Индӧд 26 - Коми Библия 2023

Медводдза босьтӧмтор и дасӧд юкӧн

¹ «Кор ті локтанныд сійӧ муас, мый Господь, тіян Енныд, сетас тіянлы, босьтанныд сійӧс аслыныд да овмӧдчанныд сэтчӧ,

² сэки став быдтасысь чуктӧдӧй медводдза босьтӧмторнытӧ. Пукты медводдза босьтӧмтортӧ кудйӧ да мун сійӧ местаас, мый Господь, тэнад Енмыд, бӧръяс Аслас нимлы оланінӧн.

³ Матыстчы сійӧ кадас кесъялысь поп дінӧ да шу: ”Талун ме висьтася тэнад Господь Ен водзын, мый ме локті тайӧ муас, кодӧс Господь батьяснымлы кыв сетӧмӧн кӧсйысис сетны миянлы”.

⁴ Поп мед босьтас тэнад киысь кудсӧ да пуктас сійӧс тэнад Господь Енлӧн висьпуктанін водзӧ.

⁵ И тэ аслад Господь Ен водзын шу: ”Батьӧй вӧлі арамса ветлысь-мунысь. Сійӧ локтіс Египетӧ да овмӧдчис сэтчӧ этшаник йӧзкӧд. Сысянь чужис уна лыда, ыджыд да ён войтыр.

⁶ Египетсаяс нартитісны да дзескӧдісны миянӧс, тшӧктісны миянлы вӧчны сьӧкыд уджъяс.

⁷ Но ми шыасим отсӧгла Господь дінӧ, миян батьяслӧн Ен дінӧ, и Господь кыліс миянӧс. Сійӧ аддзис миянлысь шогнымӧс, мырсьӧмнымӧс да миянӧс дзескӧдӧмсӧ.

⁸ Господь петкӧдіс миянӧс Египетысь [Аслас ыджыд вынйӧрнас,] Ассьыс вына кисӧ да ён сойсӧ лэптӧмӧн, чорыда повзьӧдлӧмӧн, шензьӧданаторъяс да индысьпасъяс вӧчӧмӧн.

⁹ Сійӧ вайӧдіс миянӧс татчӧ, сетіс миянлы тайӧ мусӧ, кӧні визувтӧ йӧв да ма.

¹⁰ Со ме вайи медводдза быдтас тайӧ муысь, мый Тэ, Господьӧй, сетін меным [муысь, кӧні визувтӧ йӧв да ма]”. Сэсся вайӧмтортӧ пукты аслад Господь Ен водзӧ да копыртчы Сы водзӧ.

¹¹ Нимкодясь став бурторнас, мый сетіс тэныд да тэнад котырыдлы Господь, тэнад Енмыд. Левитъяс да йӧз муысь локтысьяс тэкӧд ӧтвылысь мед нимкодясясны.

¹² Быд коймӧд вонас торйӧд мувыв быдтассьыд дасӧд юкӧнсӧ да сет левитлы, йӧз муысь локтысьлы, батьтӧм-мамтӧмлы да дӧвалы, медым найӧ тіян кар-сиктъясын пӧттӧдзныс сёясны. Тайӧс вӧчӧм бӧрын

¹³ висьтав Господьлы, аслад Енлы: ”Ме нуи аслам керкаысь вежатор да сеті левитлы, йӧз муысь локтысьлы, батьтӧм-мамтӧмлы да дӧвалы Тэнад тшӧктӧмыд серти. Ме эг вунӧд да эг торк Тэнсьыд тшӧктӧмъястӧ.

¹⁴ Бӧрдан лунъясӧ ме эг сёй вежаторсӧ, эг инмӧдчыв сы дінӧ, кор ачым вӧлі пеж, да эг вайлы кулӧмаяслы. Ме кывзыси Господьлысь, аслам Енлысь. Вӧчи ставсӧ Тэнад тшӧктӧм серти.

¹⁵ Видзӧдлы Аслад вежа оланінсянь, енэжсяньыд, да бурси Ассьыд Израиль войтыртӧ да тайӧ мусӧ, кӧні визувтӧ йӧв да ма, мусӧ, мый Тэ сетін миянлы, кыдзи кыв сетӧмӧн кӧсйысин миян батьяслы”.

¹⁶ Талун Господь, тіян Енныд, тшӧктӧ тіянлы овны тайӧ индӧд-тшӧктӧмыс серти. Став сьӧлӧмнаныд да став олӧмнаныд кутчысьӧй наӧ.

¹⁷ Талун ті висьталінныд, мый Господь лоӧ тіян Енмӧн, мый ті кутанныд ветлыны Сылӧн туйясӧд, овны Сылӧн индӧд-тшӧктӧмъяс серти да кывзысьны Сылысь.

¹⁸ Талун Господь юӧртіс тіянлы, мый Сылӧн кӧсйысьӧм серти ті лоанныд Сылӧн войтырӧн, кутанныд кӧ овны став Сылӧн тшӧктӧмыс серти.

¹⁹ Сійӧ вӧчис войтыръясӧс, но наысь вылӧ кӧсйысис кыпӧдны тіянӧс, медым ті ошкинныд, пыдди пуктінныд да нимӧдінныд Сійӧс. Сэки ті лоанныд асланыд Господь Енлӧн вежа войтырӧн, кыдзи Сійӧ кӧсйысис».