Индӧд 17 - Коми Библия 2023

¹ «Господьлы, асланыд Енлы, вись пыдди энӧ вайӧй висьлӧс-доймӧм ӧшкӧс либӧ ыжӧс, ӧд Господьлы, тіян Енлы, тайӧ зывӧк.

² Господьӧн, тіян Енмӧн, сетӧм карын кӧ айлов либӧ ань вӧчас Господь Енныд водзын шогмытӧмсӧ – торкас йитӧдсӧ, мый Сійӧ кӧрталіс тіянкӧд,

³ кутас кесъявны-юрбитны мукӧд енъяслы, шонділы, тӧлысьлы да кодзувъяслы, мыйысь Господь ӧлӧдіс тіянӧс –

⁴ и ті кыланныд та йылысь, сэки бура тӧдмалӧй та йылысь. И Израильын кӧ вӧлі вӧчӧма татшӧм зывӧксӧ,

⁵ сэки сійӧс вӧчысь айловӧс либӧ аньӧс вайӧдӧй карса дзиръя дорӧ да изъялӧй кувтӧдзыс.

⁶ Зывӧксӧ вӧчысьӧс колӧ вины кык либӧ куим аддзылысь-висьталысьлӧн кывъяс серти, а ӧти мортлӧн кывъяс серти вины оз позь.

⁷ Медводз мед изнас лыйӧны аддзылысь-висьталысьяс, а на бӧрын – мукӧдыс. Бырӧдӧй лёксӧ ас пӧвстсьыныд».

Мыждӧм йылысь

⁸ «Асланыд карын кор ті кутанныд видлавны виӧм, вензьӧм либӧ дойдӧм йылысь могъяс, и тіянлы лоӧ сьӧкыд веськыда мыждыны, сэки мунӧй сійӧ местаас, мый Господь, тіян Енныд, бӧръяс [медым сэні ті шыасинныд Сы дінӧ].

⁹ Матыстчӧй сэні поп-левитъяс дінӧ да сійӧ кадас уджалысь ёрдысь дінӧ и юалӧй налысь. Найӧ висьталасны, кыдзи колӧ веськыда мыждыны.

¹⁰ Ставсӧ вӧчӧй сы серти, мый найӧ тшӧктасны тіянлы сійӧ местаас, мый бӧръяс Господь [тіян Енныд, медым сэні ті шыасинныд Сы дінӧ]. Ставсӧ вӧчӧй налӧн туйдӧдӧм серти,

¹¹ Индӧд серти, мыйӧ найӧ велӧдасны тіянӧс. Энӧ вешйӧй веськыдвылӧ ни шуйгавылӧ веськыда мыждӧмысь.

¹² Но коді кутас ышнясьны да оз кывзысь поплысь, коді кесъялӧ сэні Господь Енныд водзын, либӧ оз кывзысь [сійӧ кадас уджалысь] ёрдысьлысь, сійӧс колӧ вины. Бырӧдӧй Израильысь лёксӧ.

¹³ Кор став войтырыс кылас та йылысь, найӧ кутасны повны, и некод тадзи вӧчнысӧ оз лысьт».

Ӧксы йылысь

¹⁴ «Кор ті локтанныд сійӧ муас, мый Господь, тіян Енныд, сетас тіянлы, босьтанныд сійӧс аслыныд да овмӧдчанныд сэтчӧ, и кӧсъянныд, медым тіян гӧгӧр олысь войтыръяслӧн моз тіян тшӧтш вӧлі ӧксы,

¹⁵ сэки ӧксыӧ пуктӧй мортӧс, кодӧс бӧръяс Господь, тіян Енныд. Сійӧ мед лоӧ тіян войтыр пӧвстысь, а оз мукӧд войтыр пӧвстысь.

¹⁶ Ӧксыныд мед оз лӧсьӧд уна вӧв да оз мӧдӧд ассьыс йӧзсӧ Египетӧ, медым ньӧбны сэтысь вӧвъясӧс. Ӧд Господь шуис тіянлы, сэтчӧ пӧ бӧрсӧ энӧ бергӧдчӧй.

¹⁷ Ӧксылӧн мед оз ло уна гӧтыр, ӧд та вӧсна сылӧн сьӧлӧмыс кежас Господьысь. Сылы оз ков чукӧртны унасьыс-уна эзысь-зарни.

¹⁸ Ӧксыӧ пуксьӧм бӧрас сійӧ мед аслыс гижас Индӧдсӧ сійӧ небӧгсьыс, мый видзӧны поп-левитъяс.

¹⁹ Гижӧмасӧ мед видзас ас ордас да лыддяс став олан лунъяс чӧжыс. Сэки сійӧ велалас повны Господьысь, аслас Енмысь, да овны Индӧд да тшӧктӧмъяс серти.

²⁰ Аслас вокъясысь вылӧджык мед асьсӧ оз пукты, Индӧдысь веськыдвылӧ ни шуйгавылӧ мед оз кеж. Сэки сійӧ да сысянь чужысьяс кутасны дыр юравны Израильын».