Индӧд 19 - Коми Библия 2023

Каръяс, кытчӧ позьӧ пышйыны

¹ «Господь, тіян Енныд, бырӧдас войтыръясӧс, кодъяслысь мусӧ сетас тіянлы. Кор ті босьтанныд налысь мусӧ да овмӧдчанныд налӧн каръясӧ да налӧн керкаясӧ,

² сэки торйӧдӧй куим кар сійӧ муас, мый Господь, тіян Енныд, сетас тіянлы.

³ Мусӧ, мый Господь, тіян Енныд, сетас тіянлы, юкӧй куим пельӧ, медым торйӧдӧм каръясас вермас пышйыны быдӧн, коді виас мортӧс. Нюжӧдӧй каръясӧдзыс туйяс.

⁴ Мортыс кӧ оз лӧгав матыссаыс вылӧ, а мӧвпышттӧг виас сійӧс, вермас пышйыны татшӧм карас да ловйӧн кольны.

⁵ Шуам, кык морт мунасны вӧрӧ пес керавны. Пусӧ кералігӧн кӧ ӧтиыслӧн черыс мынас черпусьыс да веськалас мӧдыслы, и сійӧ кулас, сэки виысьыс вермас пышйыны татшӧм карас да ловйӧн кольны.

⁶ Татшӧм карӧдзыс кӧ туйыс лоӧ кузь, водзӧс перйысь вермас суӧдны пышйысьӧс да скӧрйывсьыс вины сійӧс. Но пышйысь мортӧс оз ков вины, ӧд сійӧ эз мустӧмтлы виӧмаӧс.

⁷ Та вӧсна ме тшӧкта тіянлы торйӧдны аслыныд куим кар.

⁸ Господь, тіян Енныд, ыдждӧдас-паськӧдас тіянлысь мутӧ, кыдзи кыв сетӧмӧн кӧсйысис тіян батьяслы. Кӧсйысьӧм мусӧ Сійӧ сетас тіянлы,

⁹ кутанныд кӧ овны став тшӧктӧмыс серти, мый талун висьтала тіянлы, кутанныд кӧ радейтны Господьӧс, ассьыныд Ентӧ, да ветлыны Сылӧн туйясӧд став олӧм чӧжныд. Кор Господь ыдждӧдас-паськӧдас мунытӧ, тайӧ куим карсьыс ӧтдор нӧшта верманныд торйӧдны куим кар.

¹⁰ Энӧ кисьтӧй мыжтӧмлысь вирсӧ сійӧ муас, мый Господь, тіян Енныд, сетас тіянлы. Кисьтанныд кӧ мыжтӧмлысь вирсӧ, мыжыс лоӧ тіян вылын.

¹¹ Но морт кӧ лӧгалӧм вӧсна кыйӧдас да виас матыссасӧ, а сэсся пышъяс татшӧм карас,

¹² сэки сылӧн карысь юрнуӧдысьяс мед мӧдӧдасны ассьыныс йӧзсӧ морт виысьла. Найӧ мед бӧр вайӧдасны морт виысьӧс да сетасны сійӧс водзӧс перйысьлӧн киӧ, ӧд виысьлы колӧ кувны.

¹³ Сы дінӧ сьӧлӧмнаныд энӧ нормӧй. Тадзи ті вештанныд мыжтӧм вирсӧ Израиль вылысь, и тіянлы лоӧ бур».

Аддзылысь-висьталысьяс

¹⁴ «Кор ті босьтанныд аслыныд мусӧ, мый Господь, тіян Енныд, сетас тіянлы, да тіянлы вичмас му юкӧныс, му юкӧнъяс костӧ сувтӧдӧм пасъяс энӧ вештӧй.

¹⁵ Ӧти мортлӧн висьталӧмыс абу тырмана, медым мыждыны мортӧс лёк либӧ мыж вӧчӧмысь. Ставсӧ колӧ подулавны кык либӧ куим мортлӧн висьталӧмӧн.

¹⁶ Ылӧг висьталысь кӧ мыжалас кодӧскӧ лёк вӧчӧмысь,

¹⁷ сэки кыкнанныслы колӧ локны Господь водзӧ, сувтны попъяс да ёрдысьяс водзӧ, кодъяс сійӧ кадас уджалӧны.

¹⁸ Ставсӧ бура тӧдмалӧм бӧрын кӧ ёрдысьяс казяласны, мый мыжалысь висьталӧ вок йывсьыс ылӧгсӧ,

¹⁹ сэки мыжалысьлы вӧчӧй сійӧ, мый кӧсйис вӧчны вокыслы. Бырӧдӧй лёксӧ ас пӧвстсьыныд.

²⁰ Мукӧдыс кор кыласны та йылысь, повзясны да дугдасны вӧчны татшӧм лёкторсӧ.

²¹ Энӧ нормӧй сьӧлӧмнаныд лёк вӧчысь дінӧ. Олӧмысь перйы олӧм, синмысь – син, пиньысь – пинь, киысь – ки, кокысь – кок. [Кыдзи сійӧ дойдаліс ассьыс матыссасӧ, сылы сідзи жӧ мед вӧчасны.]»