Индӧд 13 - Коми Библия 2023

¹ «Тіян пӧвстысь кӧ сувтас пророк либӧ вӧтъяс аддзылысь, коді висьталас индысьпас либӧ шензьӧданатор йылысь,

² мый сэсся збыльмас, и сійӧ ышӧдас тіянӧс мунны тӧдтӧм енъяс бӧрся да кесъявны налы,

³ но ті сылысь кывъяссӧ энӧ кывзӧй. Ӧд тадзи Господь, тіян Енныд, кӧсйӧ тӧдмавны, радейтанныд-ӧ ті Господьӧс, ассьыныд Ентӧ, став сьӧлӧмнад да став олӧмнад.

⁴ Асланыд Господь Ен бӧрся мунӧй да Сыысь полӧй. Сылӧн тшӧктӧмъяс серти олӧй, Сылысь кывзысьӧй, Сылы кесъялӧй да Сы дінӧ кутчысьӧй.

⁵ А пророкӧс да вӧтъяс аддзылысьӧс колӧ вины, мыйла сійӧ ышӧдіс тіянӧс паныд кыпӧдчыны Господьлы, тіян Енлы, коді петкӧдіс тіянӧс Египетысь да мездіс нартитӧм улысь. Бырӧдӧй лёксӧ ас пӧвстсьыныд, ӧд татшӧм мортыс кежӧдӧ тіянӧс туйысь, кыті Господь, тіян Енныд, тшӧктіс тіянлы муннысӧ.

⁶ Тэнӧ кӧ вокыд, [батьыдлӧн пиыс либӧ] мамыдлӧн пиыс, аслад пиыд либӧ нылыд, радейтана гӧтырыд либӧ меддона ёртыд гусьӧн корас мунны сыкӧд да кесъявны мукӧд енъяслы, кодъясӧс ті да тіян батьясныд онӧ тӧдӧй,

⁷ и кодъяслы юрбитӧны тіян гӧгӧр матын либӧ ылын олысь войтыръяс ӧтар му помсянь мӧдар му помӧдзыс,

⁸ сэки эн кӧсйысь да эн кывзы сійӧс. Эн нормы сьӧлӧмнад сы дінӧ, эн жалит, эн дорйы,

⁹ а ви сійӧс. Тэ лый сійӧс изнас медводдзаӧн, а тэ бӧрся – войтырыд.

¹⁰ Сійӧ кежӧдӧ тіянӧс Господьысь, тіян Енмысь, коді петкӧдіс тіянӧс Египетысь нартитӧм улысь. Таысь сійӧс колӧ изъявны кувтӧдзыс.

¹¹ Став Израиль войтыр мед кылас та йылысь да кутас повны, сэсся некод тіян пӧвстысь оз кут вӧчны татшӧм лёкторсӧ.

¹² Ті кӧ кыланныд, мый кутшӧмкӧ карын, кодӧс Господь, тіян Енныд, сетас тіянлы,

¹³ шогмытӧм йӧз кежӧдӧны карса олысьясӧс юрбитны тӧдтӧм енъяслы,

¹⁴ сэки бура тӧдмалӧй та йылысь. И тіян пӧвстын кӧ вӧлі вӧчӧма татшӧм зывӧксӧ,

¹⁵ сэки виӧй шыпуртӧн тайӧ карсьыс став олысьсӧ. Дзикӧдз бырӧдӧй карсӧ да ставсӧ, мый сэні эм, весиг ыж-мӧссӧ шыпуртӧн виалӧй.

¹⁶ Став эмбурсӧ чукӧртӧй карса изэрд вылӧ, а сэсся сотӧй карсӧ Господьлы, асланыд Енлы, ваян висьӧс моз. Карсӧ мед некор оз ло выльысь лэптӧма, сэні мед некод оз кут овны.

¹⁷ Господьлы сиӧмторъясысь тіян киӧ мед нинӧм оз веськав. Сӧмын ставсӧ бырӧдӧм бӧрын Господь дугдас скӧравны, бурсьӧлӧмтчас да жалитас тіянӧс, сетас тіянлы уна ныв-пиӧс, кыдзи [висьталіс тіянлы да] кыв сетӧмӧн кӧсйысис тіян батьяслы.

¹⁸ Тадзи лоӧ, ті кӧ кутанныд кывзысьны Господьлысь, асланыд Енлысь, овны став Сылӧн тшӧктӧмыс серти, мый талун висьтала тіянлы, и вӧчны Господь Енныд водзын [бурсӧ да] шогманасӧ».