Езекиль 41 - Коми Библия 2023

Крам

¹ Морт пыртіс менӧ крамӧ. Сійӧ мурталіс ӧдзӧсдор стенъяссӧ, и налӧн кызтаыс вӧлі квайт гырддза. Вежа чомлӧн пасьтаыс моз

² крамлӧн ӧдзӧсыс вӧлі дас гырддза, а ӧдзӧсдор стенъясыс вӧліны вит гырддза пасьта. Морт мурталіс вежӧссӧ, кузьтанас сійӧ вӧлі нелямын гырддза, а пасьтанас – кызь гырддза.

³ Морт пырис пыді вежӧсӧ да мурталіс ӧдзӧсдор стенъяссӧ, налӧн кызтаыс вӧлі кык гырддза, а пасьтаыс – сизим гырддза. Ӧдзӧсыс вӧлі квайт гырддза пасьта.

⁴ Водзӧ мурталіс пыді вежӧссӧ, кузьтанас и пасьтанас сійӧ вӧлі кызь гырддза. Пасьтанас сійӧ вӧлі медводдза вежӧс кодь. Морт шуис меным, тайӧ пӧ Вежасьыс-вежаин.

⁵ Морт мурталіс крам стенсӧ, сійӧ вӧлі квайт гырддза кызта. Крам стен бердын куимладор бокас вӧліны жыръяс. Пасьтанас найӧ вӧліны нёль гырддза.

⁶ Найӧ вӧліны ӧта-мӧд вылас куим судтаӧн, быд судтаын вӧлі комын жыр. Крам ортсы стенсянь чурвидзисны тшупӧдъяс. На вылӧ мыджсисны жыръяссӧ кутысь брусъясыс. Тадзи брусъяссӧ эз ковмы йитны крам стенмас.

⁷ Крамсӧ кытшалысь жыръясыс мӧд судтаас вӧліны паськыдджыкӧсь медводдза судтаас дорысь, а коймӧд судтаас – паськыдджыкӧсь мӧд судтаас дорысь. Улыс судтасянь кайисны шӧр судтаас, а сэсянь кайисны вылыс судтаас.

⁸ Ме аддзи крам гӧгӧрысь джуджыд подув, мый вылын сулалісны крамбердса жыръясыс. Подулыс вӧлі мурталан бедь судта, мӧд ногӧн кӧ, квайт гырддза.

⁹ Крамбердса жыръяслӧн ортсы стенмыс вӧлі вит гырддза пасьта. Жыръяс водзын вӧлі восьсаин.

¹⁰ Восьсаиныс крамбердса жыръяс да попъяслӧн ӧти вежӧса керкаяс костын вӧлі кызь гырддза пасьта. Восьсаиныс вӧлі крам гӧгӧрыс.

¹¹ Крамбердса жыръясысь петісны ывлаӧ войвывладор ӧдзӧсӧд да лунвывладор ӧдзӧсӧд. Восьсаинӧдз ветлан туйыс вӧлі вит гырддза пасьта, сійӧ кытшовтіс крам.

¹² Крам сайын, восьсаинсянь рытыввылын, сулаліс керка. Керка пытшкӧсыс вӧлі сизимдас гырддза пасьта да ӧкмысдас гырддза кузьта. Сылӧн стенмыс вӧлі вит гырддза кызта.

¹³ Морт мурталіс крам. Крамлӧн кузьтаыс вӧлі сё гырддза. Крам стенсянь сы сайын сулалысь керкалӧн бӧрладор стенмӧдз вӧлі тшӧтш сё гырддза.

¹⁴ Крам водзын асывладорас восьсаиныс вӧлі тшӧтш сё гырддза.

¹⁵ Морт мурталіс крам сайын сулалысь керкасӧ жыръяснас, сійӧ вӧлі сё гырддза кузьта. Крам пытшкӧссӧ да посводзсӧ, пыранінъяслысь посводзьяссӧ,

¹⁶ тагӧсъяссӧ, ӧдзӧс куричьяссӧ, таса ӧшиньяссӧ да куимнан судтасьыс крамбердса жыръяссӧ джоджсяньыс ӧшиньӧдзыс вӧлі эжӧма пуӧн. Ӧшиньясыс вӧліны тупкыссянаӧсь.

¹⁷ Крам пытшкысь и ортсыысь ӧдзӧс весьтсянь джоджӧдз став стенмас вӧлі серпасалӧма

¹⁸ херувимъяс да пальмаяс. Кык херувим костын вӧлі пальма. Быд херувимлӧн вӧлі кык чужӧм,

¹⁹ ӧтар боксяньыс пальма вылӧ видзӧдіс морт чужӧм, а мӧдар боксяньыс – лев чужӧм. Тадзи вӧлі вӧчӧма крам стен пасьтала.

²⁰ Херувимъясӧс да пальмаясӧс вӧлі серпасалӧма крам стенъясӧ джоджсяньыс ӧдзӧс куричӧдзыс.

²¹ Крамлӧн ӧдзӧсыс вӧлі нёль пельӧса, Вежасьыс-вежаинлӧн – сэтшӧм жӧ.

²² Пуысь вӧчӧм висьпуктаніныс вӧлі куим гырддза судта, кык гырддза кузьта да кык гырддза пасьта. Сылысь пельӧс сюръяссӧ, подувсӧ да стенъяссӧ вӧлі вӧчӧма пуысь. Висьпуктанін йылысь морт шуис меным: «Тайӧ пызаныс сулалӧ Господьлӧн чужӧмбан водзын».

²³ Крамлӧн ӧдзӧсыс да Вежасьыс-вежаинлӧн ӧдзӧсыс вӧліны кыкпӧвстаӧсь.

²⁴ Быд ӧдзӧс пӧлыс воссис кык пельӧ.

²⁵ Крам ӧдзӧсъясӧ стенъясӧ моз вӧлі серпасалӧма херувимъяс да пальмаяс. Посводз ортсыас вӧлі пуысь вӧчӧм пос.

²⁶ Посводзас ӧтар-мӧдар бокас вӧліны таса ӧшиньяс, стенъясӧ вӧлі серпасалӧма пальмаяс. Тадзи вӧлі серпасалӧма тшӧтш посводзлысь да крамбердса жыръяслысь пу пӧвъясӧн эжӧм стенъяссӧ.