Езекиль 44 - Коми Библия 2023

Пӧдса пыранін

¹ Морт бӧр вайӧдіс менӧ вежаинлӧн асыввыв ортсы пыранін дорӧ. Пыраніныс вӧлі пӧдса.

² Господь шуис меным: «Тайӧ пыраніныс лоӧ пӧдса. Сійӧс оз восьтны, мортлы сэті пырнысӧ оз позь. Ӧд Господь, Израильлӧн Ен, пырис сэті. Та вӧсна тайӧ пыраніныс лоӧ пӧдса.

³ Сӧмын ӧксы вермас пукавны сэні, медым сёйны висьсӧ Господь водзын. Сылы колӧ пырны посводзӧд и петны тадзи жӧ».

Попъяс да левитъяс йылысь

⁴ Морт вайӧдіс менӧ войвыв пыранінӧд крам водзӧ. Ме аддзи, мый Господьлӧн дзирдлуныс тыртіс крамсӧ, и ме кымынь уськӧдчи муас.

⁵ Господь шуис меным: «Морт пиӧй, бура видзӧд, сюся кывзы да босьт тӧд вылад ставсӧ, мый Ме висьтала тэныд Аслам крам да пыран-петанінъяс йылысь. Босьт тӧд вылад на йылысь индӧд-тшӧктӧмсӧ.

⁶ Шу асныра Израиль войтырлы, мый Господь Ыджыдыс тадзи висьталӧ: Израиль войтыр, тырмас тіянлы пежсӧ вӧчны.

⁷ Ті вайӧданныд Менам вежаинӧ йӧз муысь локтысьясӧс, сьӧлӧмнас да вир-яйнас вундыштчытӧмъясӧс. На дырйи Меным гос да вир вайӧмӧн ті пежаланныд Менсьым крамӧс. Асланыд пеж уджъясӧн ті торканныд йитӧдӧс, мый Ме кӧрталі тіянкӧд.

⁸ Меным сиӧм вежаторъяс вӧсна онӧ асьныд тӧждысьӧй, а пуктанныд йӧз муысь локтысьясӧс кесъявны Менам вежаинын.

⁹ Господь Ыджыдыс тадзи висьталӧ: йӧз муысь локтысьяслы, кодъяс олӧны Израиль войтыр пӧвстын, сьӧлӧмнас да вир-яйнас вундыштчытӧмъяслы, оз позь пырны Менам вежаинӧ.

¹⁰ Левитъясӧс, кодъяс ылыстчисны Меысь, кор Израиль войтыр кежис Меысь да юрбитіс аслас идолъяслы, лоӧ мыждӧма мыжъяссьыныс.

¹¹ Менам вежаинын найӧ мед кесъяласны пыранін видзысьясӧн да крамбердса кесйӧгъясӧн, мед начкасны войтырлысь сотан да мукӧд висьяс да кесъяласны войтырлы.

¹² Сыысь, мый найӧ кесъялісны Израиль войтырлы идолъяс водзаныс да тайӧн мыжӧ кыскисны войтырӧс, Ме лэпті на вылӧ Ассьым киӧс, – висьталӧ Господь Ыджыдыс. – Мыжныс вӧсна найӧ нуасны мыждӧм.

¹³ Ме дінӧ налы оз позь матыстчыны, медым попъясӧн кесъявны Меным. Налы оз позь матыстчыны Меным сиӧм вежаторъяс да вежасьыс-вежаторъяс дінӧ. Найӧ мед яналасны да нуасны мыждӧмсӧ став пеж уджсьыныс.

¹⁴ Ме пукта найӧс тӧждысьны крам вӧсна да уджавны сэні.

¹⁵ Левий чужанкотырысь сӧмын Садок рӧдысь попъяслы, кодъяс эз дугдывны кесъявны Менам вежаинын, кор Израиль пиян кежисны Меысь, позьӧ матыстчыны Ме дінӧ да кесъявны Меным. Найӧ пондасны сулавны Ме водзын да вайны Меным гос да вир, – висьталӧ Господь Ыджыдыс. –

¹⁶ Найӧ пондасны пырны Менам Вежаинӧ да матыстчыны Менам пызан дорӧ, медым кесъявны Меным.

¹⁷ Попъяс кор пырасны пытшкӧс йӧрлӧн пыранінӧд, налы колӧ пасьтасьны шабді дӧра паськӧмӧ. Пытшкӧс йӧр пыранінъясын да крамын кесъялігӧн найӧ мед эз вӧвны вурун паськӧмаӧсь.

¹⁸ Юр выланыс налӧн мед вӧлі шабді дӧраысь юрвевттьӧд, улыс гачныс мед тшӧтш вӧлі шабді дӧраысь. Найӧ мед оз пасьтасьны сэтшӧм паськӧмӧ, мыйысь вермасны пӧсявны.

¹⁹ Войтырыс дінӧ ортсы йӧрас петігӧн найӧ мед пӧрччасны кесъялан паськӧмнысӧ, колясны сійӧс вежа жырйӧ да пасьталасны мӧд паськӧм, медым вежа паськӧмнаныс эз инмыны войтырыс дінӧ да тадзи эз вежӧдны найӧс.

²⁰ Попъяс мед оз кушӧдз шырны юрнысӧ, но и мед оз быдтыны кузь юрси.

²¹ Попъяс мед оз юны вина, кор налы ковмас мунны пытшкӧс йӧрӧ.

²² Поплы оз позь босьтны гӧтырӧ дӧваӧс либӧ верӧсӧн эновтӧм аньӧс. Сылы колӧ босьтны Израиль войтыр пӧвстысь нылӧс либӧ поплысь дӧваӧс.

²³ Попъяс мед велӧдасны Менсьым войтырӧс торйӧдны, мый вежа, а мый абу вежа. Мед гӧгӧрвоӧдасны, мый пеж, а мый сӧстӧм.

²⁴ Попъяслы колӧ ёрдын видлавны вензьӧмъяс да веськыда мыждыны Менам тшӧктӧмъяс серти. Налы колӧ вежӧдны Менсьым шойччан лунӧс да тӧждысьны, медым Менсьым вежа гажӧдчан лунъяс пасйисны Менам индӧд-тшӧктӧмъяс серти.

²⁵ Поп мед оз пежав асьсӧ шой дінӧ матыстчӧмӧн. Но кулас кӧ сылӧн бать-мамыс, ныв-пиыс, вокыс либӧ чойыс, коді эз вӧв верӧс сайын, сэки сылы позьӧ асьсӧ пежавны.

²⁶ Сӧстӧммӧдчӧм бӧрас сійӧ мед нӧшта виччысьӧ сизим лун,

²⁷ а сійӧ лунӧ, кор локтас кесъявны вежаинлӧн пытшкӧс йӧрӧ, сылы колӧ вайны ас вӧснаыс мыжысь вись, – висьталӧ Господь Ыджыдыс.

²⁸ Ме – попъяслӧн пайыс, Израиль муысь энӧ сетӧй налы му пай. Ме – налӧн овмӧсыс.

²⁹ Найӧ мед пӧткӧдчасны нянь висьясӧн, мыжысь висьясӧн да мыж вештан висьясӧн. Тшӧтш ставыс, мый Израильын сиӧма Меным, вичмӧ попъяслы.

³⁰ Медводдза быдтасыс да быдсяма вайӧмторйыс вичмӧ попъяслы. Выль пызьысь медводдза пӧжаснытӧ сетӧй попъяслы, медым тіянлысь керканытӧ вӧлі бурсиӧма.

³¹ Попъяслы оз позь сёйны пӧтка-пемӧс шой да зверӧн косявлӧм пӧтка-пемӧс».