Индӧд 16 - Коми Библия 2023

Ыджыд лун да Шомтӧм нянь сёян лунъяс

¹ «Авив тӧлысьӧ тіян мед лоӧ Господьлы, тіян Енлы, сиӧм ыджыдлунся гаж, ӧд авив тӧлысьӧ Господь, тіян Енныд, петкӧдіс тіянӧс войнас Египетысь.

² Вайӧй Господьлы, асланыд Енлы, ыджыдлунся вись пыдди ыж-кӧзаӧс да ӧш-мӧскӧс. Начкӧй висьсӧ сійӧ местаас, мый Господь бӧръяс Аслас нимлы оланінӧн.

³ Тайӧ висьыскӧд энӧ сёйӧй шоммӧдӧм нянь. Сизим лун чӧж сёйӧй шомтӧм нянь, шогдырся няньнытӧ, ӧд ті тэрмасьӧмӧн петінныд Египет муысь. Тадзи став олӧм чӧжныд ті кутанныд казьтывны Египетысь петан лунтӧ.

⁴ Сизим лун чӧж тіян муын мед оз ло няньшом. Медводдза лунӧ рытнас вись пыдди вайӧм пемӧслысь яйсӧ асылӧдзыс энӧ кольӧй.

⁵ Быд карын, мый Господь, тіян Енныд, сетас тіянлы, оз позь начкыны ыджыдлунся висьсӧ,

⁶ а позьӧ начкыны сӧмын сійӧ местаас, мый Господь, тіян Енныд, бӧръяс Аслас нимлы оланінӧн. Начкӧй ыджыдлунся висьтӧ рытнас шонді пуксигӧн, дзик сійӧ кадас, кор ті петінныд Египетысь.

⁷ Дасьтӧй да сёйӧй яйсӧ сійӧ местаас, мый бӧръяс Господь, тіян Енныд. Асывнас бӧр мунӧй гортаныд.

⁸ Квайт лун чӧж сёйӧй шомтӧм нянь. Сизимӧд луннас тіян мед лоӧ Господьлы, тіян Енлы, сиӧм вежа чукӧртчӧм. Сэки энӧ уджалӧй».

Ветымынӧд лунся гаж

⁹ «Сійӧ лунсяньыс, кор понданныд чарлаӧн вундыны няньнытӧ, лыддьӧй сизим вежон.

¹⁰ Сэки пасйӧй Господьлы, асланыд Енлы, сиӧм Ветымынӧд лунся гаж да вайӧй ас кӧсйӧм серти висьяс. Быдӧн мед ваяс аслас Господь Енлӧн бурсиӧмыс серти.

¹¹ Гажӧдчӧй Господь Енныд водзын сійӧ местаас, мый Господь бӧръяс Аслас нимлы оланінӧн. Гажӧдчӧй ныв-пиныдкӧд, кесйӧгъясныдкӧд, тіян карын олысь левитъяскӧд, йӧз муысь локтысьяскӧд, батьтӧм-мамтӧмъяскӧд да дӧваяскӧд, кодъяс олӧны тіян пӧвстын.

¹² Энӧ вунӧдӧй, мый ті асьныд вӧлінныд Египетын кесйӧг туйынӧсь. Кывзысьӧмӧн олӧй тайӧ тшӧктӧмъясыс серти».

Чом вӧчан лунъяс

¹³ «Сизим лун чӧж пасйӧй Чом вӧчан лунъяс, кор помаланныд гумлавыв уджъястӧ да виноград пычкӧмтӧ.

¹⁴ Гажӧдчӧй ныв-пиныдкӧд, кесйӧгъясныдкӧд, левитъяскӧд, йӧз муысь локтысьяскӧд, батьтӧм-мамтӧмъяскӧд да дӧваяскӧд, кодъяс олӧны тіян карын.

¹⁵ Сизим лун чӧж пасйӧй Господьлы, асланыд Енлы, сиӧм гаж сійӧ местаас, мый Господь бӧръяс [медым сэні ті шыасинныд Сы дінӧ]. Господь, тіян Енныд, бурсиас тіянлысь быдтаснытӧ да уджнытӧ, та вӧсна сьӧлӧмсяньныд нимкодясьӧй.

¹⁶ Куимысь вонас став айуловныд мед локтасны Господь Енныд водзӧ сійӧ местаас, мый Господь бӧръяс. Сэні пасйӧй Шомтӧм нянь сёян лунъяс, Ветымынӧд лунся гаж да Чом вӧчан лунъяс. Господь водзӧ куш киӧн мед некод оз лок,

¹⁷ но быдӧн мед ваяс козин сы серти, мыйӧн бурсиас сійӧс Господь, тіян Енныд».

Ёрдысьясӧс индӧм

¹⁸ «Быд карын, мый Господь, тіян Енныд, сетас тіянлы, индӧй чужанкотыръяслы ёрдысьясӧс да веськӧдлысьясӧс. Найӧ мед веськыда мыждасны войтырӧс.

¹⁹ Веськыда мыждӧмсӧ энӧ торкӧй, чужӧм вылӧ энӧ видзӧдӧй, козинъяс энӧ босьтӧй. Ӧд козин босьтӧмыс синтӧммӧдӧ мывкыда мортӧс, и сійӧ мыждӧ веськыда вӧчысьӧс.

²⁰ Корсьӧй веськыдлунсӧ, сӧмын веськыдлунсӧ, сэки ті кутанныд овны, и ті босьтанныд аслыныд сійӧ мусӧ, мый Господь, тіян Енныд, сетас тіянлы».

Идоллы юрбитысьясӧс мыждӧм

²¹ «Господьлы, асланыд Енлы, кыпӧдӧм висьпуктанінкӧд орччӧн энӧ сувтӧдӧй юрбитан пуяс.

²² Энӧ сувтӧдӧй юрбитан изъяс, ӧд Господь, тіян Енныд, мустӧмтӧ тайӧс».