Езекиль 8 - Коми Библия 2023

Идолъяслы юрбитӧм

¹ Квайтӧд вонас квайтӧд тӧлысьлӧн витӧд лунӧ ме вӧлі гортын, и меным воча пукалісны иудаса юрнуӧдысьяс. Господь Ыджыдлӧн киыс вӧлі ме вылын.

² Ме аддзи морт мыгӧр, коді коссяньыс улӧджык югъяліс би моз, а коссяньыс вылӧджык сійӧ югъяліс-дзирдаліс ыргӧн моз.

³ Сійӧ нюжӧдіс ки сямаӧс да босьтіс менӧ юрсиӧд. Лов кыпӧдіс менӧ енэжа-муа костас да вайӧдіс Ерусалимӧ. Тайӧ вӧлі Енсянь петкӧдлӧм. Лов сувтӧдіс менӧ пытшкӧс йӧрлӧн войвывса дзиръя дорӧ, кӧні сулаліс Господьлысь вежӧгтӧмсӧ кыпӧдысь бӧлбан.

⁴ Сэні ме аддзи Израиль Енлысь сэтшӧм жӧ дзирдлунсӧ, кутшӧмӧс ме аддзылі ковтысын.

⁵ Сійӧ шуис меным: «Морт пиӧй, видзӧдлы войвылӧ». Ме видзӧдлі войвылӧ да аддзи, мый висьпуктанін дзиръя дорын сулалӧ Господьлысь вежӧгтӧмсӧ кыпӧдысь бӧлбан.

⁶ Господь шуис меным: «Морт пиӧй, аддзан-ӧ, мый вӧчӧ Израиль войтыр? Найӧ вӧчӧны зывӧксӧ, та вӧсна Ме эновта Ассьым вежаинӧс. Видзӧд, и унджык на аддзан зывӧксӧ».

⁷ Господь вайӧдіс менӧ крам йӧр пыранінӧ, и ме аддзи йӧр стенмысь розь.

⁸ Господь шуис меным: «Морт пиӧй, ыдждӧд розьсӧ». Ме ыдждӧді розьсӧ, мый позис сэті пырны.

⁹ Господь шуис меным: «Пыр да видзӧдлы, кутшӧм зывӧк найӧ вӧчӧны тані».

¹⁰ Ме пыри да аддзи, мый стен пасьталаыс вӧлі серпасалӧма гаг-веглясьысьясӧс, пеж пемӧсъясӧс да Израиль войтырлысь идолъяссӧ.

¹¹ Израиль войтырлӧн сизимдас юрнуӧдысьыс сулалісны серпасъяс водзас. Шафанлӧн Язаний пиыс тшӧтш вӧлі юрнуӧдысьяс пӧвстас. Быдӧн киас кутіс ассьыс тшынӧдчан дозсӧ, и сэтысь чӧскыд дука тшын кымӧрӧн кыптіс вывлань.

¹² Господь шуис меным: «Морт пиӧй, аддзан-ӧ, мый Израильлӧн юрнуӧдысьясыс вӧчӧны асланыс пемыд жыръясын, кӧні серпасалӧма идолъясӧс? Найӧ шуӧны, Господь пӧ оз аддзы миянӧс, Сійӧ пӧ эновтӧма тайӧ мусӧ».

¹³ Господь шуис меным: «Видзӧд, и унджык на аддзан налысь зывӧк вӧчӧмсӧ».

¹⁴ Господь вайӧдіс менӧ Господьлӧн крамӧ пыран войвыв дзиръя дорӧ. Сэні ме аддзи пукалысь аньясӧс, кодъяс бӧрдісны Таммуз идол вӧсна.

¹⁵ Господь шуис меным: «Аддзан-ӧ, морт пиӧй? Видзӧд, и унджык на аддзан зывӧксӧ».

¹⁶ Господь вайӧдіс менӧ крамлӧн пытшкӧс йӧрӧ. Крам пыранін дорын, посводз да висьпуктанін костын, сулалісны кызь вит кымын айлов. Найӧ сулалісны Господьлӧн крамлы мышкӧн, чужӧмнаныс асыввылӧ, да копрасисны шонділы.

¹⁷ Сійӧ шуис меным: «Аддзан-ӧ, морт пиӧй? Иуда войтырлы оз ӧмӧй тырмы зывӧк вӧчӧмыс? Виалӧм-дзескӧдӧмнас найӧ тыртісны мусӧ да ӧтарӧ скӧрмӧдӧны Менӧ, кор Меным ныр улӧ пуктӧны пу вожъяс.

¹⁸ Та вӧсна Ме кисьта на вылӧ Ассьым скӧрлунӧс, ог жалит найӧс да ог бурсьӧлӧмтчы на дінӧ. Мед гораа горзӧны Меным, но Ме ог кыв найӧс».