Индӧд 14 - Коми Библия 2023

Сӧстӧм да пеж сёян

¹ «Ті – Господь Енлӧн ныв-пиыс. Кулӧм морт вӧсна шогсигӧн энӧ вундалӧй вир-яйнытӧ да энӧ шырӧй плеш водзсьыд юрсинытӧ.

² Ӧд ті – Господь Енлӧн вежа войтырыс. Господь бӧрйис тіянӧс мувывса войтыръяс пӧвстысь, медым ті вӧлінныд Сылӧн войтырӧн.

³ Энӧ сёйӧй нинӧм зывӧксӧ.

⁴ Тіянлы позьӧ сёйны ӧш-мӧскӧс, ыж-кӧзаӧс,

⁵ кӧрӧс, газельӧс, косуляӧс, вӧлявывса кӧзаӧс да ӧшкӧс, антилопаӧс да керӧсвыв межӧс.

⁶ Пемӧсӧс, кодлӧн гыжйыс вожа да коді рӧмидзтӧ, позьӧ сёйны.

⁷ Но оз позь сёйны рӧмидзтысь пемӧсӧс, кодлӧн гыжйыс абу вожа. Оз позь сёйны вожа гыжъя пемӧсӧс, коді оз рӧмидзты. Энӧ сёйӧй верблюдӧс, кӧчӧс да даманӧс. Найӧ рӧмидзтӧны, но абу вожа гыжъяӧсь. Найӧ тіянлы пежӧсь.

⁸ Энӧ сёйӧй порсьӧс. Сылӧн гыжйыс вожа, но сійӧ оз рӧмидзты. Сійӧ тіянлы пеж. Тайӧ пемӧсъяслысь яйсӧ энӧ сёйӧй да налӧн шой дінӧ энӧ инмӧдчӧй.

⁹ Ваын олысь-уялысьяс пиысь сёйӧй сэтшӧмӧс, кодлӧн эм борд да сьӧм.

¹⁰ Но кодлӧн абу бордйыс да сьӧмыс, сійӧс энӧ сёйӧй. Сійӧ тіянлы пеж.

¹¹ Сӧстӧм лэбач-пӧтка позьӧ сёйны.

¹² Энӧ сёйӧй татшӧм лэбачьясӧс: кутшӧс, грифӧс да саридзкутшӧс,

¹³ сӧкӧл-варышӧс,

¹⁴ кырныш-ракаӧс,

¹⁵ страусӧс, сюзьӧс да каляӧс,

¹⁶ бугуйӧс, ибисӧс да ва курӧгӧс,

¹⁷ пеликанӧс, чери варышӧс да бакланӧс,

¹⁸ аистӧс, быдсикас цапляӧс, крукыль ныра сизьӧс да нярбордъя шырӧс.

¹⁹ Посни лэбалысьяс тіянлы пежӧсь. Найӧс энӧ сёйӧй.

²⁰ Сӧстӧм лэбалысьясӧс ті верманныд сёйны.

²¹ Энӧ сёйӧй пемӧс-лэбачлысь шойсӧ. Сетӧй сійӧс либӧ вузалӧй йӧз муысь локтысьяслы, кодъяс олӧны тіян каръясын. Ті – Господь Енлӧн вежа войтырыс. Эн пу кӧзапиӧс мамыслӧн йӧв пиын».

Дасӧд юкӧн йылысь

²² «Быд во торйӧд дасӧд юкӧнсӧ сыысь, мый быдмӧ тэнад му вылын.

²³ Няньсьыд, винасьыд да олив выйсьыд дасӧд юкӧнсӧ, тшӧтш ыж-мӧскыдлысь медводдза чужысьсӧ, сёй аслад Господь Ен водзын сійӧ местаас, мый Сійӧ бӧръяс Аслас нимлы оланінӧн. Тадзи тэ велӧдчан повны Господьысь, аслад Енмысь, став олан лунъяс чӧжыд.

²⁴ Но тэсянь кӧ ылын лоӧ сійӧ местаыс, мый Господь, тэнад Енмыд, бӧръяс Аслас нимлы оланінӧн, и та вӧсна ассьыд дасӧд юкӧнтӧ он вермы нуны сэтчӧ, ӧд Господь бурсиӧ тэнӧ,

²⁵ сэки веж сійӧс эзысь вылӧ да эзысьнас мун сійӧ местаас, мый бӧръяс Господь, тэнад Енмыд.

²⁶ Сэні эзысь вылӧ ньӧб ӧшъясӧс, ыжъясӧс да вина-сур – ставсӧ, мый кӧсъян. Сэсся аслад Господь Ен водзын сёй-ю да гажӧдчы аслад котыркӧд ӧтвылысь.

²⁷ Левитӧс, коді олӧ тэнад карын, эн вунӧд, ӧд сылӧн абу му юкӧныс, а тэнад эм.

²⁸ Быд куим во мысти торйӧд вогӧгӧрся быдтассьыд дасӧд юкӧнсӧ да чукӧрт сійӧс аслад оланінын,

²⁹ медым левитъяс, кодъяслӧн абу му юкӧныс, а сідзжӧ йӧз муысь локтысьяс, батьтӧм-мамтӧмъяс да дӧваяс, кодъяс олӧны тэнад карын, вермисны локны да пӧттӧдзныс сёйны. Сэки Господь, тэнад Енмыд, бурсиас тэнӧ быд уджын».