Индӧд 20 - Коми Библия 2023

Тыш йылысь тшӧктӧмъяс

¹ «Кор ті петанныд тышӧ да аддзанныд, мый вӧрӧглӧн вӧв-тарантасыс да тышкайӧзыс унджык тіян дорысь, энӧ полӧй, ӧд тіянкӧд Господь, тіян Енныд, коді петкӧдіс тіянӧс Египет муысь.

² Тышӧ петтӧдзныд войтыр водзын мед сёрнитас поп.

³ Сійӧ мед шуас: ”Кывзы, Израиль! Талун ті петанныд тышӧ вӧрӧгныдлы паныд. Энӧ полӧй-тіралӧй наысь да энӧ майшасьӧй!

⁴ Ӧд Господь, тіян Енныд, тышӧ петас тіянкӧд ӧтвылысь, медым тіян пыдди тышкасьны вӧрӧгныдкӧд да сетны тіянлы вермӧм”.

⁵ Веськӧдлысьяс мед шуасны войтырлы: ”Тіян пиысь кӧ кодкӧ лэптіс выль керка, но сэтчӧ эз на овмӧдчы, мед бӧр бергӧдчас гортас. Сійӧ вермас тышын усьны, а сылӧн керкаӧ мӧд овмӧдчас.

⁶ Тіян пиысь кӧ кодкӧ лӧсьӧдіс виноград йӧр, но вотӧссӧ эз на чукӧртлы, мед бӧр бергӧдчас гортас. Сійӧ вермас тышын усьны, а сылӧн виноград йӧрысь вотӧссӧ мӧд чукӧртас.

⁷ Тіян пиысь кӧ кодкӧ кикутӧма, но эз на гӧтрась, мед бӧр бергӧдчас гортас. Сійӧ вермас тышын усьны, а сылӧн гӧтырпуыс мӧдлы гӧтырӧн лоас”.

⁸ Веськӧдлысьяс нӧшта мед шуасны: ”Тіян пиысь кӧ кодкӧ полӧ, сьӧлӧмнас майшасьӧ, мед бӧр бергӧдчас гортас, ӧд сылӧн полӧмыс вермас вуджны мукӧдыслы”.

⁹ Войтыр водзын сёрнитӧм бӧрын веськӧдлысьяс мед индасны тышкайӧзлы юралысьясӧс.

¹⁰ Кар вылӧ уськӧдчытӧдзныд корӧй сэтчӧс олысьясӧс тыштӧг сетчыны.

¹¹ Найӧ кӧ сетчасны да восьтасны карса дзиръянысӧ, уджӧдӧй найӧс вот мынтӧм могысь.

¹² Но оз кӧ сетчыны, а кӧсъясны тышкасьны, сэки карсӧ босьтӧй кытшӧ.

¹³ Кор Господь, тіян Енныд, сетас найӧс тіян киӧ, виалӧй шыпуртӧн сэтысь став айуловсӧ.

¹⁴ Но аньясӧс, челядьӧс, пемӧсъясӧс да карсьыс ставсӧ босьтӧй аслыныд. Вӧдитчӧй вӧрӧгныдлысь босьтӧмторнас, мый Господь, тіян Енныд, сетіс тіянлы.

¹⁵ Тадзи вӧчӧй тіянсянь ылын каръяскӧд.

¹⁶ А татчӧс войтыръяслӧн каръясысь, мый Господь, тіян Енныд, сетас тіянлы, некодӧс ловйӧн энӧ кольӧй.

¹⁷ Дзикӧдз бырӧдӧй хеттейясӧс, аморейясӧс, ханаансаясӧс, перезейясӧс, хивейясӧс, евуссаясӧс, [гергесейясӧс,] кыдзи тшӧктіс тіянлы Господь, тіян Енныд.

¹⁸ Но онӧ кӧ бырӧдӧй найӧс, найӧ велӧдасны тіянӧс быдпӧлӧс зывӧкторйӧ, мый найӧ вӧчӧны асланыс енъяслы юрбитігӧн. Тадзи ті асланыд Господь Енлы паныд мыж вӧчанныд.

¹⁹ Дыр кад кӧ тіянлы ковмас кытшавны кутшӧмкӧ кар, медым уськӧдчыны сы вылӧ да босьтны сійӧс, карлӧн матігӧгӧрсьыс вотӧса пуяссӧ энӧ кералӧй, найӧ вердасны тіянӧс. Пуясыд ӧд абу йӧз, найӧс оз ков бырӧдны.

²⁰ Но вотӧс вайтӧм пуяссӧ верманныд керавны да карсӧ босьтӧм могысь вӧчавны содъяс, кытчӧдз карыс оз ло тіян».