Галатӧ 1 - Коми Библия 2023

¹ Гижӧ Павел. Менӧ пуктӧма апостолавны абу йӧз кӧсйӧм серти. Эз морт менӧ пукты апостолӧ, а Исус Кристос да Сійӧс ловзьӧдысь Ен Бать.

² Вокъяскӧд ставӧн ми чолӧмалам галатса вичкояс.

³ Буралӧм да лӧнь олӧм тіянлы Ен Батьсянь да миян Господь Исус Кристоссянь.

⁴ Ен Батьнымлӧн кӧсйӧмыс серти Кристос сетіс Асьсӧ миян мыжъяс вӧсна, медым мездыны миянӧс лёкнас тырӧм муюгыдсьыс.

⁵ Ошкӧм Сылы нэмъяс чӧж! Аминь.

Эм сӧмын ӧти Бур Юӧр

⁶ Ме шензя: ті сэтшӧм ӧдйӧ кежинныд Сыысь, коді Кристослӧн буралӧмнас корис тіянӧс. Кутшӧм тэрыба ті сибӧданныд мӧдпӧлӧс бур юӧрсӧ.

⁷ Збыльвылас кӧ, мӧд бур юӧрыс абу, эмӧсь сӧмын тіянӧс шӧйӧвоштысьяс. Найӧ кӧсйӧны дзугны Кристос йылысь Бур Юӧрсӧ.

⁸ Но весиг кӧ ми либӧ енэжсянь андел пондам висьтавны мӧд нога, огӧ сійӧ Бур Юӧрсӧ, мый водзынсӧ тіянлы висьтавлім – мед лоӧ ёрӧма!

⁹ Водзынсӧ ми шулім нин, ӧні нӧшта шуа: пондас кӧ кодкӧ висьтавны оз сійӧ Бур Юӧрсӧ, мый ті миянсянь сибӧдінныд, мед лоӧ ёрӧма сійӧс!

¹⁰ Йӧзсянь-ӧ, Енсянь-ӧ виччыся ме ошкӧмсӧ? Йӧзлы ӧмӧй зіля шогмынысӧ? Ме кӧ зіли шогмыны йӧзлы, сэки эськӧ эг вӧв Кристослӧн кесйӧг.

Ен кӧсйӧм серти апостол

¹¹ Вокъяс, тӧдӧй: меӧн висьталӧм Евангелльӧыс абу мортсянь.

¹² Эг мортсянь ме босьт сійӧс, эз морт менӧ велӧд, но ачыс Исус Кристос восьтіс меным сійӧс.

¹³ Ті, дерт, кывлінныд, мый водзынсӧ ме иудей эскӧм дор вӧлі, ёна вӧтлі Енлысь вичкосӧ да зіли бырӧдны сійӧс.

¹⁴ Иудей эскӧмын ме пановті тшӧтшъяясӧс, ме вӧлі чорыда кутчысьӧма батьяслӧн шуӧмӧ.

¹⁵ Но Енмыс менӧ мам кынӧмсянь нин бӧрйӧма да Аслас буралӧмнас корӧма.

¹⁶ Сійӧ восьтіс меным Ассьыс Писӧ, медым ме висьтавлі Сы йылысь Бур Юӧрсӧ ентӧдтӧмъяслы. Сэки ме эг кут корсьны мортсянь туйдӧдӧм,

¹⁷ весиг эг мун Ерусалимӧ меӧдз на пуктӧм апостолъяс дінӧ. Ме муні Аравияӧ, сэсянь бӧр локті Дамаскӧ.

¹⁸ Сӧмын куим во мысти ветлі Ерусалимӧ тӧдмасьны Петыркӧд да кык вежон олі сы ордын.

¹⁹ Мукӧд апостолсӧ ме эг аддзыв Господьлысь Яков воксӧ кындзи.

²⁰ Ен водзын шуа: мый гижа тіянлы, ставыс тайӧ збыль.

²¹ Сэсся ме муні Сирия да Киликия муясӧ.

²² Иудеяын Кристослӧн вичкояс менӧ весиг эз на аддзывны.

²³ Сӧмын кывлӧмаӧсь ме йылысь, миянӧс пӧ вӧтлысь, эскӧмсӧ бырӧдысь ӧні ачыс ышӧдӧ эскыны.

²⁴ Найӧ аттьӧалісны да ошкисны Енсӧ меысь.