Индӧд 15 - Коми Библия 2023

Уджйӧз киритан во

¹ «Быд сизимӧд воыс тіян мед лоӧ уджйӧз киритан во.

² Уджйӧзӧн сетысь аслас матыссаыслысь уджйӧзсӧ мед киритас-вунӧдас да мынтысьны оз кор. Ӧд Господьлӧн [тіян Енлӧн] тшӧктӧм серти тіян лоӧ уджйӧз киритан во.

³ Йӧз муысь локтысьлысь уджйӧзнытӧ перйӧй, а вокныдлысь энӧ.

⁴ Сійӧ муас, мый Господь, тіян Енныд, пыр кежлӧ сетас тіянлы, Господь озыра бурсиас тіянӧс. Тіян пӧвстын оз лоны гӧльяс,

⁵ сӧмын понданныд кӧ сьӧлӧмсяньныд кывзысьны Господьлысь, асланыд Енлысь, да овны став тайӧ тшӧктӧмыс серти, мый талун висьтала тіянлы.

⁶ Кор Господь, тіян Енныд, бурсиас тіянӧс, кыдзи Сійӧ кӧсйысис, ті верманныд уна войтырлы уджйӧзӧн сетны, но водзӧсӧн онӧ кутӧй босьтны. Ті кутанныд ыджыдавны войтыръяс вылын, но тіян вылын найӧ оз кутны ыджыдавны.

⁷ Сійӧ муас, мый Господь, тіян Енныд, сетас тіянлы, войтыр пӧвстаныд кӧ карын либӧ сиктын лоӧ гӧль морт, сэки энӧ чорзьӧдӧй сьӧлӧмнытӧ, энӧ кольӧй вокнытӧ отсӧгтӧг.

⁸ Мед тэнад киыд лоӧ сетана киӧн, уджды сылы сы мында, мыйта сылы колӧ.

⁹ Видзчысь, сьӧлӧмад эн лэдз шогмытӧм мӧвп, мый сизимӧд воыс, уджйӧз киритан воыс, матыстчӧ нин, и та вӧсна гӧль вокыдлы нинӧм он сет. Тэ кӧ он ло бур сьӧлӧма сы дінӧ, сійӧ кутас норасьны тэ вылӧ Господьлы, и тэ вылын лоӧ [ыджыд] мыж.

¹⁰ Сет сылы лышкыда [и уджйӧзӧн сет, мыйта корӧ да мыйта сылы колӧ]. Сетігад сьӧлӧмыд мед оз шогсьы, ӧд гӧль воклы сетӧмсьыд Господь, тэнад Енмыд, бурсиас тэнӧ быд уджын.

¹¹ Тіян муын гӧль йӧзыс пыр лоасны, та вӧсна ме тшӧкта тіянлы лышкыда сетны гӧльяслы да коньӧръяслы, асланыд вокъяслы».

Кесйӧгӧс лэдзӧм

¹² «Тэнад еврей войтырысь кӧ айлов либӧ ань вузалас асьсӧ тэныд кесйӧг туйӧ, сійӧ мед уджалас тэ ордын квайт во чӧж, а сизимӧд вонас лэдз сійӧс вӧля вылӧ.

¹³ Но куш киӧн эн лэдз сійӧс.

¹⁴ Сет сылы сьӧлӧмсяньыд аслад ыж-кӧза чукӧрсьыд, гумла вывсьыд, виноград пычканінсьыд пай. Ставсьыс, мыйӧн бурсиас тэнӧ Господь, тэнад Енмыд, чуктӧд сылы.

¹⁵ Тӧд, мый тэ [тшӧтш] вӧлін кесйӧг туйын Египет муын, и Господь, тэнад Енмыд, мездіс тэнӧ нартитӧм улысь. Та вӧсна талун ме тшӧкта тэныд тадзисӧ вӧчны.

¹⁶ Но кесйӧгыд кӧ шуас, мый оз кӧсйы мунны тэ ордысь, ӧд сійӧ радейтӧ тэнӧ да тэнсьыд гортсатӧ, и сылы тэ ордын бур,

¹⁷ сэки босьт шыла да розьӧд сылысь пельсӧ ӧдзӧс бердад. Тадзи сійӧ пыр кежлӧ лоӧ тэнад кесйӧгӧн. Кесйӧг анькӧд тшӧтш тадзи вӧч.

¹⁸ Тэныд кӧ сьӧкыд лэдзны кесйӧгтӧ, мӧвпышт, мый квайт во чӧж сійӧ кесъяліс тэныд, и тайӧ кадас сійӧ сулаліс тэныд сӧмын джынсӧ сыысь, мый эськӧ ковмис мынтыны медалӧм мортлы. Господь, тэнад Енмыд, бурсиас тэнӧ быд уджын».

Ыж-мӧслӧн медводдза чужысь

¹⁹ «Ыж-мӧсныдлысь став медводдза ай чужысьсӧ вежӧдӧй-торйӧдӧй Господьлы, асланыд Енлы. Энӧ уджӧдӧй медводдза чужысь ӧшкӧс. Энӧ шырӧй ыж-кӧзалысь медводдза чужысьсӧ.

²⁰ Господьлӧн [тіян Енлӧн] бӧрйӧм местаын быд во сёйӧй найӧс став котырнаныд Господь Енныд водзын.

²¹ Но пемӧсныд кӧ абу дзоньвидза, сійӧ кӧ чотысь, синтӧм либӧ сылӧн кӧ эм мӧдпӧлӧс ыджыд тырмытӧмтор, татшӧмсӧ Господьлы, асланыд Енлы, энӧ вайӧй.

²² Татшӧм пемӧслысь яйсӧ сёйӧй асланыд оланінын газель да кӧр яй моз. Яйсӧ вермас сёйны и сӧстӧм, и пежасьӧм морт.

²³ Вирсӧ сӧмын энӧ сёйӧй, ва моз койыштӧй сійӧс му вылӧ».