Филимонлы 1 - Коми Библия 2023

¹ Гижӧ Павел. Исус Кристос вӧсна ме пукала дзескыдінын. Тимофей воккӧд ми чолӧмалам муса Филимон уджъёртнымӧс.

² Чолӧмалам дона Апфия чойӧс да миянкӧд ӧтвыв вермасьысь Аркип ёртӧс да сы ордын чукӧртчысь эскысьясӧс.

³ Буралӧм да лӧнь олӧм тіянлы Ен Батьнымсянь да Господь Исус Кристоссянь.

Павел аттьӧалӧ Енмӧс Филимонысь

⁴ Кевмысигам ме век казьтывла тэнӧ да аттьӧала Енмӧс.

⁵ Ме кывлі Исус Господьлы тэнад эскӧм йылысь да став вежа войтыр дінӧ муслуныд йылысь.

⁶ Кевмыся, медым миян ӧтувъя эскӧмным отсалас тэныд тӧдны быд бурсӧ, мый сетӧма Исус Кристос пытшкын.

⁷ Вокӧй, тэнад муслуныд ёна долыдмӧдӧ да ышӧдӧ миянӧс, ӧд тэ лӧньӧдан вежа войтырлысь сьӧлӧмсӧ.

Ӧнисим вӧсна корӧм

⁸ Ме, дерт, верма Кристос нимӧн тшӧктыны тэныд вӧчны коланасӧ,

⁹ но муслунӧй вӧсна шыася тэ дінӧ корӧмӧн. Ме, пӧрысь Павел, Исус Кристос вӧсна пукалысь,

¹⁰ кора тэнӧ Ӧнисим пиӧй вӧсна. Сійӧс ме чужті тані дзескыдінын.

¹¹ Коркӧ сійӧ ковтӧм вӧлі тэныд, ӧні ёна колана тэныд да меным. Ме бӧр мӧдӧда сійӧс тэ дінӧ.

¹² Сибӧд сійӧс сьӧлӧм бердысь чуктӧдӧмторйӧс моз.

¹³ Кӧсйи сійӧс кольӧдны ас дінӧ, мед тэ пыдди отсасьыштас меным Бур Юӧр вӧсна пукалігӧн.

¹⁴ Но тэнад шутӧг нинӧм ог кӧсйы вӧчны, мед эськӧ тэ бурсӧ вӧчин ас кӧсйӧмӧн, а эн мырдӧн.

¹⁵ Гашкӧ, и колӧ вӧлі сылы кад кежлӧ тэкӧд янсӧдчывнысӧ, медым сэсся тэ сибӧдін сійӧс пыр кежлӧ.

¹⁶ Сибӧдін эн нин кесйӧгӧс моз, но кесйӧгысь донаджыкӧс – муса вокӧс моз. Меным сійӧ ёна муса. Но тэныд сійӧ ёна мусаджык на, ӧд сійӧ ас морт кодь, нӧшта Господь пытшкын вок.

¹⁷ Тэ кӧ шуан менӧ аслад вокӧн, сибӧд сійӧс менӧ моз.

¹⁸ Тэнӧ кӧ сійӧ мыйӧнкӧ дойдіс-дӧзмӧдіс либӧ уджйӧза тэныд, ӧшӧд ставсӧ ме вылӧ.

¹⁹ Ме, Павел, аслам киӧн гижа: «Ме мынтыся». Шуны кӧ, тэ ачыд став олӧмнад меным уджйӧза.

²⁰ Вокӧй, Господь нимсянь вӧч меным тайӧ бурторсӧ, лӧньӧд менсьым сьӧлӧмӧс Господь вӧсна.

²¹ Ме эска, мый тэ кывзысян, та вӧсна и гижа. Тӧда, тэ вӧчан унджык на менам корӧм дорысь.

²² Нӧшта кора, корсьлы меным оланін. Ме лача кута, мый тіян кевмысьӧм отсӧгӧн Енмыс бӧр вайӧдас менӧ тіян дінӧ.

Чолӧмъяс

²³ Чолӧм тэныд Епафрассянь, сійӧ мекӧд пукалӧ Исус Кристос вӧсна.

²⁴ Марк, Аристарк, Димас да Лука, менам уджъёртъясӧй, тшӧтш ыстӧны чолӧм.

²⁵ Миян Господь Исус Кристослӧн буралӧмыс тіянкӧд. Аминь.