Индӧд 1 - Коми Библия 2023

Израиль войтырлӧн асныралӧм

¹ Мӧисей сёрнитіс став Израиль войтыркӧд, кор найӧ вӧліны Йӧрдан ю сайын овтӧминын, Суфлы паныда ковтысын, Паран кар да Тофел, Лаван, Хацерот да Дизахав каръяс костын.

² Дас ӧти лун колӧ вӧлі мунны Сеир керӧсвыв муӧд Хорив керӧссянь Кадеш-Варниӧдз.

³ Египетысь петӧмсянь нелямынӧд воӧ, дас ӧтиӧд тӧлысьлӧн медводдза лунӧ, Мӧисей висьталіс Израиль пиянлы ставсӧ, мый Господь тшӧктіс.

⁴ Таӧдз Мӧисей пасьвартіс Сигон да Ог ӧксыясӧс. Аморейяслӧн Сигон ӧксы юраліс Хешбон карын, а васанса Ог ӧксы – Аштарот да Эдрей каръясын.

⁵ Йӧрдан сайын, Моав муын, Мӧисей велӧдіс войтырӧс Индӧдӧ. Сійӧ шуис:

⁶ «Хорив керӧсын Господь, миян Енным, шуис: ”Тырмас тіянлы тайӧ керӧс бокас овнысӧ.

⁷ Мунӧй Ханаан муӧ – аморейяслӧн керӧсвыв муӧ да накӧд орччӧн олысь войтыръяс дінӧ, кодъяс олӧны Йӧрдан ковтысын, керӧсвыв муын, рытыввылын керӧсбердса муын, Негев муын да саридздор муын. Овмӧдчӧй налӧн муӧ да Ливанӧ, паськӧдчӧй весиг ыджыд Ефрат ю дорӧдз.

⁸ Тайӧ мусӧ Ме сета тіянлы. Ме, Господь, кыв сетӧмӧн кӧсйыси сетны сійӧс тіян батьяслы – Ӧвраамлы, Исааклы, Яковлы да насянь чужысьяслы. Мунӧй да босьтӧй сійӧс”.

⁹ Сэки ме тіянлы шуи: ”Меным ӧтнамлы сьӧкыд нуӧдны тіянӧс.

¹⁰ Господь, тіян Енныд, содтіс тіянӧс, и ті лоинныд енэжвыв кодзувъяс мында.

¹¹ Господь, тіян батьяслӧн Ен, мед сюрс пӧвстӧн содтас тіянлысь лыднытӧ да бурсиас тіянӧс, кыдзи Сійӧ кӧсйысис тіянлы.

¹² Но ме ӧтнам ог вермы нуны тіянлысь сьӧкыдлунъястӧ, тӧжд-могъястӧ да зык-вензьӧмъястӧ.

¹³ Бӧрйӧй быд чужанкотырысь мывкыд да сюсь вежӧра йӧзӧс, и ме пукта найӧс веськӧдлыны тіянӧн”.

¹⁴ Ті меным вочавидзинныд, мый буртор вӧзйи.

¹⁵ Ме чукӧрті тіян чужанкотыръясысь мывкыд да [сюсь] вежӧра йӧзӧс и пукті найӧс веськӧдлыны сюрс мортӧн, сё мортӧн, ветымын мортӧн да дас мортӧн. Быд чужанкотырӧ нӧшта пукті кывкутысь йӧзӧс.

¹⁶ Тіян ёрдысьяслы ме тшӧкті: ”Кывзӧй вокъяснытӧ да мыждӧй найӧс веськыда, кор вокъяс костын либӧ израильса морт да йӧз муысь локтысь костын кыптас зык-вен.

¹⁷ Ёрд вылын ӧткодя кывзӧй тӧдчана да абу тӧдчана мортӧс. Энӧ полӧй мортысь, ӧд мыждӧмыс Енсянь. А могыс кӧ тіянлы сьӧкыд, локтӧй ме дорӧ, и ме ачым видлала сійӧс”.

¹⁸ Сійӧ кадас ме висьталі тіянлы ставсӧ, мый тіянлы колӧ вӧчны.

¹⁹ Хорив керӧссянь ми мӧдӧдчим водзӧ, мунім паськыд да повзьӧдана овтӧминӧд. Сійӧс ті аддзылінныд, кор ми мунім аморейяслӧн керӧсвыв мулань асланым Господь Енлӧн тшӧктӧм серти. Сэсся ми воим Кадеш-Варниӧ.

²⁰ Сэні ме тіянлы шуи: ”Ми воим аморейяслӧн керӧсвыв муӧ, мый Господь, миян Енным, сетас миянлы.

²¹ Господь, тіян Енныд, сетас тіянлы тайӧ мусӧ. Мунӧй да босьтӧй сійӧс аслыныд, кыдзи Господь, тіян батьяслӧн Ен, тшӧктіс тіянлы. Энӧ полӧй да энӧ тіралӧй!”

²² Но ті ставныд локтінныд ме дінӧ да шуинныд: ”Мӧдӧдамӧй водзвыланым йӧзӧс, кодъяс ветласны тӧдмавны мусӧ да висьталасны, кутшӧм туйӧд миянлы мунны да кутшӧм каръясӧ пырны”.

²³ Ме шуи, мый тайӧ бур. Сэки ме бӧрйи тіян пӧвстысь дас кык мортӧс, быд чужанкотырысь ӧтиӧс.

²⁴ Найӧ мунісны, кайисны керӧсвыв муӧ да сэтысянь воисны Эшкол ковтысӧ. Мусӧ видзӧдалӧм бӧрын

²⁵ найӧ вайисны миянлы сэтчӧс вотӧссӧ. Найӧ юӧртісны, мый муыс, кодӧс сетӧ миянлы Господь, миян Енным, бур.

²⁶ Но ті энӧ кӧсйӧй муннысӧ, ті пыксинныд асланыд Господь Енлӧн тшӧктӧмлы.

²⁷ Асланыд чомъясын ті ропкинныд: ”Господь мустӧмтӧ миянӧс. Сійӧ петкӧдіс миянӧс Египет муысь, медым сетны миянӧс аморейяслӧн киӧ да бырӧдны миянӧс.

²⁸ Кытчӧ миянлы муннысӧ? Ми повзим, кор вокъясным висьталісны, сэні пӧ йӧзыс миян дорысь унджыкӧсь да ёнӧсь, и налӧн ыджыд изкаръясыс пӧ зурасьӧны енэжӧдз. Висьталісны, весиг енак войтырӧс пӧ аддзылім”.

²⁹ Сэки ме шуи тіянлы: ”Энӧ полӧй наысь да энӧ тіралӧй.

³⁰ Господь, тіян Енныд, мунӧ тіян водзвылын. Сійӧ вермасьӧ тіян пыдди. Асланыд синмӧн ті аддзылінныд, мый Сійӧ вӧчис тіянлы Египетын.

³¹ Овтӧминын ті аддзылінныд, мый Господь, тіян Енныд, нуис тіянӧс ки вылас, кыдзи бать нуӧ ассьыс писӧ. Татчӧ вотӧдзныд Сійӧ пыр нуис тіянӧс ки вылас”.

³² Но ті энӧ эскӧй Господьлы, асланыд Енлы,

³³ коді муніс тіян водзвылын, медым корсьны тіянлы сувтланінъяс. Войнас Сійӧ муніс би сюръя пытшкын, а луннас – кымӧр сюръя пытшкын. Татшӧм ногӧн Сійӧ индыліс тіянлы туйсӧ.

³⁴ Кор Господь [Ен] кыліс тіянлысь кывъястӧ, Сійӧ скӧрмис да кыв сетӧмӧн шуис:

³⁵ ”Ӧнія олысьясысь, тайӧ шогмытӧм йӧзысь, некод оз аддзы бур мусӧ, мый Ме кыв сетӧмӧн кӧсйыси сетны тіян батьяслы.

³⁶ Сійӧ мусӧ аддзас сӧмын Ефуннилӧн Калев пиыс, ӧд сійӧ кывзысис Менсьым. Сылы да сысянь чужысьяслы Ме, Господь, сета мусӧ, кытчӧ сійӧ кокнас тувччыліс”.

³⁷ Тіян вӧсна Господь скӧрмис тшӧтш ме вылӧ да шуис: ”Тэ он пыр сійӧ муас,

³⁸ но Навлӧн Исус пиыс, коді отсасьӧ тэныд, пырас сэтчӧ. Ышӧд сійӧс, ӧд сылы ковмас пыртны Израиль войтырӧс налы сетӧм муӧ.

³⁹ Тайӧ муас пырасны тіян ныв-пиныд, кодъяс оз на кужны торйӧдны бурсӧ лёксьыс. На йылысь ті шулінныд, мый шедасны вӧрӧг киӧ, но налы Ме сета Ханаан му, и найӧ босьтасны сійӧс аслыныс.

⁴⁰ А ті бӧр бергӧдчӧй да мунӧй овтӧминӧ Гӧрд саридзлань”.

⁴¹ Сэки ті шуинныд меным: ”Ми мыж вӧчим Господьлы [миян Енлы] паныд. Ми мунам да тышкасям, кыдзи тшӧктіс миянлы Господь, миян Енным”. Ті босьтінныд шыпуртъяснытӧ да зэв кокньыда кӧсйинныд кайны керӧсвыв муӧ.

⁴² Сэки Господь тшӧктіс висьтавны тіянлы: ”Энӧ мунӧй да энӧ петӧй тышӧ, ӧд Ме ог ло тіянкӧд! Мунанныд кӧ, вӧрӧгныд вермас тіянӧс”.

⁴³ Ме висьталі тайӧс тіянлы, но ті энӧ кывзысьӧй, а пыксинныд Господьлӧн тшӧктӧмлы. Ті асныралінныд да мӧдӧдчинныд кайны керӧсвыв муӧ,

⁴⁴ кӧні олісны аморейяс. Но зі чукӧр моз найӧ уськӧдчисны тіян вылӧ, пасьвартісны тіянӧс Сеир керӧсвыв муын да вӧтӧдісны Хормаӧдз.

⁴⁵ Локтӧм бӧраныд ті бӧрдінныд Господь водзын, но Господь эз кыв и эз кывзы тіянӧс.

⁴⁶ Та вӧсна тіянлы ковмис кольччыны Кадешӧ дыр кежлӧ».