Филипӧ 2 - Коми Библия 2023

Тӧждысьӧй ӧта-мӧдныд вӧсна

¹ Кристоскӧд олӧмыс кӧ ышӧдӧ тіянӧс, Сылӧн муслуныс кӧ бурӧдӧ тіянӧс, Енлӧн Лолыс кӧ ӧтвывтӧ тіянӧс, ті кӧ меліӧсь да бур сьӧлӧмаӧсь ӧта-мӧдныд дінӧ,

² сідзкӧ, отсалӧй меным ёнджыка на нимкодясьны. Радейтӧй ӧта-мӧднытӧ ӧтмоза, олӧй ӧти сьӧлӧмӧн да ӧти мӧвпъясӧн, тіян костын мед лоӧ ӧтувъялун.

³ Нинӧм энӧ вӧчӧй асьнытӧ петкӧдлӧм могысь да вылӧ кыпӧдчӧм могысь. Быдӧн мед рам сьӧлӧмӧн пуктӧ мӧдсӧ ассьыс вылӧджык

⁴ да тӧждысьӧ оз сӧмын ас вӧснаыс, тшӧтш мукӧдыс вӧсна.

Олӧй Кристос моз

⁵ Мӧвпалӧй да вӧчӧй Исус Кристос моз.

⁶ Сійӧ вӧлі Енмыс кодь, но эз ошйысь тайӧ ӧткодьлунас.

⁷ Асьсӧ Сійӧ увтыртіс, кесйӧг туйӧ пуктіс. Чужис морт кодьӧн, морт вир-яйын оліс.

⁸ Асьсӧ Сійӧ улӧ пуктіс, кывзысис весиг кувтӧдзыс, крест вылын кувтӧдзыс.

⁹ Та вӧсна Енмыс кыпӧдіс Сійӧс ставсьыс медвылӧ, сетіс Сылы став нимсьыс медыджыд ним,

¹⁰ медым енэжас, му вылас да му пыдӧсас быд олысь пидзӧсчанясис Исус ним водзын,

¹¹ медым Ен Батьӧс ошкӧм могысь быд морт шуис: «Исус Кристос эм Господь».

Лоӧй кывзысьысьясӧн

¹² Мусаяс, кор ме вӧлі тіян дінын, ті пыр кывзысинныд менсьым. Сідзкӧ, ӧні, кор абу тіянкӧд, ёнджыка на кывзысьӧй да тӧждысьӧй асланыд мездмӧм вӧсна полӧмӧн да тіралӧмӧн.

¹³ Ӧд Ачыс Енмыс уджалӧ тіян пытшкын, медым ті кӧсйинныд вӧчны да вӧчинныд Сылӧн бур кӧсйӧмыс серти.

¹⁴ Ставсӧ вӧчӧй шуасьтӧг да зыксьытӧг,

¹⁵ медым ті вӧлінныд Енлӧн сӧстӧм, мыжтӧм да пежасьтӧм челядьӧн. Сэки тайӧ тшыксьӧм да пежасьӧм йӧз пӧвстас ті лоанныд дзирдалысь кодзувъяс кодьӧсь.

¹⁶ Кутчысьӧй олӧмыслӧн кывйӧ, сэки Кристослӧн лунӧ ме верма ошйысьны, мый эг весьшӧрӧ уджав да мырсьы тіян пӧвстын.

¹⁷ Весиг ковмас кӧ кисьтны ассьым вирӧс да вайны ачымӧс вись пыдди тіян эскӧмныд вӧсна, тіянкӧд ӧтвыв кута нимкодясьны.

¹⁸ Сідзкӧ, ті тшӧтш нимкодясьӧй, мекӧд ӧтвыв нимкодясьӧй.

Тимофей да Епафродит – Кристослӧн бур кесъялысьяс

¹⁹ Господь Исус вылӧ лача кутӧмӧн чайта регыдъя кадӧ мӧдӧдны тіян дінӧ Тимофейӧс, медым тӧдмавны тіян олӧм-вылӧм йылысь. Тайӧ ваяс меным ышӧдӧм-ёнмӧдӧм.

²⁰ Тимофей сьӧлӧмсяньыс тӧждысьӧ тіян вӧсна, сы кодь мӧдыс абу.

²¹ Ставныс сӧмын ас вӧснаныс тӧждысьӧны, оз Исус Кристослы кесъялӧм вӧсна.

²² Ті тӧданныд Тимофейлысь зільӧмсӧ. Бур Юӧр висьтавлігӧн сійӧ отсасис меным пи моз.

²³ Лача кута, мый верма мӧдӧдны сійӧс тіян дінӧ дзик пыр, кор сӧмын тӧдмала, мый лоӧ мекӧд водзӧ.

²⁴ Эска Господьлы, мый регыд ме тшӧтш локта тіян дінӧ.

²⁵ Но медводз лыддя коланаӧн мӧдӧдны тіян дінӧ Епафродит вокӧс, ассьым уджъёртӧс да отсасьысьӧс. Ті мӧдӧдлінныд сійӧс, медым сетны меным колана отсӧг.

²⁶ Сійӧ ёна гажтӧмтчӧ тіян вӧсна да шогсьӧ, мый ті тӧданныд сылӧн висьӧм йылысь.

²⁷ Епафродит ёна висис да вӧлі куланвыйын, но Енмыс вӧлі бур сьӧлӧма сы дінӧ, и эз сӧмын сы дінӧ, тшӧтш ме дінӧ, медым менам шогӧй эз сод.

²⁸ Та вӧсна ӧдйӧджык мӧдӧда сійӧс тіян дінӧ, медым бара верминныд аддзысьны сыкӧд да нимкодясьны. Сэки ме этшаджык кута шогсьыны.

²⁹ Сибӧдӧй Епафродитӧс нимкодьпырысь, ӧд сійӧ кесъялӧ Господьлы. Татшӧм йӧзсӧ вылӧ донъялӧй.

³⁰ Кристослы кесъялігӧн сійӧ ӧдва эз кув, ӧдва эз вошты ассьыс олӧмсӧ, но отсасис меным, кор ті энӧ вермӧй отсасьнысӧ.