Филипӧ 4 - Коми Библия 2023

Павеллӧн туйдӧдӧм-велӧдӧм

¹ Муса вокъясӧй, ме ёна гажтӧмтча тіянысь. Ті – менам нимкодьлунӧй да ошйысян юркытшӧй. Мусаяс, зумыда кутчысьӧй Господькӧд ӧтувъя олӧмас!

² Кора Еводияӧс да Синтикияӧс: воӧй ӧти кывйӧ, ӧд ті Господьлӧн.

³ Кора тэнӧ, эскана уджъёртӧй, отсав тайӧ аньясыслы. Кор ме висьтавлі Бур Юӧрсӧ, найӧ пыр вӧліны мекӧд, кыдзи и Климент да мукӧд уджалысьяс, кодъяслысь нимъяссӧ гижӧма Олӧмыслӧн небӧгӧ.

⁴ Дугдывтӧг нимкодясьӧй Господь пытшкын! Нӧшта шуа: нимкодясьӧй!

⁵ Тіян рамлунныд мед тыдалас быдӧнлы. Господь матын нин.

⁶ Нинӧм вӧсна энӧ майшасьӧй. Енсӧ аттьӧалӧмӧн да Сылы кевмысьӧмӧн вайӧй Сы водзӧ став ассьыныд корӧм-кӧсйӧмнытӧ.

⁷ Сэки вежӧрӧ тӧртӧм Енлӧн лӧньлуныс видзас тіянлысь сьӧлӧмнытӧ да мӧвпъяснытӧ Исус Кристос пытшкын.

⁸ Вокъяс, нӧшта кора тіянӧс: мӧвпалӧй сӧмын збыльыс, шогманаыс, веськыдыс, сӧстӧмыс, бурыс, мичаыс, ошканаыс да нимкодьыс йылысь.

⁹ Вӧчӧй сійӧ, мый ті кывлінныд, мыйӧ велӧдчинныд, мый тӧдмалінныд да месянь босьтінныд. Сэки лӧньлуныслӧн Ен лоӧ тіянкӧд.

Исус Кристоскӧд ставыс вермана

¹⁰ Господь водзын ме ёна нимкодяся, ӧд ті бара кутінныд тӧждысьны ме вӧсна. Дерт, ті век кӧсйинныд тӧждысьны ме вӧсна, но водзынсӧ тіян эз вӧв позянлуныс.

¹¹ Висьтала тайӧс ог сы понда, быттьӧ меным мыйкӧ оз тырмы, ӧд ме велалі овны сійӧн, мый эм.

¹² Кужа овны гӧля, кужа овны и лышкыда. Ставсӧ видлі да тӧдлі: пӧтлунсӧ и тшыглунсӧ, лышкыда олӧмсӧ и гӧльлунсӧ.

¹³ Ставсӧ верма менӧ ёнмӧдысь Исус Кристоскӧд!

¹⁴ Дерт, ті бура вӧчинныд, мый ті юкинныд менсьым сьӧкыдлунӧс.

¹⁵ Филипса эскысьяс, ті ӧд тӧданныд, мый Македонияысь мунӧм бӧрын, Бур Юӧрсӧ висьтавлыны заводитігӧн, весиг ӧти вичко эз отсав меным сьӧмӧн. Сӧмын ті отсалінныд.

¹⁶ Весиг Фессалоникаӧ гоз-мӧдысь мӧдӧдлінныд меным олӧм вылӧ.

¹⁷ Дерт, ме ог виччысь тіянсянь сетӧмторъяс, сӧмын кӧсъя, медым тіян сетӧмторныд уна пӧвстӧн бӧр бергӧдчис тіянлы.

¹⁸ Епафродит сетіс тіянлысь мӧдӧдӧмторнытӧ, ӧні менам ставыс эм, весиг коланасьыс унджык на. Тіян сетӧмторныд – Енлы шогмана чӧскыда ӧвтан вись кодь, тайӧ Сылы сьӧлӧм сертиыс.

¹⁹ Менам Енмӧй мед сетас тіянлы Исус Кристос пыр Аслас дзирдлуна озырлунысь став коланаторсӧ.

²⁰ Ен Батьнымлы ошкӧм нэмъяс чӧж! Аминь.

Чолӧмъяс

²¹ Чолӧмалӧй Исус Кристослы став эскысьсӧ. Мекӧд олысь вокъяс ыстӧны тіянлы чолӧм.

²² Нӧшта ыстӧны чолӧм став вежа войтырыс, торъя нин, кесар керкаысь кесйӧгъяс.

²³ Господь Исус Кристослӧн буралӧмыс ставныдкӧд тіянкӧд. Аминь.