Индӧд 11 - Коми Библия 2023

Господьлӧн ыджыд уджъяс

¹ «Радейтӧй Господьӧс, ассьыныд Ентӧ, да олӧй Сылӧн индӧд-тшӧктӧмъяс серти став олан лунъяс чӧжныд.

² Ныв-пиныд эз тӧдлыны да эз аддзывны тіян Господь Енлысь мыждӧмсӧ, эз аддзывны Сылысь ыджыд вынйӧрсӧ, Сылысь вына кисӧ да ён сойсӧ,

³ Сылысь индысьпасъяссӧ да уджъяссӧ, мый Сійӧ вӧчис Египетын фараонлы, египетса ӧксылы, да став сылӧн муыслы.

⁴ Ныв-пиныд эз аддзывны, кыдзи Господь пӧдтіс Гӧрд саридзын египетса тышкайӧзӧс вӧвъяснас да тарантасъяснас, кор египетсаяс вӧтчисны тіян бӧрся. Господь [Ен] бырӧдіс найӧс, и тайӧ тадзи.

⁵ Ныв-пиныд эз аддзывны, мый Господь вӧчис тіянлы овтӧминын татчӧ вотӧдзныд,

⁶ мый Сійӧ вӧчис Рувим чужанкотырысь Элиавлӧн Датан да Авирам пиянлы, кор Израиль войтырлӧн син водзын муыс воссис да ньылыштіс найӧс, налысь гортсасӧ, чомъяссӧ да став эмбурсӧ.

⁷ А ті асланыд синмӧн аддзылінныд Господьлысь ыджыд уджъяссӧ.

⁸ Олӧй став [Сылӧн] тшӧктӧмыс серти, мый талун висьтала тіянлы. Сэки ті лоанныд ёнӧсь, мунанныд [Йӧрдан ю сайӧ] да босьтанныд аслыныд мусӧ,

⁹ кӧні визувтӧ йӧв да ма. Ті кутанныд дыр овны сійӧ муас, мый Господь кыв сетӧмӧн кӧсйысис сетны тіян батьяслы да насянь чужысьяслы.

¹⁰ Муыс, кытчӧ ті мунанныд сійӧс босьтӧм могысь, абу египетса му кодь, кытысь ті петінныд. Сэні муястӧ кӧдзӧм бӧрад ті киськавлінныд найӧс, кыдзи киськавлӧны град йӧр.

¹¹ Сійӧ муыс, кытчӧ ті овмӧдчанныд, керӧсъяса да ковтысъяса, и енэжсяньыс сійӧс киськалӧ зэр.

¹² Сійӧ муыс вӧсна тӧждысьӧ Господь, тіян Енныд. Сійӧ видзӧдӧ муыс бӧрся во гӧгӧр чӧж.

¹³ Ті кӧ кутанныд овны Сылӧн тшӧктӧмъяс серти, мый талун висьтала тіянлы, кутанныд радейтны Господьӧс, ассьыныд Ентӧ, кутанныд кесъявны Сылы став сьӧлӧмнад да став олӧмнад,

¹⁴ сэки Господь ас кадӧ сетас арся да тувсовъя зэр, и ті чукӧртанныд нянь, вина да олив вый.

¹⁵ Ті кутанныд пӧттӧдзныд сёйны. Тіян видзьяс вылын Сійӧ быдтас ыж-мӧскыдлы турун.

¹⁶ Видзчысьӧй, медым сьӧлӧмныд эз ылав. Веськыд туйсьыс энӧ кежӧй, мукӧд енъяслы энӧ кесъялӧй да энӧ юрбитӧй.

¹⁷ Тадзи кӧ вӧчанныд, сэки Господьлӧн скӧрлуныс ыпнитас тіян вылӧ, и Сійӧ тупкас енэжсӧ, оз сет зэрсӧ. Муыс оз сет быдтассӧ, и ті регыдъя кадӧн быранныд сійӧ бур му вывсьыс, мый Господь сетас тіянлы.

¹⁸ Менам кывъясӧй мед лоӧны сьӧлӧманыд да вежӧраныд. Пас пыдди кӧрталӧй найӧс сояныд да плешканыд.

¹⁹ Велӧдӧй наӧ ныв-пинытӧ. Висьталӧй гортаныд и туйын, висьталӧй водіганыд и чеччиганыд.

²⁰ Гижӧй кывъяссӧ ӧдзӧс куричад да дзиръяад,

²¹ медым ті да ныв-пиныд дыр олінныд сійӧ муас, мый Господь кыв сетӧмӧн кӧсйысис сетны тіян батьяслы пыр кежлӧ, кытчӧдз му весьтын лоӧ енэж.

²² Кутанныд кӧ овны тіянлы сетӧм тшӧктӧмъяс серти, радейтны Господьӧс, ассьыныд Ентӧ, ветлыны Сылӧн туйясӧд да кутчысьны Сы дінӧ,

²³ сэки Господь вӧтлас тіян водзысь войтыръясӧс, кодъяс тіян дорысь вынаӧсь да уна лыдаӧсь, и ті босьтанныд аслыныд налысь мусӧ.

²⁴ Муыс, кытчӧ ті сувтанныд кокнад, лоӧ тіян. Овтӧминсянь Ливанӧдз, Ефрат юсянь рытыввыв саридзӧдз муыс лоӧ тіян.

²⁵ Некод оз вермы тіянлы паныд сувтны, ӧд Господь, тіян Енныд, кӧдзас тіянысь полӧм-тіралӧм быдлаын, кытчӧ ті сувтанныд кокнад. Та йылысь Сійӧ висьтавліс тіянлы.

²⁶ Талун ме вӧзъя тіянлы бурсиӧм и ёрӧм.

²⁷ Бурсиӧмыс лоӧ тіянлы, ті кӧ кутанныд овны асланыд Господь Енлӧн индӧд-тшӧктӧмъяс серти, мый талун висьтала тіянлы.

²⁸ Ёрӧмыс лоӧ тіянлы, ті кӧ онӧ кутӧй овны асланыд Господь Енлӧн индӧд-тшӧктӧмъяс серти, кежанныд кӧ туйсьыс, кытчӧ ме веськӧда тіянӧс талун, да мунанныд тіянлы тӧдтӧм енъяс бӧрся.

²⁹ Кор Господь, тіян Енныд, пыртас тіянӧс сійӧ муас, кытчӧ ті мунанныд сійӧс босьтӧм могысь, сэки Гаризим керӧс вылын шу бурсиӧм, а Эвал керӧс вылын – ёрӧм.

³⁰ Тайӧ керӧсъясыс сулалӧны ковтысын олысь ханаансаяслӧн муын, Йӧрдан сайын рытыввылын, Галгал бокын, кысянь матын быдмӧ Морэ нима тупу рас.

³¹ Ӧні ті вуджанныд Йӧрдан ю сайӧ, медым босьтны аслыныд му, мый Господь, тіян Енныд, сетас тіянлы [пыр кежлӧ]. Ті босьтанныд сійӧс аслыныд да кутанныд сэні овны.

³² Сідзкӧ, кывзысьӧмӧн олӧй [Сылӧн] став индӧд-тшӧктӧмыс серти, мый талун висьтала тіянлы».