяслы.

³⁷ Став войтыръяс, кодъяс пӧвстӧ Господь [Ен] вӧтлас тіянӧс, повзясны сыысь, мый лоӧ тіянкӧд. Найӧ лӧсьӧдласны тіян йылысь шусьӧгъяс, серамвыв лэптасны тіянӧс.

³⁸ Ті уна кӧдзанныд, но этша вунданныд, ӧд пуктаснытӧ сёяс саранча.

³⁹ Пуктанныд да быдтанныд виноград пуяс, но винасӧ онӧ юӧй, весиг вотӧссӧ онӧ чукӧртӧй, ӧд винограднытӧ номыр сёяс.

⁴⁰ Став му пасьтала олив пуясныд кутасны быдмыны, но выйнас ті онӧ мавтчӧй, ӧд вотӧсыс гылалас.

⁴¹ Тіян чужасны ныв-пи, но тіян ордын оз кутны овны, ӧд найӧс нуӧдасны пленӧ.

⁴² Пуяснытӧ да мувыв быдтас-вотӧснытӧ сёяс саранча.

⁴³ Йӧз муысь локтысьяс пондасны ыджыдавны тіян вылын, а ті пыр улӧджык и улӧджык усянныд.

⁴⁴ Найӧ кутасны тіянлы уджйӧзӧн сетны, а ті налы онӧ вермӧй. Найӧ лоӧны юрӧн, а ті лоанныд бӧжӧн.

⁴⁵ Став тайӧ ёрӧмыс локтас тіян вылӧ да вӧтчас тіян бӧрся, кытчӧдз оз ло бырӧдӧма тіянӧс, ӧд ті энӧ кывзысьӧй Господьлысь, асланыд Енлысь, да энӧ олӧй Сылӧн индӧд-тшӧктӧмъяс серти.

⁴⁶ Тайӧ ёрӧмыс лоӧ индысьпасӧн тіян пӧвстын да тіянсянь чужысьяс пӧвстын нэмъяс чӧж.

⁴⁷ Кор тіян ставыс вӧлі тырмана, ті энӧ кесъялӧй Господьлы, асланыд Енлы, нимкодьпырысь да гажӧдчӧмӧн.

⁴⁸ Та вӧсна ті кутанныд кесъявны Господьӧн [тіян Енмӧн] ыстӧм вӧрӧгныдлы тшыгъяліганыд да горш косьмиганыд. Ті пасьтӧг колянныд, тіян нинӧм оз ло. Господь сийӧсалас тіянӧс кӧрт сийӧсӧн, кытчӧдз оз бырӧд тіянӧс.

⁴⁹ Ылісянь, му помсянь Господь вайӧдас войтырӧс, кодлысь кывсӧ ті онӧ гӧгӧрвоӧй. Кутшъяс моз найӧ уськӧдчасны тіян вылӧ.

⁵⁰ Тайӧ яндысьтӧм войтырыс оз пыдди пукты пӧрысьясӧс да оз жалит томуловӧс.

⁵¹ Найӧ сёясны ыж-мӧснытӧ да мувыв быдтас-вотӧснытӧ, кытчӧдз оз бырӧдны тіянӧс. Найӧ оз кольны тіянлы нянь, вина ни олив вый, куканьясӧс, баляясӧс ни кӧзапиянӧс. Тадзи найӧ бырӧдасны тіянӧс.

⁵² Сійӧ муас, мый Господь, тіян Енныд, сетас тіянлы, найӧ кытшаласны тіянлысь каръяснытӧ да кисьтасны джуджыд ён стенъяснытӧ, мый вылӧ ті лачанытӧ кутанныд.

⁵³ Кор вӧрӧгныд дзескӧдас тіянӧс да кытшалас тіянлысь каръяснытӧ, ті кутанныд сёйны Господьӧн, тіян Енмӧн, тіянлы сетӧм ныв-пиныдлысь яйсӧ.

⁵⁴ Весиг небыд сьӧлӧма да лелькуйтӧм айлов кутас лӧгпырысь видзӧдны аслас вокыс вылӧ, аслас гӧтырыс вылӧ да ныв-пиыс вылӧ, кодъяс лоӧны ловъяӧсь на.

⁵⁵ Сійӧ оз сет налы кулӧм ныв-пиыслысь яйсӧ, но ачыс сёяс, ӧд мӧд сёяныс сылӧн оз ло, кор вӧрӧгныд дзескӧдас тіянӧс да кытшалас тіянлысь каръяснытӧ.

⁵⁶ Весиг небыд сьӧлӧма да лелькуйтӧм ань, коді кокнас му вылӧ эз тувччыв, кутас лӧгпырысь видзӧдны аслас верӧсыс вылӧ да ныв-пиыс вылӧ,

⁵⁷ оз сет налы кага чужтӧм бӧрся няйтсӧ да пузчужӧм кагасӧ, ӧд сійӧ тшыгъялігас кутас ачыс гусьӧн сёйны найӧс, кор вӧрӧгныд дзескӧдас тіянӧс да кытшалас тіянлысь каръяснытӧ.

⁵⁸ Онӧ кӧ кутӧй овны тайӧ Индӧдлӧн став кывъясыс серти, мый гижӧма тайӧ небӧгас, да онӧ кутӧй повны асланыд Господь Енлӧн пыдди пуктана да повзьӧдана нимысь,

⁵⁹ сэки Господь дойдас тіянӧс да тіянсянь чужысьясӧс дугдывлытӧм бырӧданторъясӧн да бурдлытӧм лёк висьӧмъясӧн.

⁶⁰ Сійӧ мӧдӧдас тіян вылӧ египетса став [лёк] висьӧмъяссӧ, мыйысь ті полінныд, и найӧ ляксясны тіян бердӧ.

⁶¹ Кытчӧдз онӧ бырӧй, Господь кутас мӧдӧдны тіян вылӧ быдсяма висьӧмсӧ да шогсӧ, [мый гижӧма и] мый весиг абу гижӧма тайӧ Индӧд небӧгас.

⁶² Ті вӧлінныд енэжвыв кодзувъяс мында, но этшаӧн колянныд, ӧд ті энӧ кывзысьӧй Господьлысь, асланыд Енлысь.

⁶³ Кыдзи Господь нимкодясис, кор вӧчис тіянлы бурсӧ да содтіс тіянӧс, сідзи жӧ Сійӧ кутас нимкодясьны, кор бырӧдас тіянӧс. Вужнаныд тіянӧс лоӧ нетшыштӧма сійӧ мусьыс, кытчӧ ті мунанныд сійӧс босьтӧм могысь.

⁶⁴ Господь [тіян Енныд] разӧдас тіянӧс мукӧд войтыръяс пӧвстӧ, му ӧтар помсянь мӧдар помӧдзыс. Сэні ті кутанныд юрбитны пуысь да изйысь вӧчӧмторъяслы, мукӧд енъяслы, кодъясӧс ті ни тіян батьясныд энӧ тӧдлӧй.

⁶⁵ Тайӧ войтыръяс пӧвстын тіянлы оз ло лӧньлуныс, оз ло кокныдлы шойччӧгыс. Господь вӧчас сідз, мый сьӧлӧмныд пондас тіравны, синныд пемдас и ловныд нюкыртчас.

⁶⁶ Кулӧмыс лоӧ матын, ті лун и вой кутанныд тіравны олӧмныд вӧсна, ӧд онӧ тӧдӧй, ловйӧн-ӧ колянныд.

⁶⁷ Сьӧлӧмныд тырас полӧмӧн сыысь, мый аддзанныд. Асывнас кутанныд шуны, ӧдйӧджык пӧ мед рытыс воас, а рытнас – ӧдйӧджык пӧ мед асылыс воас.

⁶⁸ Господь бӧр бергӧдас тіянӧс Египетӧ корабльяс вылын сійӧ туйӧдыс, мый йылысь ме шулі тіянлы, мый некор сэсся онӧ аддзылӧй сійӧс. Сэні ті ставныд, айулов и аньяс, кутанныд вӧзйыны вӧрӧглы, медым босьтас тіянӧс кесйӧг туйӧ, но некод оз ньӧб тіянӧс».