Индӧд 12 - Коми Библия 2023

Дзик ӧти висьваянін

¹ «Тайӧ индӧд-тшӧктӧмъяссӧ тіянлы колӧ тӧдны да на серти овны сійӧ муас, мый Господь, тіян батьяслӧн Ен, сетас тіянлы. Став олан лунъяс чӧжныд олӧй на серти сійӧ муас, мый босьтанныд аслыныд.

² Бырӧдӧй став юрбитанінъяссӧ, кӧні войтыръяс, кодъяслысь мусӧ ті босьтанныд, кесъялісны асланыс енъяслы джуджыд керӧс-мылькъяс вылын да пашкыра быдмысь пуяс улын.

³ Налысь висьпуктанінъяссӧ бырӧдӧй, юрбитан изъяссӧ пасьвартӧй, юрбитан пуяссӧ сотӧй да бӧлбанъяссӧ жуглӧй, медым дзикӧдз вушъяс налӧн енъяслӧн нимыс.

⁴ Господьлы, асланыд Енлы, кесъялігӧн на моз энӧ вӧчӧй.

⁵ Господь, тіян Енныд, бӧръяс Аслас нимлы оланін ӧти чужанкотырлӧн муын. Сэтчӧ мунӧй

⁶ да вайӧй ассьыныд сотан висьястӧ да мукӧд висьястӧ, мувыв быдтасысь дасӧд юкӧнтӧ да вайӧмторъястӧ, кыв сетан висьястӧ, ас кӧсйӧм серти ваян висьястӧ [бурасян висьястӧ] да ыж-мӧсныдлысь медводдза чужысьяссӧ.

⁷ Сэні ас котырныдкӧд сёйӧй висьнытӧ Господь Енныд водзын. Нимкодясьӧй сыысь, мый удж помысь перйинныд аслыныд, ӧд Господь, тіян Енныд, бурсиис тіянӧс.

⁸ Сійӧ муас энӧ олӧй сідзи, кыдзи ӧні ми тані олам, ӧд тані быдӧн вӧчӧ сійӧ, мый чайтӧ веськыдӧн.

⁹ Ті энӧ на воӧй шойччанінӧ – сійӧ муас, мый Господь, тіян Енныд, сетас тіянлы.

¹⁰ Ті вуджанныд Йӧрдан ю сайӧ да овмӧдчанныд сійӧ муас, мый Господь, тіян Енныд, сетас тіянлы пыр кежлӧ. Сійӧ сетас тіянлы лӧнь олӧм, тіян гӧгӧр олысь вӧрӧгъясысь видзас. Ті кутанныд сэні повтӧг овны.

¹¹ Кутшӧм места Господь, тіян Енныд, бӧръяс Аслас нимлы оланінӧн, сэтчӧ вайӧй ставсӧ, мый ме [талун] тшӧкта тіянлы: сотан висьястӧ да мукӧд висьястӧ, мувыв быдтасысь дасӧд юкӧнтӧ, вайӧмторъястӧ да кыв сетан медбур висьнытӧ, мый кӧсйысинныд Господьлы [асланыд Енлы].

¹² Гажӧдчӧй Господь Енныд водзын ныв-пиныдкӧд, кесйӧгъясныдкӧд, а сідзжӧ левитъяскӧд, кодъяс олӧны тіян карын, ӧд налӧн абу му юкӧныс тіян пӧвстын.

¹³ Видзчысьӧй, энӧ вайӧй сотан висьнытӧ, кӧні веськалӧ.

¹⁴ Кутшӧм чужанкотырлӧн муын Господь [тіян Енныд] бӧръяс места, сэні вайӧй сотан висьяснытӧ. Сэні вӧчӧй ставсӧ, мый ме [талун] тшӧкта.

¹⁵ Кор Господь бурсиас тіянӧс да сетас тіянлы ыж-мӧскӧс, сэки ті верманныд асланыд кӧсйӧм серти начкыны да сёйны ыж-мӧснытӧ быдлаын, кӧні оланныд. И сӧстӧм, и пежасьӧм морт вермас сёйны тайӧ яйсӧ газель да кӧр яй моз.

¹⁶ Вирсӧ сӧмын энӧ сёйӧй, ва моз койыштӧй сійӧс му вылӧ.

¹⁷ Асланыд оланінъясын тіянлы оз позь сёйны дасӧд юкӧнсӧ, мый торйӧданныд няньысь, винаысь да олив выйысь, а сідзжӧ оз позь сёйны ыж-мӧсныдлысь медводдза чужысьсӧ, кыв сетан висьяснытӧ, ас кӧсйӧм серти ваян висьяснытӧ да вайӧмторъяснытӧ.

¹⁸ Сёйӧй висьнытӧ Господь Енныд водзын Сылӧн бӧрйӧм местаын. Тіянкӧд ӧтлаын мед сёясны ныв-пиныд, кесйӧгъясныд, а сідзжӧ тіян карын олысь левитъяс [да йӧз муысь локтысьяс]. Нимкодясьӧй Господь Енныд водзын быдтор вӧсна, мый удж помысь перйинныд аслыныд.

¹⁹ Асланыд му вылын олан лунъяс чӧжныд энӧ вунӧдӧй тӧждысьны левитъяс вӧсна.

²⁰ Господь, тіян Енныд, ыдждӧдас-паськӧдас оланіннытӧ, кыдзи Сійӧ Ачыс висьталіс. Кор кӧсъян сёйны яй, сёй, мыйта кӧсъян.

²¹ Тэсянь кӧ ылын лоӧ сійӧ местаыс, мый Господь, тэнад Енмыд, бӧръяс Аслас нимлы оланінӧн, сэки Господьӧн [тэнад Енмӧн] сетӧм ыж-мӧскыд пӧвстысь начкы пемӧстӧ, кыдзи ме тшӧкті. Аслад оланінын тэ верман сёйны, мыйта кӧсъян.

²² Сёй тайӧ яйсӧ газель да кӧр яй моз. Яйсӧ вермас сёйны [тэ ордын] и сӧстӧм, и пежасьӧм морт.

²³ Эн сёй вирсӧ, ӧд вирын – олӧмыс. Та вӧсна яйсӧ вирнас эн сёй.

²⁴ Вирсӧ эн сёй, но ва моз койышт сійӧс му вылӧ.

²⁵ Эн сёй вир, а вӧч Господь [аслад Ен] водзын [бурсӧ да] шогманасӧ, медым тэныд да тэсянь чужысьяслы вӧлі бур [нэмъяс чӧж].

²⁶ Вайӧй вежа вайӧмторъяснытӧ да кыв сетан висьяснытӧ сійӧ местаас, мый бӧръяс Господь [тіян Енныд, медым сэні ті шыасинныд Сы дінӧ].

²⁷ Сотан висьлысь яйсӧ да вирсӧ сотӧй асланыд Господь Енлӧн висьпуктанін вылын. Мукӧд висьяслысь вирсӧ кисьтӧй асланыд Господь Енлӧн висьпуктанін вылӧ, а яйсӧ сёйӧй.

²⁸ Кывзӧй да олӧй тайӧ кывъясыс серти, мый висьтала тіянлы. Вӧчанныд кӧ Господь Енныд водзын бурсӧ да шогманасӧ, тіянлы да тіянсянь чужысьяслы лоӧ бур нэмъяс чӧж».

Идоллы юрбитӧм йылысь ӧлӧдӧм

²⁹ «Господь, тіян Енныд, бырӧдас тіян водзысь войтыръясӧс, кодъяслӧн муас ті мунанныд, медым босьтны сійӧс аслыныд. Кор босьтанныд налысь мусӧ да овмӧдчанныд сэтчӧ,

³⁰ видзчысьӧй, мед найӧс бырӧдӧм бӧрын ті энӧ шедӧй налькйӧ да энӧ олӧй на моз. Энӧ юасьӧй тайӧ войтыръяслӧн енъяс йылысь, энӧ юалӧй, кыдзи найӧ кесъялісны асланыс енъяслы, да энӧ вӧчӧй на моз.

³¹ Господьлы, асланыд Енлы, кесъялігӧн на моз энӧ вӧчӧй. Асланыс енъяслы кесъялігӧн найӧ ӧд вӧчӧны сійӧ, мый зывӧктӧ-мустӧмтӧ Господь. Найӧ весиг ассьыныс ныв-писӧ сотӧны асланыс енъяслы.

³² Вӧчӧй сійӧс, мый ме тшӧкта тіянлы, нинӧм энӧ содтӧй сэтчӧ да нинӧм энӧ чинтӧй сэтысь».