Езекиль 6 - Коми Библия 2023

Керӧсвывса юрбитанінъяс йылысь пророкалӧм

¹ Меным вӧлі Господьсянь кыв:

² «Морт пиӧй, бергӧд чужӧмтӧ израильса керӧсъяслань да пророкав налы паныд.

³ Тшӧкты налы кывзыны Господь Ыджыдлысь кывсӧ. Шу, мый Господь Ыджыдыс тадзи висьталӧ тіянлы, керӧсъяс да мылькъяс, ковтысъяс да сёртасъяс: – Шыпурт мӧдӧда тіян вылӧ, бырӧда вись ваян мылькъяснытӧ.

⁴ Висьпуктанінъяснытӧ куштасны, тшынӧдчанінъяснытӧ жугласны. Идолъясныд водзӧ Ме шыблала виӧмаясӧс.

⁵ Израиль пиянлысь шойяссӧ пукта идолъясныс водзӧ, лыяснысӧ пазӧда налӧн висьпуктанінъяс гӧгӧр.

⁶ Быдлаын, кӧні ті оланныд, каръясныд лоасны овтӧминӧн, вись ваян мылькъясныд – кушинӧн. Висьпуктанінъяснытӧ да идолъяснытӧ лоӧ пасьвартӧма, тшынӧдчанінъяснытӧ да киӧн вӧчӧмторъяснытӧ – дзикӧдз бырӧдӧма.

⁷ Тіян пӧвстысь унаӧс лоӧ виӧма. Сэки ті тӧдмаланныд, мый Ме – Господь!

⁸ Но ӧткымынӧс тіян пиысь Ме коля ловйӧн. Шыпуртысь мездмӧм бӧраныс найӧс лоӧ разӧдӧма мукӧд войтыръяс пӧвстӧ йӧз муясӧ.

⁹ Сэні пленын олігӧн найӧ тӧд выланыс уськӧдасны Менӧ, кор Ме жугӧда налысь сьӧлӧмсӧ да пемдӧда налысь синсӧ. Ӧд найӧ эновтісны Менӧ да кырсалысь ань моз сетчисны идолъяслы. Та бӧрын найӧ зывӧктасны асьнысӧ став пеж вӧчӧмсьыныс

¹⁰ и тӧдмаласны, мый Ме – Господь. Тӧдмаласны, мый Менам вӧлі помка, мыйла Ме шуи шог ыстыны на вылӧ.

¹¹ Господь Ыджыдыс тадзи висьталӧ: зымӧд кинад-кокнад да горзы: ”Курыд шог Израильлы сылӧн став пеж вӧчӧмсьыс”. Израиль войтыр кулас шыпурт помысь, тшыгъялӧмысь да пӧрӧс висьӧмысь.

¹² Ылі муын олысьяс пӧрӧс висьӧмысь куласны, матын олысьяс шыпурт помысь усясны, ловйӧн кольӧмаяс тшыгнысла куласны. Ме кисьта на вылӧ став Ассьым скӧрлунӧс.

¹³ Кор налӧн шойясыс кутасны туплясьны налӧн идолъяскӧд орччӧн, висьпуктанінъяс гӧгӧр, быд джуджыд мыльк вылын да быд керӧс йылын, быд пашкыр пу улын да веж коръя тупу улын – быдлаын, кӧні асланыс идолъяслы вайлісны чӧскыда ӧвтан висьяс, сэки ті тӧдмаланныд, мый Ме – Господь.

¹⁴ Ме лэпта на вылӧ Ассьым киӧс да кушта тайӧ муысь налысь оланінъяссӧ овтӧминсянь Ривла карӧдз. Сэки найӧ тӧдмаласны, мый Ме – Господь».