Езекиль 7 - Коми Библия 2023

Израильӧс бырӧдӧм

¹ Меным вӧлі Господьсянь кыв:

² – Морт пиӧй, [висьтав, мый] Господь Ыджыдыс тадзи висьталӧ: Израиль мулы воис пом. Мусӧ помсянь помӧдз лоӧ бырӧдӧма.

³ Израиль, тэныд воис пом. Ме кисьта тэ вылӧ Ассьым скӧрлунӧс, мыжда тэнӧ олан туйыд серти, мынтыся зывӧк вӧчӧмсьыд.

⁴ Ме ог жалит тэнӧ, ог бурсьӧлӧмтчы тэ дінӧ. Ме мынтыся тэныд олан туйыд серти, зывӧк вӧчӧмсьыд тэ кывкутан. Сэки ті тӧдмаланныд, мый Ме – Господь.

⁵ Господь Ыджыдыс тадзи висьталӧ: шог бӧрся шог локтӧ,

⁶ тэныд пом воӧ, тэнӧ бырӧдӧм виччысьӧ.

⁷ Мыждӧм суис тіянӧс, Израиль муын олысьясӧй. Воис кад, матын сійӧ луныс, кор шызьӧм кутас кывны керӧсъяс вылын, а оз нимкодясьӧм.

⁸ Регыд Ме кисьта тіян вылӧ Ассьым скӧрлунӧс, Ассьым ярлунӧс петкӧдла тіянлы. Ме мыжда тіянӧс олан туйныд серти, мынтыся зывӧк вӧчӧмсьыныд.

⁹ Ме ог жалит тіянӧс, ог бурсьӧлӧмтчы тіян дінӧ. Ме мынтыся тіянлы олан туйныд серти, зывӧк вӧчӧмсьыныд ті кывкутанныд. Сэки ті тӧдмаланныд, мый Ме – мыждысь Господь.

¹⁰ Матыстчӧ сійӧ луныс, суас тіянӧс мыждӧмыс. Дзескӧдӧмӧн юралӧм паськалӧ, ыкшалун быдмӧ,

¹¹ виалӧм-дзескӧдӧм содӧ, сійӧ – лёк вӧчысьяс киын бедь. Весиг морт оз коль налӧн ызгысь чукӧрысь, налӧн озырлунысь нинӧм оз коль, налӧн вылӧ кыпӧдчӧмыс бырас.

¹² Воис кад, матыстчӧ лун. Ньӧбысь мед оз нимкодясь, вузалысь мед оз бӧрд, ӧд ставныс вылӧ киссьӧ скӧрлунӧй.

¹³ Вузалысь кӧть и ловйӧн кольӧ, но вузалӧм муас оз вермы бӧр бергӧдчыны. Пророклӧн аддзылӧмыс оз вежсьы, мыждӧмыс суас найӧс ставнысӧ. Мыж вӧчысь оз вермы видзны ассьыс олӧмсӧ.

¹⁴ Тутсӧ труба, ставсӧ дасьтӧма, сӧмын тышӧ петысьыс абу, ӧд Менам скӧрлунӧй налӧн ыджыд чукӧр вылӧ киссьӧ.

¹⁵ Ывлаын – шыпурт, керкаын – пӧрӧс висьӧм да тшыгъялӧм. Видз-му вылын шыпурт виӧ, карын тшыгъялӧм да пӧрӧс висьӧм шырӧ.

¹⁶ Ловйӧн кольысьяс керӧсӧ пышъясны, гулюяс моз кырта потасӧ дзебсясны. Быдӧн пондас ымзыны-бӧрдны аслас мыж вӧснаыс.

¹⁷ Киныс лёткысяс, пидзӧсныс дзӧрмас-лигышмунас.

¹⁸ Найӧ пасьталасны шогалан паськӧм, бритасны юрнысӧ. Полӧм-тіралӧм босьтас найӧс, яндзим вевттяс чужӧмнысӧ.

¹⁹ Найӧ эзысьнысӧ ывлаӧ шыбитасны, зарнинысӧ пежӧн лыддясны. Господьлӧн скӧралан лунӧ эзысь ни зарни оз мезды найӧс, ӧд эзысь-зарнитӧ он сёй, кынӧмтӧ наӧн он пӧткӧд. Буретш эзысь-зарниӧ найӧ крукасисны, мыжас вӧйисны.

²⁰ Эзысь да зарни мичмӧдчанторъясӧн найӧ ошйысисны, эзысь-зарниысь зывӧк бӧлбанъяс вӧчисны. Та вӧсна налысь донаторнысӧ Ме пежӧ бергӧда,

²¹ сета йӧз муысь локтысьяслӧн киӧ. Налысь донаторъяснысӧ мырддяласны да пежаласны лёк вӧчысьяс.

²² Ме бергӧда Израиль войтырысь чужӧмӧс, и найӧ пежаласны Менсьым дона керкаӧс, мырддялысьяс пырасны сэтчӧ да пежаласны сійӧс.

²³ Найӧ вайӧдасны Израиль войтырӧс шызьӧмӧдз, ӧд муыс тырас вир кисьтӧмӧн, юркарын паськалас виалӧм-дзескӧдӧм.

²⁴ Ме вайӧда лёксьыс-лёк войтыръясӧс, и найӧ босьтасны Ерусалимын олысьяслысь керкаяссӧ. Вынаяслӧн ыкшаасьӧмлы Ме пукта пом, вежаинъяснысӧ лоӧ пежалӧма.

²⁵ Ыджыд бырӧдӧм суас найӧс, найӧ пондасны корсьны лӧньлун, но оз аддзыны.

²⁶ Шог бӧрся шог локтӧ, юӧр бӧрся – юӧр. Найӧ кутасны виччысьны, мый висьталасны пророкъяс асланыс аддзылӧм йылысь, кӧсъясны кывны попъяслысь велӧдӧмсӧ, но велӧдӧмыс оз ло, и пӧрысьяс туйдӧдны оз вермыны.

²⁷ Ӧксы пондас шогсьыны, юралысьяс повзясны, войтырыс весьӧпӧрас. Ме мынтыся налы олан туйныс серти, мыжда найӧс, кыдзи найӧ мукӧдӧс мыждісны. Сэки найӧ тӧдмаласны, мый Ме – Господь.