Езекиль 47 - Коми Библия 2023

Крам улысь визувтысь ю

¹ Морт бӧр вайӧдіс менӧ крам ӧдзӧс дорӧ. Ме аддзи, мый крам тагӧс улысь визувтіс ва асыввывлань, ӧд крамыс видзӧдіс асыввылӧ. Ваыс петіс тагӧс лунвывладорсянь, водзӧ визувтіс висьпуктанін лунвывладортіыс.

² Сэсся морт петкӧдіс менӧ войвыв пыранінӧд да кытшолӧн вайӧдіс асыввыв пыранін дорӧ. Сэні ме аддзи, мый ваыс тюргӧ-визувтӧ пыранін лунвывладорсяньыс.

³ Морт муніс асыввывлань. Сылӧн киас вӧлі мурталан кӧв, сійӧ мурталіс сюрс гырддза да келӧдіс менӧ визувтысь ва вомӧн. Ваыс вӧлі кок шегйӧдз.

⁴ Бара мурталіс сюрс гырддза да келӧдіс менӧ ва вомӧн. Ваыс вӧлі пидзӧсӧдз. Нӧшта мурталіс сюрс гырддза да келӧдіс менӧ ва вомӧн. Ваыс вӧлі коскӧдз.

⁵ Нӧшта мурталіс сюрс гырддза, и тайӧ вӧлі нин сэтшӧм ю, мый вуджнысӧ эг вермы. Ваыс вӧлі кыптӧма, мый позис сӧмын вартчыны, а келӧмнас вуджнысӧ эг нин вермы.

⁶ Морт шуис меным: «Морт пиӧй, аддзылін?» Сэсся сійӧ петкӧдіс менӧ ваысь.

⁷ Вадорысь ме аддзи зэв уна пу. Найӧ быдмисны ю ӧтар-мӧдар пӧлӧныс.

⁸ Морт шуис меным: «Тайӧ ваыс визувтӧ асыввыв муясӧ, лэччӧ Йӧрдан ковтысӧ да усьӧ Сола саридзӧ. Сэні ваыс бурмас да водзӧ оз нин ло сола.

⁹ И кытчӧ визувтас тайӧ ваыс, сэні кутас овны быдсяма ловъя олысьыс. Ваын лоӧ зэв уна чери, ӧд кытчӧ визувтас тайӧ ваыс, сэні ваыс бурмас да ставыс ловзяс.

¹⁰ Саридз дорын кутасны сулавны чери кыйысьяс. Эн-Гедисянь Эн-Эглаимӧдз найӧ кутасны тӧлӧдны тывъяссӧ. Ыджыд саридзын моз сэні кутас овны быдсикас чериыс, и сійӧ лоӧ зэв уна.

¹¹ Нюрын да гӧптаинын ваыс оз бурмы, медым сэтысь позис босьтны сов.

¹² Ю ӧтар-мӧдар пӧлӧныс кутасны быдмыны быдсяма вотӧса пуяс. Налӧн коръясыс оз косьмыны, и налӧн вотӧсыс оз бырлы. Пуясыс быд тӧлысь вайӧны вотӧс, ӧд найӧс юкталӧ вежаинсянь визувтысь ва. Тайӧ пуяслысь вотӧссӧ кутасны сёйны, а корнас бурдӧдчыны».

Израильлӧн мудор

¹³ «Господь Ыджыдыс тадзи висьталӧ: со кыдзи тіянлы колӧ юклыны мусӧ Израильлӧн дас кык чужанкотырлы. Ӧсиплы сетӧй кык пай.

¹⁴ Сетӧй быд чужанкотырлы ӧтыджда му. Ме киӧс лэптӧмӧн кӧсйыси сетны тайӧ мусӧ тіян батьяслы, та вӧсна сійӧ вичмас тіянлы.

¹⁵ Израильлӧн войвыв мудорыс нюжӧдчас Ыджыд саридзсянь Хетлон кар пыр Цедад карӧдз сэтчӧ нуӧдан туйӧд,

¹⁶ сэтысянь мунас Берота карӧдз, сэсся мунас Дамаск да Хамат муяс костын сулалысь Сивраим карӧдз, водзӧ – Хавран му дорын сулалысь Хацер-Тикон карӧдз.

¹⁷ Тадзи войвыв мудорыс мунас саридз дорсянь Хацар-Энан карӧдз. Дамаск да Хамат муяс лоӧны мудор войвывладорын.

¹⁸ Асыввылын мудорыс мунас Хавран да Дамаск муяс костті, Галаад да Израиль муяс костын мудорыс мунас Йӧрдан юті асыввыв саридз дорӧдз. Тайӧ асыввыв мудор.

¹⁹ Лунвылын мудорыс мунас Тамар карсянь Мериват-Кадеш ваяс дорӧдз, сэтысянь шорті Ыджыд саридз дорӧдз. Тайӧ лунвыв мудор.

²⁰ Рытыввыв мудорнас лоӧ Ыджыд саридз. Мудорыс мунас лунвывсянь Лево-Хамат весьтӧдз. Тайӧ рытыввыв мудор.

²¹ Тайӧ мусӧ юклӧй Израиль чужанкотыръяслы.

²² Тіянлы колӧ пудъясьӧмӧн юклыны мусӧ аслыныд да йӧз муысь локтысьяслы, кодъяслӧн чужасны ныв-пиныс. Тайӧ йӧзыс мед лоӧны тіянлы израильса вужвойтыр кодьӧсь жӧ. Налы мед тшӧтш вичмас му пай Израиль чужанкотыръяс пӧвстын.

²³ Кутшӧм чужанкотыр пӧвстӧ овмӧдчас йӧз муысь локтысь, сэтысь и сетӧй сылы пайсӧ, – висьталӧ Господь Ыджыдыс».