Галатӧ 3 - Коми Библия 2023

Индӧд да эскӧм

¹ Ті, галатса эскысьяс, дзикӧдз вежӧртӧ воштӧмныд! Коді тіянлысь синнытӧ пӧртіс, мый энӧ кывзысьӧй збыльыслысь? Ӧд тіян син водзын, позьӧ шуны, вӧлі тувъялӧма Исус Кристосӧс.

² Ӧтитор кӧсъя юавны: Индӧд серти уджъясӧн али кывлӧм Бур Юӧрӧ эскӧмӧн ті сибӧдінныд Вежа Ловсӧ?

³ Сы выйӧдз-ӧ ті вежӧртӧмӧсь? Лов вынӧн панінныд, ас вынӧн помаланныд?

⁴ Весьшӧрӧ ӧмӧй сы мында сьӧкыдсӧ ті нуинныд? Дерт, энӧ весьшӧрӧ.

⁵ Енмыс ӧмӧй Индӧд серти уджъясныд вӧсна сетӧ Вежа Ловсӧ да вӧчӧ тіян пӧвстын шензьӧданаторъяссӧ? Оз ӧмӧй кывлӧм Бур Юӧрӧ эскӧмныд вӧсна?

⁶ Ӧвраам эскис Енлы, та вӧсна Енмыс шуис сійӧс веськыдӧн.

⁷ Тӧдӧй, мый эскысьяс – Ӧвраамлӧн ныв-пи.

⁸ Гижӧдас водзвыв висьталӧма, мый эскӧм вӧсна Ен шуас веськыдӧн мукӧд войтыръясысь эскысьясӧс. Медводз Ӧвраамлы вӧлі юӧртӧма: «Тэ пыр вуджас бурсиӧмыс быд войтырлы».

⁹ Сідзкӧ, эскысь Ӧвраамкӧд бурсиӧма быд эскысьӧс.

¹⁰ А Индӧдӧ кутчысьысьяс ёрӧм улынӧсь. Ӧд гижӧма: «Ёрӧм улӧ веськалӧ быдӧн, коді оз ов став тшӧктӧмыс серти, мый гижӧма Индӧд небӧгӧ».

¹¹ Индӧд пыр мортыс оз ло Ен водзын веськыдӧн – тайӧ гӧгӧрвоана. Ӧд веськыда олысь эскӧмнас кутас овны.

¹² Индӧдыс оз подулась эскӧм вылӧ. Гижӧма: «Индӧд серти олысь Индӧднас пондас овны».

¹³ Кристос ньӧбис миянӧс Индӧдыслӧн ёрӧм улысь, кор Сійӧс вӧлі ёрӧма миян пыдди. Ӧд гижӧма: «Ёрӧма быдӧнӧс, кодӧс ӧшӧдӧма пу вылӧ».

¹⁴ Тадзи лои, медым Ӧвраамлы кӧсйысьӧм бурсиӧмыс вуджис быд войтырлы Исус Кристос пыр, да медым кӧсйысьӧм Ловсӧ ми сибӧдім эскӧмӧн.

Кӧсйысьӧм да Индӧд

¹⁵ Вокъяс, весигтӧ олӧмас тадзи овлӧ: мортыс кӧ кольӧ ас бӧрсяыс вынсьӧдӧм кӧсйысян гижӧд, сэки некод оз вермы торкны гижӧмасӧ да мыйкӧ содтыны сэтчӧ.

¹⁶ Кӧсйысьӧмсӧ вӧлі сетӧма Ӧвраамлы да сысянь чужысьлы. Абу шуӧма ”чужысьяслы”, шуӧма ”тэсянь чужысьлы”. Тайӧс шуӧма Кристос йылысь.

¹⁷ Ме кӧсъя шуны: нёльсё комын во бӧрын петӧм Индӧдыс оз вермы бокӧ вештыны Кристос йылысь Енлысь кӧсйысьӧмсӧ да бырӧдны сійӧс.

¹⁸ Индӧд пыр кӧ вуджӧ вичмӧдӧмаыс, сэки сійӧ оз ло кӧсйысьӧм пыр. Ӧвраамлы Енмыс сетіс вичмӧдӧмасӧ кӧсйысьӧм пыр.

Мыйла колӧ Индӧдыс?

¹⁹ Мыйла, сідзкӧ, колӧ Индӧдыс? Сійӧс сетӧма вӧлі бӧрынджык йӧзыслӧн мыж вӧчӧм вӧсна, и вӧлі вына кӧсйысьӧм серти чужысьлӧн локтӧдз. Индӧдсӧ сетӧма анделъяс пыр да шӧракостас сулалысьлӧн киӧн.

²⁰ Но ӧти дырйи шӧракостас сулалысьыс оз овлы, а Енмыс – ӧти.

²¹ Индӧдыс ӧмӧй паныд Ен кӧсйысьӧмлы? Абу! Индӧдыс кӧ вермис сетны олӧм, сэки веськыдлунсӧ эськӧ босьтім Индӧдыс пыр.

²² Гижӧдыс йӧртіс ставнысӧ мыж улас. Та вӧсна кӧсйысьӧмасӧ эскысьяс вермасны босьтны Исус Кристослы эскӧм пыр.

²³ Эскан кадыс вотӧдз ми вӧлім Индӧдлӧн синъялӧм улынӧсь, вӧлім кӧртӧдынӧсь эскӧм воссьытӧдзыс.

²⁴ Тадзи Индӧдыс быдтіс-видзис миянӧс Кристос локтӧдз, медым эскӧм пыр ми лоим веськыдӧсь.

²⁵ Кор воис эскан кадыс, ми мынім видзысьлӧн синъялӧмысь.

²⁶ Исус Кристослы эскӧм пыр ті ставныд – Енлӧн ныв-пи.

²⁷ Ті пыртчинныд Кристосӧ, сідзкӧ, тіян паськӧмныд – Кристос.

²⁸ Иудей-ӧ тэ либӧ грек, кесйӧг-ӧ либӧ мездлуна морт, айлов-ӧ либӧ ань – Исус Кристос пытшкын торъялӧмыс абу.

²⁹ Ті кӧ Кристослӧн, сідзкӧ, ті – Ӧвраамсянь чужысьяс да кӧсйысьӧмасӧ босьтысьяс.