Езекиль 4 - Коми Библия 2023

Ерусалимӧс кытшалӧм йылысь пророкалӧм

¹ «Морт пиӧй, босьт кирпич, пукты ас водзад да серпасав сэтчӧ Ерусалим кар.

² Карсӧ босьт кытшӧ. Кар гӧгӧрыс лэпты тымӧд, сувтӧдав тышкайӧзӧс да стен жуглан керъяс.

³ Босьт кӧрт лист, сувтӧд сійӧс тэа-кар костӧ кӧрт стен пыдди да видзӧд карыс вылӧ. Карсӧ кытшӧ босьтӧмыс Израиль войтырлы лоӧ индысьпасӧн.

⁴ Вод шуйга бок вылад да босьт ас вылад Израиль войтырлысь мыжсӧ. Став кад чӧжыс, мый дыра тэ кутан куйлыны шуйга бок вылад, кутан нуны Израиль войтырлысь мыжсӧ.

⁵ Ме урчита тэныд нуны Израиль войтырлысь мыжсӧ сы мында лун, кымын во чӧж найӧ мыж вӧчисны – куимсё ӧкмысдас лун.

⁶ Тайӧс вӧчӧм бӧрын вод веськыд бок вылад да нелямын лун чӧж ну Иуда войтырлысь мыжсӧ. Быд воысь Ме урчита тэныд ӧти лун.

⁷ Видзӧд кытшӧ босьтӧм Ерусалим вылӧ, состӧ пуджӧмӧн кыпӧд веськыд китӧ сылань да пророкав сылы паныд.

⁸ Ме кӧртала тэнӧ гезйӧн, и тэ он вермы бергӧдчыны мӧдар бок вылад, кытчӧдз Ерусалим карӧс кытшалан лунъясыд оз помасьны.

⁹ Босьт шобді, ид, анькытш, чечевица, проса, полба да кисьт ставсӧ ӧти дозйӧ. Пӧжав наысь аслыд нянь да сёй сійӧс куимсё ӧкмысдас лун чӧж, кор кутан куйлыны бок вылад.

¹⁰ Весит ӧти лун кежлӧ кызь сикель нянь да сёй сійӧс урчитӧм кадӧ.

¹¹ Ватӧ тшӧтш муртав да урчитӧм кадӧ ю гинлысь квайтӧд пайсӧ.

¹² Пӧжав няньтӧ ид сӧчӧнӧс моз. Пӧжав сійӧс морт сіт вылын став йӧзыслӧн син водзын».

¹³ Господь шуис: «Тадзи Израиль пиян тшӧтш кутасны сёйны пеж нянь войтыръяс пӧвстын, кытчӧ вӧтла-разӧда найӧс».

¹⁴ Ме шуи: «Господьӧй Ыджыдӧй! Ме некор эг пежавлы ачымӧс. Том кадсянь талунъя лунӧдз ме эг сёйлы зверӧн косявлӧм пемӧслысь либӧ шой пемӧслысь яй. Ме вомӧ эг босьтлы пеж яй».

¹⁵ Господь шуис меным: «Ме лэдза тэныд морт сіт пыдди мӧс сіт вылын няньтӧ пӧжавны».

¹⁶ Господь шуис меным: «Морт пиӧй, Ме мырддя ерусалимса олысьяслысь няньсӧ. Няньторсӧ найӧ кутасны сёйны веситӧмӧн да майшасьӧмпырысь, васӧ кутасны юны мурталӧмӧн да полӧмпырысь.

¹⁷ Няньыс да ваыс налы оз кут тырмыны. Ставнысӧ полӧм босьтас, найӧ косьмасны-сісьмасны мыжныс вӧсна».