Индӧд 25 - Коми Библия 2023

¹ Локтасны кӧ ёрд водзӧ кык вензьысь, сэні мед веськыда мыждасны. Мыжтӧмӧс мед шуасны мыжтӧмӧн, а мыжаӧс мед мыждасны.

² Мыжаӧс кӧ шуӧма нӧйтны, ёрдысь мед тшӧктас сылы водны му вылӧ. Ёрдысь водзын сылы мед кучкасны сы мындаысь, мыйта колӧ кучкыны мыж сертиыс.

³ Кучкыны позьӧ нелямынысь, но унджыкысьсӧ оз позь, медым чорыда кучкалӧмӧн воктӧ эз ло вывті ёна янӧдӧма.

⁴ Вартысь ӧшкӧс сёйӧмысь эн кут.

⁵ Ӧтувъя овмӧс нуӧдысь вокъяс пӧвстысь кӧ кулас ӧти вокыс, кодлӧн абу пиыс, сылӧн гӧтырлы бокыса морт сайӧ мунны оз позь. Сійӧс мед босьтас гӧтырӧ кулӧм мортлӧн вокыс.

⁶ Медводдза писӧ, кодӧс тайӧ гӧтырыс чужтас, мед лыддясны кулӧм воклӧн пиӧн, медым сылӧн нимыс эз быр Израиль войтыр пӧвстысь.

⁷ Но кулӧм мортлӧн вокыс кӧ оз кӧсйы босьтны дӧваӧс гӧтырӧ, дӧваыс мед локтас карса дзиръя дорӧ да шуас юрнуӧдысьяслы, мый кулӧм верӧсыслӧн вокыс оз кӧсйы босьтны сійӧс гӧтырӧ, медым видзны вокыслысь нимсӧ Израильын.

⁸ Карса юрнуӧдысьяс мед корасны сійӧ мортсӧ да сёрнитасны сыкӧд. Но мортыс кӧ шуас, мый оз босьт вокыслысь дӧвасӧ гӧтырӧ,

⁹ дӧваыс мед матыстчас сы дінӧ да юрнуӧдысьяс дырйи пӧрччӧдас сылысь ӧтар коксьыс кӧмсӧ, сьӧлыштас чужӧмас да шуас: ”Тадзи вӧчӧны [израильса] мортлы, коді оз кӧсйы нюжӧдны вокыслысь рӧдсӧ”.

¹⁰ Израильын сылысь рӧдсӧ кутасны нимтыны кӧмтӧм рӧдӧн.

¹¹ Кык айловлӧн тышкасигӧн кӧ локтас ӧтиыслӧн гӧтырыс да верӧссӧ дорйигас кутчысяс мӧд айловлӧн коквожкостас,

¹² тайӧ гӧтырыслысь керыштӧй кисӧ. Энӧ нормӧй сьӧлӧмнаныд сы дінӧ.

¹³ Тіян нопйын мед оз ло кык сикас гира, сьӧкыдджык да кокньыдджык.

¹⁴ Тіян керкаын мед оз ло кык сикас ефа доз, ыджыдджык да ичӧтджык.

¹⁵ Гираныд да ефа дозныд мед лоӧны стӧчӧсь да веськыдӧсь, медым олӧмныд вӧлі кузь нэма сійӧ муас, мый Господь, тіян Енныд, сетас тіянлы.

¹⁶ Господьлы, тіян Енлы, зывӧк быдӧн, коді тадзи ылӧдчӧ.

¹⁷ Энӧ вунӧдӧй, мый тіянлы вӧчис амалик войтыр, кор ті петінныд Египетысь.

¹⁸ Найӧ эз повны Енмысь. Ті вӧлінныд мудзӧмаӧсь да вынтӧмӧсь, но тіянӧс паныдалігӧн найӧ уськӧдчисны тіян вылӧ бӧрсяньныд да виалісны бӧрӧ кольччӧмаясӧс.

¹⁹ Та вӧсна вуштӧй енэж улысь амалик войтырлысь нимсӧ, кор Господь, тіян Енныд, сетас тіянлы лӧнь олӧм да быд боксянь видзас тіянӧс вӧрӧгъясысь сійӧ муас, мый Господь, тіян Енныд, сетас тіянлы. Энӧ вунӧдӧй тайӧс!»