Филипӧ 3 - Коми Библия 2023

Энӧ кутӧй лача ас выланыд

¹ Нӧшта вокъясӧй, нимкодясьӧй Господь пытшкын! Та йылысь меным абу сьӧкыд казьтывлыны тіянлы, ӧд тайӧ видзас тіянӧс лёксьыс.

² Видзчысьӧй ”понъясысь”, ӧд тайӧ лёк вӧчысьясыс тшӧктӧны вундыштчыны.

³ Збыль вундыштчӧмаясыс – тайӧ ми, ӧд ми кесъялам Енлы Сылӧн Лов нуӧдӧм улын. Ми ошйысям Исус Кристосӧн, огӧ ас выланым лача кутӧй,

⁴ кӧть ме эськӧ верми ас вылӧ лача кутны. Кодкӧ мӧвпалӧ кӧ ас вылас лача кутны, мукӧд дорсьыс ме ёнджыка на верма тадзи вӧчны.

⁵ Ӧд менӧ вундыштӧма вӧлі кӧкъямысӧд лунӧ, петі Израиль войтырысь, Венямин чужанкотырысь, бать-мамӧй – иудейяс, Индӧд серти ме – фарисей.

⁶ Ен вӧсна тӧждысьӧмӧй петкӧдчис сыын, мый вӧтлі Енлысь вичкосӧ. Индӧд серти ме вӧлі веськыдӧн да мыжтӧмӧн.

⁷ Водзынсӧ ставсӧ тайӧс лыдди медколанаӧн, ӧні Кристос вӧсна лыддя нинӧмӧн.

⁸ Ставсӧ тайӧс пукта нинӧм туйӧ, ӧд Исус Кристосӧс, ассьым Господьӧс, тӧдӧм дорысь нинӧм абу ыджыдджыкыс. Кристос вӧсна эновті ставсӧ, ставсӧ лыддя ёгӧн, медым ме озырми Кристосӧн

⁹ да лои Сы пытшкын веськыдӧн эг Индӧд серти уджъясӧй вӧсна, а Кристослы эскӧм вӧсна. Ӧд веськыдлунсӧ Енмыс сетӧ мортлы сӧмын Кристослы эскӧм пыр.

¹⁰ Кӧсъя тӧдны Кристосӧс да Сійӧс ловзьӧдысь вынсӧ, кӧсъя тшӧтш юкны Сылысь сьӧкыдалӧмсӧ да кувны Сы моз,

¹¹ медым верми ловзьыны кулӧмысь.

Тэрмасьӧй воны тыр-бурас

¹² Ме ог шу, мый вои нин тыр-бурас, но зіля воны тыр-бурас, ӧд татчӧ менӧ корис Исус Кристос.

¹³ Вокъяс, ме ог шу, мый вои нин тыр-бурас, но важсӧ вунӧдӧмӧн зіля мунны водзӧ

¹⁴ да воны помӧдзыс, мед босьтны тырдонсӧ – енэжвывса олӧм, кытчӧ Енмыс корӧма миянӧс Исус Кристос пыр.

¹⁵ Сідзкӧ, коді миян пиысь лыддьӧ асьсӧ тыр-бурас воысьӧн, сійӧ мед мӧвпалӧ миян моз. А мӧвпаланныд кӧ мӧд ногӧн, Енмыс восьтас тайӧс тіянлы.

¹⁶ Но мыйӧдз воим нин, кутам водзӧ тадзи мӧвпавны да овны.

¹⁷ Вокъяс, видзӧдӧй ме вылӧ да велӧдчӧй овны на моз, кодъяс олӧны миян моз.

¹⁸ Ӧд Кристослӧн крестлы унаӧн паныд сувтӧны. Та йылысь висьтавлі нин тіянлы, ӧні нӧшта на синва сорӧн казьтышта.

¹⁹ Налӧн помыс – кулӧм, налӧн енмыс – рушкуныс, найӧ ошйысьӧны асланыс янӧдан уджъясӧн. Найӧ мӧвпалӧны сӧмын мувывсаыс йылысь.

²⁰ Но миян оланінным енэжас. Сэсянь виччысям Мездысьӧс – миян Господь Исус Кристосӧс.

²¹ Енмыс сетіс Сылы вын веськӧдлыны ставнас. Тайӧ выннас Кристос вежас миянлысь кулана вир-яйнымӧс да сетас миян вир-яйлы Ассьыс дзирдлунсӧ.